პარტიის მიერ ნებისმიერი პირის საშუალებით საჩუქრის გაცემა აკრძალულია; ასევე პოლიტიკური მიზნით, პირდაპირ ან არაპირდაპირ ფულის, ფასიანი ქაღალდის, სხვა ქონების, ქონებრივი უფლების, მომსახურების ან სხვა რაიმე უპირატესობის შეთავაზება, დაპირება, გადაცემა ან გაწევა ისჯება თავისუფლების აღკვეთით სამ წლამდე ვადით ან ჯარიმით. არსებობს რამდენიმე გამონაკლისი, რაც ამომრჩევლის მოსყიდვად არ ჩაითვლება. მაგალითად, სადღესასწაულოდ დასაშვებია მცირე ღირებულების საჩუქრების დარიგება წლის განმავლობაში 5 000 ლარის ფარგლებში.
როგორც “საერთაშორისო გამჭვირვალობა _ საქართველოს” ანგარიშშია ნათქვამი, დეკემბრის ბოლოს და იანვარში პოლიტიკური ძალების წარმომადგენლების (ან პოლიტიკურ პარტიასთან ასოცირებული პირების) მხრიდან საზოგადოების სხვადასხვა ჯგუფებისთვის საახალწლო საჩუქრების გადაცემის ბევრი ფაქტი გამოვლინდა. შესაბამისად, კანონი მოითხოვს, რომ საქართველოს კონტროლის პალატამ თითოეული შემთხვევა გამოიკვლიოს და კანონის ფარგლებში სათანადო რეაგირება მოახდინოს. ქვემოთ ჩამოთვლილი ფაქტების ნაწილი 2012 წლის 12 იანვრამდე მოხდა (სისხლის სამართლის კოდექსში შესული ზემოთ ნახსენები ცვლილებები სწორედ ამ დღეს ამოქმედდა). “მოქალაქეთა პოლიტიკური გაერთიანებების შესახებ” ორგანული კანონის მიხედვით, ერთი პოლიტიკური ძალის წარმომადგენლების მიერ გაცემული საჩუქრების საერთო ღირებულება 5000 ლარს არ უნდა აღემატებოდეს. ჩვენ მიერ მოძიებული ინფორმაცია მოიცავს, როგორც 12 იანვრამდე, ისე 12 იანვრის შემდეგ მომხდარ ქმედებებს. შესაბამისად, შესაძლოა, სახეზე გვქონდეს სისხლის სამართლის დანაშაული და ასევე “მოქალაქეთა პოლიტიკური გაერთიანებების შესახებ” საქართველოს კანონის დარღვევა”.
ანგარიშში მოხვდა “გურია ნიუსის” მიერ გავრცელებული ინფორმაცია: “31 დეკემბერს ოზურგეთის მუნიციპალიტეტის საკრებულოს თავმჯდომარემ, ალეკო მამეშვილმა, ამავე მუნიციპალიტეტის გამგებლის მოვალეობის შემსრულებელმა, ილია ვაშაყმაძემ, საქართველოს პარლამენტის დეპუტატმა, გოჩა შანიძემ და ოზურგეთის მუნიციპალიტეტის გამგეობის შრომის, საზოგადოებრივი ჯანმრთელობის და სოციალური დაცვის საკითხებში ლტოლვილთა და იძულებით გადაადგილებულ პირთა საქმიანობის სამსახურის უფროსმა, ნათია ვაშალომიძემ სოციალურად შეჭირვებულ ოჯახებს _ მარიზე ფირციძეს, ნანა ბერულავას და მზევინარ ლურსმანაშვილს საახალწლო საჩუქრები მიუტანეს. ამის შემდეგ, ომის ვეტერანს, ჟუჟუნა ბაბილოძესაც გადასცეს საჩუქრები. ამასთანავე, მათ უფასო სასადილოს მზრუნველობამოკლებულ ბენეფიციარებს საახალწლო ნობათი გადასცეს”, _ ნათქვამია ანგარიშში.
