სოფელ ვაზიანის საბავშვო ბაღის გახსნის თარიღი ჯერჯერობით კვლავ უცნობია. მოსახლეობის ინფორმაციას, რომ ბაღი 1 ოქტომბერს უნდა გახსნილიყო, გარდაბნის მუნიციპალიტეტის სკოლამდელი აღზრდის დაწესებულებების გაერთიანებაში არ ადასტურებენ; სადაც აცხადებენ, რომ ახალი საბიუჯეტო წლისთვის ბაღის რემონტი მთლიანად დასრულდება, გახსნის თარიღი კი, მათთვისაც უცნობია. ადგილობრივების ინფორმაციით კი, ლილოში ბავშვების ტარება ზედმეტ თანხებთან არის დაკავშირებული, რისი გადახდაც ძალიან უჭირთ.
"არანაირი გასართობი ტერიტორიაზე ბავშვებისთვის არ გვაქვს. პირდაპირ მატარებლის ლიანდაგის პირზე უწევთ თამაში. საბავშვო ბაღიც კი, რომელიც ახლა გაარემონტეს, არ გახსნეს და ბავშვების მიყვანა ისევ ლილოში მოგვიწია. გვეუბნებოდნენ, 1 ოქტომბერს გაიხსნებაო, თუმცა, დღემდე არაფერია გახსნილი. 40 ლარს მარტო ტრანსპორტისთვის ვიხდით, რომ ბავშვი ბაღამდე მივიყვანოთ. ჩვენს მდგომარეობაში კიდევ დამატებითი ხარჯების გაღება ძალიან გვიჭირს", _ ამბობენ ადგილობრივები.
მათივე ინფორმაციით, ლილოში არსებულ ბაღშიც შეზღუდული რაოდენობის ადგილებია, რის გამოც, მოსახლეობის ნაწილმა ბავშვი სკოლაში ისე მიიყვანა, რომ ბაღში ერთი დღეც არ უვლიათ.
"მუხროვანს, ვაზიანის დასახლებას, აჭარლების დასახლებას, ნორიოს მოსახლეობას, ყველას ლილოში დაჰყავს ბავშვები ბაღში. მაგრამ ბევრმა ვერ მიიყვანა ფინანსების გამო და სკოლაში ისე მივიდნენ ეს ბავშვები, რომ ბაღში ერთი დღეც არ უვლიათ. იქნებ გაგვიხსნან ეს ახალი ბაღი, გვპირდებიან და მუდმივად მოლოდინის რეჟიმში ვართ. მხოლოდ ჩვენი სოფლიდან ლილოში დაახლოებით 60-მდე ბავშვი დადის", _ ამბობს ადგილობრივი რიტა ზარანდია.
გარდაბნის მუნიციპალიტეტის სკოლამდელი აღზრდის დაწესებულების გაერთიანების დირექტორი ჯემალ დავითაძე "გურია ნიუსთან" საუბრისას აცხადებს, რომ ბაღის გახსნა 1 ოქტომბერს არ იგეგმებოდა, რადგან კომუნიკაციები მიუერთებელია, შენობაში არ არის შეყვანილი წყალი და გაზი; დაუსრულებელია ტერიტორიის შემოღობვა და სარემონტო სამუშაოების ნაწილი.
"ჯერჯერობით ბაღის შენობა შემოღობილიც კი არ არის. არ არის შეყვანილი ელექტროენერგია, წყალი და გაზი. მხოლოდ ჩვენზე და გამგეობაზე არ არის დამოკიდებული რემონტი და კომუნიკაციების მიერთება. სხვადასხვა კომპანია ასრულებს სამუშაოებს. ახლა კეთდება პროექტი, რომ ბაღში ცენტრალური გათბობა იყოს და ახალგარემონტებულ შენობაში ღუმელი არ დავდგათ. არც ყოფილა საუბარი, რომ ოქტომბერში გაიხსნებოდა. როცა დამთავრდება მაშინ გავხსნით", _ განაცხადა დავითაძემ.
დავითაძე ვარაუდობს, რომ ბაღის გახსნა თებერვლის თვიდან შესაძლებელი იქნება.
"კომუნიკაციებს თუ მივუერთებთ, არ არის გამორიცხული, რომ ახალ საბიუჯეტო წელს მთლიანად მოხდეს რემონტის დასრულება და თებერვლიდან გავხსნათ კიდეც. თუმცა, ამის წინასწარ მტკიცება, გამიჭირდება. იანვარში, ან თებერვალში, როცა ბაღში სწავლა დაიწყება, არ არის გამორიცხული, ჩვენც გავხსნათ ეს ბაღი. გამორიცხულია ამ ორ-სამ თვეში ბაღი გაიხსნას. დასამთავრებლად არც ბიუჯეტი გვეყოფა და სარემონტო სამუშაოებსაც ვერ მოვასწრებთ. მიერთებული არ არის კომუნიკაციები და მოწესრიგებული არ არის გათბობის სისტემა. მასში არც ავეჯია შეტანილი, რაც შეეხება შენობას, მთლიანად გარემონტებულია", _ აღნიშნავს დავითაძე.
მისივე ინფორმაციით, ბაღი დაახლოებით 80 ბავშვზეა გათვლილი.
"შესაძლებელია ბაღში სამი ჯგუფი ჩამოყალიბდეს, ერთი ბაგა და ორი ბაღის ჯგუფი. დაახლოებით 70-80 ბავშვზეა საუბარი. თუმცა, ეს ამ დასახლებისთვის საკმარისი ვერ იქნება. ეს ბაღი ისეთ ადგილზე მდებარეობს, საკმარისი კი არა, ორი ბაღის დამატებაც დასჭირდეს. შენობა მეტის საშუალებას არ იძლეოდა, თორემ მე 4-5-ჯგუფიანი ბაღიც მინდოდა რომ ყოფილიყო", _ აღნიშნა დავითაძემ "გურია ნიუსთან" საუბრისას.
