ყველაზე მარტივი ჭეშმარიტება, რაც ნებისმიერი კანონის შესახებ უნდა ვიცოდეთ, ასეთია _ “კანონის წინაშე ყველანი თანასწორნი და თანაბარუფლებიანნი ვართ!”
ეს დადგენილი წესი, კონტროლის პალატისთვის, როგორც ჩანს, არც ბუნებაში არსებობს და არც პრაქტიკაში მოქმედებს. ის, რის გამოც სჯიან პეტრეს, აბსოლუტურად ნებადართულია პავლესთვის. იურიდიულ ენაზე ამ ყველაფერს შერჩევითი სამართალი ჰქვია.
კონტროლის პალატას, “მოქალაქეთა პოლიტიკური გაერთიანებების” შესახებ ორგანულ კანონში შეტანილი ცვლილებების თანახმად, უპრეცედენტოდ დიდი და ამავდროულად, კონსტიტუციის ჩარჩოდან “ამოვარდნილი” უფლებამოსილება მიენიჭა.
სწორედ ამ უფლებამოსილების ფარგლებში, 27 თებერვალს, საქართველოს კონტროლის პალატის პოლიტიკური პარტიების ფინანსური მონიტორინგის სამსახურმა “ქართული ოცნება” 200 000 ლარით დააჯარიმა. როგორც მონიტორინგის სამსახურის ხელმძღვანელმა ნათია მოგელაძემ განაცხადა, “ქართულმა ოცნებამ” უკანონოდ გადარიცხული თანხის უკან გადარიცხვაზე უარი განაცხადა, რაც კანონის უგულებელყოფაა.
გავრცელებული ინფორმაციით, პალატამ კანონით მინიჭებული მანდატის საფუძველზე შეისწავლა შპს “ქართუ მშენებლის” თანამშრომლის, ნუგზარ ხუციშვილის მიერ მოძრაობა “ქართული ოცნებისთვის” შემოწირულობის გახორციელების მართლზომიერების საკითხი; კანონის მოთხოვნათა სრული დაცვით ჩაატარა ადმინისტრაციული წარმოება და კონკრეტული ფაქტების ანალიზის საფუძველზე მიიჩნია, რომ სახეზე იყო იურიდიული პირის მიერ ფიზიკური პირის გამოყენებით გახორციელებული უკანონო შემოწირულობის ფაქტი.
კონტროლის პალატისვე სიტყვებით რომ ვთქვათ, “კანონის მოთხოვნათა სრული დაცვითა და კონკრეტული ფაქტების ანალიზის საფუძველზე”, 20 თებერვალს, გაზეთ “გურია ნიუსში” გამოქვეყნდა შორენა ღლონტის სტატია სახელწოდებით _ “ნაციონალური მოძრაობის” “მზრუნველობა” ბიუჯეტის ხარჯზე!”
“ერთიანი ნაციონალური მოძრაობა” უფასო სასადილო მზრუნველობა მოკლებულთათვის” _ ასეთი წარწერა უმწეოთა სასადილოს, დაახლოებით 2012 წლის 17 თებერვლის 15 საათსა და 10 წუთამდე “ამშვენებდა”. აღნიშნულ ობიექტს ბიუჯეტი, მხოლოდ მიმდინარე წელს, 75 000 ლარით აფინანსებს.
მას შემდეგ, რაც “გურია ნიუსი” ამ აბრით დაინტერესდა და კომენტარისთვის ოზურგეთის გამგეობისა და საკრებულოს პრესსამსახურებს მიმართა, მოულოდნელად, აბრა თვალსა და ხელს შუა გაქრა.
ჟურნალისტის კითხვას საკრებულოს საზოგადოებასთან ურთიერთობის განყოფილებამ ასეთი პასუხი გასცა: “როგორც გვაცნობეს, მზრუნველობამოკლებულთა სასადილოს ამჟამად, მსგავსი წარწერით აბრა არ აქვს. რაც შეეხება ნაციონალურ მოძრაობასთან სასადილოს კავშირს, შეგახსენებთ, რომ უფასო სასადილო მზრუნველობამოკლებულთათვის, თავის დროზე, ერთიანი ნაციონალური მოძრაობის ინიციატივით დაწყებული პროექტია”.
მიუხედავად იმისა, რომ ერთ დროს ეს პროექტი “ნაციონალურ მოძრაობას” ეკუთვნოდა, სამართლის კოდექსში, საარჩევნო კოდექსსა და “მოქალაქეთა პოლიტიკური გაერთიანებების” შესახებ ორგანულ კანონში 2011 წლის დეკემბერში შეტანილი ცვლილებების მიხედვით, პოლიტიკური სუბიექტის მიერ ნებისმიერი სახის ქველმოქმედება დასჯადია.
რადგან “ნაციონალური მოძრაობა” ჯერ კიდევ პოლიტიკურ სუბიექტად ითვლება, ბუნებრივია, დასჯადი უნდა ყოფილიყო მათი ქველმოქმედებაც.
აღნიშნული ფაქტის შესახებ “გურია ნიუსმა” 24 თებერვალს მიმართა კონტროლის პალატას. ჩვენ კონტროლის პალატის პრესსამსახურის წარმომადგენელს, ფატი მამიაშვილს სამსახურებრივ ელექტრონულ ფოსტაზე გავუგზავნეთ სტატია, სადაც ზემოთქმულ ფაქტზე იყო საუბარი და მხოლოდ 2 კითხვაზე ვთხოვდით პასუხის გაცემას.
1. როგორ თვლის კონტროლის პალატა, აღნიშნული ფაქტით ადგილი აქვს თუ არა “მოქალაქეთა პოლიტიკური გაერთიანებების შესახებ” საქართველოს ორგანული კანონის დარღვევას, რადგან ამ კანონის თანახმად, პარტიას ეკრძალება საქველმოქმედო საქმიანობა და მას ეს ჩაეთვლება “ამომრჩეველთა მოსყიდვად”?
2. “ნაციონალური მოძრაობა” ამ ობიექტს პირდაპირ თუ არაპირდაპირ იყენებდა სააგიტაციოდ, რა სანქციას ითვალისწინებს მსგავსი ქმედება?
ორკვირიანი უშედეგო ლოდინის შემდეგ, ჩვენს მიერ დასმულ კითხვებზე პასუხის გასაგებად მამიაშვილს დავუკავშირდით, რომელმაც გაგვიცხადა, რომ “ნაციონალური მოძრაობის” სასადილოები გლობალური საკითხია და ამასთან დაკავშირებით კონტროლის პალატა კონკრეტულ პასუხს ვერ გაგვცემდა. გვირჩია, თავად “ნაციონალურ მოძრაობას” მიმართეთო.
კანონში შეტანილი ცვლილებების მიხედვით, უწყება, რომელსაც ზედამხედველობა ევალება და რეაგირებისთვის უნდა მივმართოთ, კონტროლის პალატაა და არა “ნაციონალური მოძრაობა”. ამის შესახებ, უპირველეს ყოვლისა, თავად კონტროლის პალატაში უნდა ფლობდნენ ინფორმაციას. მიუხედავად ამისა, “გურია ნიუსი” მაინც დაუკავშირდა ნაციონალურ მოძრაობას. ამ საკითხთან დაკავშირებით კომენტარის გაკეთება ვთხოვეთ რეგიონული პოლიტიკის თვითმმართველობისა და მაღალმთიანი რეგიონების კომიტეტის თავმჯდომარეს, ვახტანგ ბალავაძეს.
კონტროლის პალატას ვთავაზობთ ამონარიდს ვახტანგ ბალავაძის ვრცელი ინტერვიუდან.
_ ბატონო ვახტანგ, თქვენ ამბობთ, რომ “ნაციონალური მოძრაობის” მხრიდან ამ კონკრეტულ შემთხვევაში არანაირ დარღვევას ადგილი არ ჰქონია?
_ მე, უბრალოდ, კონკრეტული შემთხვევა არ ვიცი და ამიტომაც მიჭირს კონკრეტული პასუხის გაცემა. მუნიციპალური დაფინანსება თუ არის, ერთი ეგ ვიცი ასი პროცენტით, რომ ჩვენ არ გვაქვს მასეთი რაღაც, უფასო სასადილოებს ერთიანი ნაციონალური მოძრაობა რომ აფინანსებდეს. შესაბამისად, თუ არის მასეთი აბრა, არ უნდა იყოს ეგ აბრა.
_ თუ ბრძანდებით კომპიუტერთან, შემიძლია მოგაწოდოთ ფოტომასალა, სადაც აღბეჭდილია ეს აბრა და მითითებულია თარიღებიც. მოგეხსენებათ, დღეს ტექნიკა ამის საშუალებას იძლევა.
_ მე მჯერა თქვენი და ნამდვილად არ ვფიქრობთ, რომ არ გინახავთ. უბრალოდ, მე არ ვიცი. ერთი გეუბნებით იმას, რომ ნაციონალურ მოძრაობას ამასთან კავშირი არ აქვს. იმიტომ რომ, თავისთავად მუნიციპალურია. და მეორე, სად იყო ეგ აბრა გამოკრული ან რატომ იყო, მაგი არ ვიცი.
_ მას შემდეგ, რაც ამ აბრას “გურია ნიუსმა” სურათები გადაუღო და ოზურგეთის მუნიციპალიტეტს კომენტარისთვის დაუკავშირდა, აბრა სასწრაფო წესით ჩამოხსნეს…
_ სწორად მოქცეულან, რა გინდათ.
_ სწორად და სამართლიანად მოქცევა იმ შემთხვევაში იქნებოდა, ეს აბრა კანონში ცვლილებების შეტანისთანავე ჩამოეხსნათ და არა ორი თვის შემდეგ, ჟურნალისტების ჩარევის შედეგად. არ მეთანხმებით?
_ სამოქალაქო საზოგადოებისა და ჟურნალისტების მოვალეობას სწორედ ეგ არის. რომ ჩამოხსნეს, შედეგიც ხომ ეგ არის?
_ ვფიქრობ, სხვა, ნებისმიერ პარტიას გაცილებით მძიმე შედეგი დაუდგებოდა მსგავს შემთხვევაში…
_ მაგასთან დაკავშირებით თუ ვინმე თვლის, რომ არის გარკვეული დარღვევა, არსებობს გარკვეული ორგანოები, რომელთაც ზედამხედველობა ევალებათ და რეაგირებისთვის უნდა მიმართონ მას.
ისევე, როგორც ჩვენთვის, ვახტანგ ბალავაძისთვისაც ცნობილი იყო ის ფაქტი, რომ მსგავს დარღვევებთან დაკავშირებით ზედამხედველობის გახორციელება კონტროლის პალატას ევალება.
ჩვენ კიდევ ერთხელ დავუკავშირდით ფატი მამიაშვილს. გთავაზობთ მის სატელეფონო კომენტარს სრული სახით.
_ “გურია ნიუსიდან” გირეკავთ “ნაციონალური მოძრაობის” უფასო სასადილოსთან დაკავშირებით, იმსჯელა კონტროლის პალატამ ამ საკითხზე?
_ იცით რა, მე როგორც ვიცი, თქვენ კონტროლის პალატის თავმჯდომარის მოადგილესაც დაურეკეთ, რომელიც საერთოდ არ იყო არაფერ შუაში.
_ მოადგილეს “გურია ნიუსიდან” დაურეკეს სხვა საკითხზე, უფრო კონკრეტულად, საჩუქრების თემაზე. მე გირეკავთ “ნაციონალური მოძრაობის” მხრიდან ქველმოქმედების გზით ამომრჩევლის მოსყიდვასთან დაკავშირებით. ჩვენ დავუკავშირდით ამასთან დაკავშირებით ვახტანგ ბალავაძესაც, რომელმაც განაცხადა, რომ ეს აბრა ნამდვილად არ უნდა ყოფილიყო გამოკრული და რეაგირებისთვის გადმოგვამისამართა თქვენთან.
_ იცით, რაშია საქმე? ჩვენ მაგ საკითხებთან დაკავშირებით გვაქვს… რასაც ეხლა გეტყვით, გინდათ პოზიცია დაარქვით და გინდათ, რა ვიცი, განწყობა. როცა რამე ხდება კონტროლის პალატაში, გამოგვაქვს ბრიფინგზე. ძალიან მოულოდნელადაც და ზოგჯერ დაუგეგმავადაც ნათია მოგელაძე აკეთებს განცხადებას და ეს მომენტალურად დევს კონტროლის პალატის საიტზე. კონკრეტულ საკითხებზე არ კეთდება კომენტარები იმიტომ, რომ ძალიან ხშირად მეც მიჭირს ჩემი თანამშრომლების ნახვა. სულ არის შეხვედრები. ამიტომ თუკი რაიმე იქნება, არ დამვიწყებია, გადაცემული მაქვს, მაგრამ არ კეთდება კომენტარები მოუცლელობის გამო და არა იმიტომ, რომ ვინმეს არ აძლევენ კომენტარს.
_ გასაგებია, მაგრამ არსებობს კიდევ გარკვეული ვადები, რომლის ფარგლებშიც უნდა მივიღოთ პასუხი ჟურნალისტებმა.
_ კი, რა თქმა უნდა, არსებობს ვადები. ეს მასალები გადაცემულია და თუკი რამე იქნება, შეგატყობინებთ. როცა მაგ თემასთან დაკავშირებით განცხადება გაკეთდება, ჩვენ თვითონ გამოგიგზავნით. ამ ეტაპზე ეს შემიძლია მხოლოდ გითხრათ. კარგად ბრძანდებოდეთ!
