ქალაქ ოზურგეთში მეგობრობის ქუჩის N 22 -ში მდებარე მრავალბინიანი საცხოვრებელი სახლის მცხოვრებლებმა "გურია ნიუსს" დახმარებისთვის კიდევე ერთხელ მიმართეს. აქ მცხოვრებლები ხელისუფლებისგან ყურადღების მიქცევასა და პრობლემების მოგვარებას ითხოვენ. მათი განცხადებით, აღნიშნული ბინის 50 ოჯახი დიდი პრობლემის წინაშე დგას _ ისინი საცხოვრებელი კორპუსის ფასადზე წყალდამცავი თუნუქის ფენის აკვრასა და სახურავის შეღებვას, რამდენიმე წელია, უშედეგოდ ითხოვენ.
იქ ადგილობრივი მაცხოვრებლების ნანული მელივას, ლამარა ლომჯარიას, ჟენია მეგრელიძის, ლეილა მიგინეიშვილის, ლეილა აბაშმაძის თხოვნით მივედით.
მათი თქმით, ქალაქ ოზურგეთის მერიას განცხადებით არაერთხელ მიმართეს, დაპირდნენ კიდეც პრობლემის მოგვარებას, თუმცა ჯერჯერობით, მათი განცხადებით, ადგილობრივი ხელისუფლება მრავალბინიანი ქუჩის მცხოვრებლების თხოვნას არ ითვალსიწინებს.
ლეილა მიგინეიშვილი: "35 ოჯახს კედლებში წყალში შესდის. მთელი ზაფხული ველოდებით, რომ დაიწყებდნენ გაკეთებას, ვხედავთ, რომ ქალაქის ცენტრში რამდენიმე ბინის კეთილმოწყობის სამუშაოები მიმდინარეობს. გვაინტერესებს, რატომ არიან სხვა ბინის მცხოვრებლები პრივილეგირებულები და ჩვენ ასეთ უკიდურეს მდგომარეობაში?ხელისუფლებას, რომ ჩვენს თხოვნას გვიპრდებიან, ჩასმული ხართ პროექტშიო და გვატყუებენ. მეორე ზამთარი მოდის და ასე უნდა ვიყოთ?
ახლა რომ გაწვიმდა, მთელი ღამე ფეხზე გავათენეთ, გაგვიფუჭდა ყველაფერი, იატაკი ავყარეთ, აზრი არ აქვს ბინის გარემონტებას,
გუბერნატორთანაც ვიყავით, მან დაურეკა ოზურგეთის მერს და ბეგლარ სიორიძემ უთხრა, რომ გეგმაში ჩასმული მყავსო. ვკითხეთ გუბერნატორს, წელს თუ გვეღირსება თქო, – კიო გვითხრა, ორ თვეში გაგიკეთებენო, -ამდენი ტყუილი, ასე თვალებში ნაცრის შეყრა შეიძლება? "
ნანული მელივა: "საშინელი მდგომარეობაა, მთელ ღამეებს ვათენებთ ამ წვიმაში, ისეთი ქარიშხალი იყო კედლებში წვიმა საშინლად ასხამდა. კედლები გაშავებულია წვიმისგან, ჩვენ არჩევნებზე ყველას დავუდექით მხარში და ახლა ხომ დასჭირდებათ კიდევ? სხვისთვის ხომ გამოინახა ხარჯები? არცერთი ბინა არ არის ასეთ მდგომარეობაში, როგორც ჩვენი. თუ რადგან ქალაქის ცენტრში არაა და არ ჩანს, ამიტომ არ აქცევენ ყურადღებას? არჩევნები რომ მოვა ტკბილი ენით რას არ გვპირდებიან."
ჟენია მეგრელიძე: "ისეთი ქარიშხალი იყო, თუ ავდგებოდი ლოგინიდან არ მეგონა, ისე დავსველდი. ჩვენ, პენსიონერებმა როგორ უნდა გავაკეთოთ, ასე უპატრონოდ რატომ ვართ? ან ასეთი მოუწესრიგებელი ეზო იქნება სადმე? ჩვენ პურის ფული არ გვაქვს, რა უნდა გავკეთოთ? საშინელ მდგომარეობაში ვართ, ამას ვერ გაუძლებს ადამიანი."
ლამარა ლომჯარია: "გაუსაძლის პირობებში ვცხოვრობთ. ზამთარი მოდის და არ ვიცით, რა გვეშველება _ აქ ძირითადად, პენსიონერები და უმუშევარი ადამიანები ცხოვრობენ. ჩვენ რის საშუალება გვაქვს? ვინ მოაგვარებს ჩვენს პრობლემებს, არ ვიცით, 50 წლის უმუშევარი სახლში მყავს, რით გავაკეთოთ? "
ლეილა აბაშმაძე: "იმხელა ტბა დგება კორპუსთან, წვიმიან ამინდში, რომ მანქანებს უჭირს გასვლა, იტბორება ყველაფერი. მოგვაქციონ ყურადღება, ასე ცხოვრების გაგრძელება არ შეიძლება, ამ სახლში ცხოვრება არ შეიძლება _ სულ დახეთქილი და დაბზარულია კედლები. ოთახებში წვიმა ჩამოდის, წყალს გასასვლელი არ აქვს და ეზოში ტბა დგება".
ქალაქ ოზურგეთის მუნიციპალიტეტის მერიაში აღნიშნულ საკითხთან დაკავშირებით აცხადებენ, რომ მეგობრობის ქუჩის N22-ში მცხოვრებ მოქალაქეთა პრობლემასთან დაკავშირებით, ქალაქის მერიის შესაბამისი სამსახური საქმის კურსშია.
“"წელს სხვა ასევე, პრობლემური კორპუსების საჭიროებები დაკმაყოფილდა. მომავალი წლის ბიუჯეტისთვის კი ხსენებული კორპუსის სარეაბილიტაციო სამუშაოებია გათვალისწინებული, რაც ფასადზე თუნუქის აკვრას და სახურავის შეღებვას გულისხმობს. თანდათან, შესაძლებლობის ა მიხედვით, ქალაქის მერია მსგავსი ტიპის პრობლემებს ქალაქის ყველა კორპუსს გადაუჭრის" _განაცხადეს ქალაქის მერიაში.
