ახლახან სატელევიზიო გადაცემა "არჩევანის" სიუჟეტში ოზურგეთელი გარემოვაჭრე შოთა შაქარიშვილი ვიხილეთ, რომელიც ძირითადად აგრარული პროდუქციით ვაჭრობს და არაერთხელ ყოფილა ჩვენი რესპოდენტი. მისი ძირითადი მოთხოვნა იყო, ბაზრის ხელმძღვანელობას არ გადაეყვანა იმ ადგილიდან, სადაც მრავალი წლის მანძილზე იდგა და ვაჭრობდა. თუმცა, ბაზარში გადახურული დახლების აგების შემდეგ, ხელმძღვანელობამ, ისევე როგორც სხვებს, მასაც მოთხოვა მოწესრიგებულ დახლთან სანიტარული ნორმების დაცვით ემუშავა. შაქარიშვილი ითხოვდა, სადაც ვზივარ, იქ დამტოვეთო.
– მიჩვეულია სავალი გზის კიდეზე დგომას. ზედ უნდა გადაუარონ? დადგეს დახლთან, სუფთად, მოწესრიგებულად და ივაჭროს. უშლის ვინმე? _ ამბობდნენ ბაზრის ხელმძღვანელები მაშინ, როცა ჩვენ შაქარიშვილის პრობლემის შესახებ ვწერდით.
"გურია ნიუსი" შეეცადა გაერკვია, რას ითხოვს შოთა შაქარიშვილი, რომელიც ამჯერად გურიის ქუჩაზე, ბაზრის შესასვლელთან, ტროტუარის გასწვრივ დგას და კვლავ მწვანილეულს ყიდის.
_ბატონო შოთა, დღეს რატომ ხართ უკმაყოფილო? დახლთან მაინც არ დადექით, ხომ?
_უკმაყოფილო იმით ვარ, რომ აქედანაც ამაგდეს.
_ აბა, ისევ როგორ დგახართ?
_ძალისძალად, ჩემით გამაქვს რაღაც…
_რას ნიშნავს ძალად, თუ უნდათ, არ გაგიყვანენ?
_დამდევენ, აგერ ნახე, ეს ქაღალდი მომიტანეს, _ შაქარიშვილი განკარგულების ფურცელს გვაჩვენებს.
_დახლთან რატომ არ დგებით, რატომ ამჯობინებთ ტროტუარზე დგომას, ყველა მოვაჭრე რომ აქ დადგეს, ხალხი როგორ გაივლის?
_ სულ არ მინდა, მთლად წავალ საქართველოდან, მივდივარ.
_სად მიდიხართ?
_ სხვაგან… 30-კაციანი პურმარილი გადავიხადე, არ მინდოდა თქმა ახლა… თქვენი გაზეთის მე ძაან მადლობელი ვარ. რამდენჯერ მითქვამს შენთვის მადლობა, მარა არ გამოვიდა არაფერი.
_რა პურმარილზე საუბრობთ, ბატონო შოთა?
– ისე თქვენ კი უნდა დამეპატიჟებინეთ, იმდენჯერ მომაქციეთ ყურადღება.
_ ბოლოს და ბოლოს, რას ითხოვთ?
_ არაფერს, მივდივარ აქედან. მაინც ინტრიგანს მეძახიან.
– ვინ გიწოდებთ ინტრიგანს?
_ასე გამოვდივარ, ვერ ხედავ?
_ მაინც არ ამბობთ, დახლთან რატომ არ დგებით?
_არც იქ მაყენებენ.
_მაშინ მივმართავ ზედამხედველობის სამსახურს.
_ კი, ბატონო.
ოზურგეთის მერიის ზედამხედველობის სამსახურის უფროსი შუქრი გაბრიჩიძე ამბობს:
"შოთა შაქარიშვილი პირდაპირ ტროტუარზე დგას. ჩვენ მივუთითეთ დროებითი განთავსების ადგილზე, ქალაქის ოქროულობის მაღაზიის გვერდით, მაგრამ არ გადავიდა. ვინ უშლის ვაჭრობას? მაგ ბატონს პირდაპირ ტროტუარზე სურს დგომა, ხომ ხედავთ, ასე შეიძლება? საერთოდ კი , როცა ბაზრის მშენებლობა დასრულდება, გარევაჭრობა აიკრძალება. ყველას ექნება ყველანაირი პირობა შექმნილი, რომ ბაზარში ივაჭროს," _ გვითხრა გაბრიჩიძემ.
