იყო დრო, როცა ოზურგეთში სილამაზის კონკურსები ხშირად ტარდებოდა. ეს ღონისძიებები განსაკუთრებით აქტუალური იმ პერიოდში გახლდათ, როცა ქვეყანაში ელექტროენერგიის დეფიციტი იყო, შესაბამისად იშვიათობას არ წარმოადგენდა უშუქოდ დარჩენილი დარბაზი და გარინდული კონკურსანტები დენის ჩართვის მოლოდინში.
მიუხედავად ამ და სხვა სოციალური პრობლემებისა, როგორც ყოფილი კონკურსანტები იხსენებენ, ეს მათი ბავშვობის ერთ-ერთი საუკეთესო მოგონებაა.
სილამაზის კონკურსებისა და სხვა გასართობი ღონისძიებების ორგანიზატორი ავთანდილ სირბილაშვილი იყო. ჩვენთან საუბრისას ამბობს, რომ მაშინ, ახალგაზრდები მსგავს ღონისძიებებში აქტიურად იყვნენ ჩართულები.
„გურია ნიუსს“ მიაწოდეს დოკუმენტი, რომელშიც 1994 წელს ჩატარებული სილამაზის კონკურსის მონაწილეების ვინაობა, მათი სიმაღლე და წონა წერია.
ნატო სებისკვერაძე, ელმირა ალიხანიანი, ჟენია ლესელიძე, ეკა ტუღუში, თათია მუჯირი, ლელა ხვადაგიანი, ნათია ლომთათიძე, ხათუნა ლომჯარია, თინა გოგოტიშვილი, ლანიტა როდონაია, მაკა ფრანგიშვილი, თეა აროშიძე, ლიკა რუსიეშვილი, მაკა სირაძე, ლია გიორგაძე, თეა წითაძე, ლია ხვადაგიანი, მაია ბეგლარიშვილი, ნათია ფოცხიშვილი, ეკა ბახტაძე, მაკა ორმოცაძე, თეა მამინაშვილი, დალი ჯაში, ინგა ნიჩბიანი, შორენა ლომთათიძე, ნანული მჟავანაძე, ეკა გობრონიძე, შორენა სანიკიძე, ნათია როყვა, ბელა ღლონტი, მაია სანიკიძე _ ეს ის გოგონები არიან, რომლებიც "მის ოზურგეთი 94"-ში მონაწილეობდნენ.
_ ეს კონკურსი კარგად მახსოვს. მაია სანიკიძე გახდა გამარჯვებული, რომელიც იმავე დღეს, თეატრის კიბეებიდან მოიტაცეს. მახსოვს, ისიც, რომ მეორე ადგილზე გასული კონკურსანტის მამა ცუდად გახდა და სასწრაფო გამოვიძახეთ. ობოლი გოგონა იყო, რომელიც თანაბარ კონკურენციას უწევდა სანიკიძეს და საბოლოოდ გამარჯვებულის გამოსავლენად დაგჭირდა, რომ მკერავი შეგვეშვა კულისებში, რომელიც ზუსტ პარამეტრებს დაადგენდა. 90/60/90 _ ეს იყო მაიას პარამეტრები და გამარჯვებულის გვირგვინიც მას ერგო, _ 21 წლის წინანდელი ისტორია გაიხსენა სირბილაშვილმა.
მისივე თქმით, იმ პერიოდში ინერციით იყო გადმოსული თეატრში, კინოში სიარულის აუცილებლობა და სწორედ ეს იყო ერთ-ერთი მიზეზი იმისა, რომ ყველა ღონისძიებაზე დარბაზი სავსე იყო:
_ ეს ყველაფერი მიდიოდა ოჯახიდან, სკოლიდან. იმ პერიოდში პედაგოგები სისტემატიურად ატარებდნენ სასკოლო ღონისძიებებს. ოღონდ კი რაიმე ყოფილიყო და ყველა მზად იყო მონაწილეობისთვის. დღესაც ვატარებთ მსგავს ღონისძიებებს, მაგრამ ის მონდომება არ არის რაც წინა წლებში, რადგან, სამწუხაროდ, ახალგაზრდებს კომპლექსები აქვთ, _ დასძინა სირბილაშვილმა.
