“უშუქობა, უწყლობა, უგზოობა, უგაზობა _ ამაზე მეტი პრობლემა შეიძლება ჰქონდეს სოფელში ვინმეს”

ოზურგეთის მუნიციპალიტეტის სოფელ ნატანებში, ე.წ. "ლეკურას" უბანში მცხოვრებლებს უმრავი პრობლემა აწუხებთ. ადგილობრივების თქმით, წყალი მხოლოდ სოფლის ცენტრში მიეწოდება მოსახლეობას. მოუწესრიგებელია შიდა გზები, ითხოვენ გაზის შეყვანას. აინტერესებთ, იგეგმება თუ არა საერთოდ წყლის რეზერვუარის გაკეთება ამ უბნისთვის. "საერთოდ, გვყავს პატრონი?! ვინმემ ჰკითხა ხალხს, რაში დაეხარჯათ სოფლის მხარდამჭერი პროგრამის თანხები?! _ აცხადებენ ნატანებელები "გურია ნიუსთან" .

სოფელ ნატანებს რამდენიმე დღის წინ სტიქიაც დაატყდა თავს. ნატანები-შრომა-ურეკის ცენტრალურ მაგისტრალზე მეწყერი ჩამოწვა და გზის ამ მონაკვეთზე   მოძრაობა დროებით შეფერხებული იყო. აღნიშნულ გზის მონაკვეთზე მოძრაობა ცალმხრივია, მოსახლეობა შიშობს, რომ გზის ამ ნაწილს თუ არ აღადგენენ დროულად, შეიძლება საფრთხე შეექმნათ.
ოზურგეთის მუნიციპალიტეტის სოფელ ნატანებში ე.წ. "ლეკურას" უბანში 120 კომლი ცხოვრობს, ადგილობრივების განცხადებით, 120 ოჯახიდან წყალი მხოლოდ 40 ოჯახს მიეწოდება.

ნატო ბრეგვაძე: "თქვენც ხედავთ, რა მდგომარეობაშია გზა, ზევით კი  მთლად კატასტროფული  მდგომარეობაა, აქ არც სანიაღვრე არხებია. განცხადება ბევრჯერ დაწერეს, თუმცა არავითარი გამოხმაურება არ მოჰყოლია. ახლა რომ წვიმები იყო, სულ ჩამოიშალა მიწა. აქ გავლა შეუძლებელი იყო".

ავთანდილ თავაძე: "არჩევნებზე ჩვენი დეპუტატი  და სოფლის გამგებელი გვეუბნებოდნენ, რომ ოღონდ მხარი დაგვეჭირა მათთვის და ყველაფერს გააკეთებდნენ ამ უბნისთვის. საერთოდ არაფერი გაუკეთებიათ! რამდენი ხანი გავიდა იმის შემდეგ? ვინც მას უწევდა პიარ-კამპანიას, ისინი სად არიან? შეპირება შეპირებად დარჩა, აგვარჩევინეს თავი და ბოლო-ბოლო, როგორც ყველა ხელისუფლების მოსვლის შემდეგ ხდება, ხალხი დარჩა მოტყუებული და უყურადღებოდ, არაფერი არ გაკეთებულა სოფლის მხარდამჭერი პროგრამის ფარგლებში".

ვაჟა ჩხარტიშვილი:  "ყველაზე დიდი პრობლემა არის უწყლობა, მეორე _ უგზოობა და უგაზობა. ამ უბანს საერთოდ არაფრად თვლის ხელისუფლება. სასაფლაოსთან გზა ისე გადათხარეს, რომ მანქანები ვერ მოძრაობენ. წყალი არ გვაქვს. ნაწილს დაუმონტაჟეს და ნაწილს საერთოდ არ აქვს, მიტოვებულია და კაცი არ ჩანს პატრონი. დაგვპირდა დავით სიხარულიძე  (სოფლის დეპუტატი. ავტ.)_ მე ვარ პასუხისმგებელი, რომ გავაკეთებო, კრება აქ ჩაატარეს ამ უბანში რომ გაწვიმდება, ვერ გაივლი, ნიაღვარი გადმოდის. ერთი მანქანა ხრეში არ დაყარეს ამ გზაზე არც ერთმა მთავრობამ. მკვდარი გვყავდა ამ უბანში და ხრეში არ დაგვიყარა გამგებელმა. სოფლის მხარდამჭერი პროგრამით რა გაკეთდა, არ ვიცი, სად და რაში დახარჯეს? ვიცი, რომ არაფერი გაკეთებულა. არჩევნები რომ იწყებოდა, მაშინ ყველაფერის გაკეთებას დაგვპირდნენ, გაიარეს და წავიდნენ.

ვლადიმერ სურმავა: "ყველაზე დიდი პრობლემა ის არის, რომ გზა არ გვაქვს. ვერ მოხერხდა ამ გზის გაკეთება, გვპირდებიან, გვპირდებიან და არ ჩანს არაფერი. ჩვენც ამოგვივიდა ყელში უკვე. 10 წელია უკვე ვითხოვთ ამ გზის გაკეთებას, სოფლის მხარდამჭერი პროგრამის ფარგლებში. რა გაკეთდა არ ვიცი ნამდვილად, წყალი არ აქვს ზევით მოსახლეობას, 120 ოჯახიდან მხოლოდ 40 ოჯახს მიეწოდება. ხელით ეზიდება საცოდავი ხალხი  წყალს. პრობლემა რჩება ციტრუსის რეალიზაცია, არ გვაქვს გამრიცხველიანება" .

გიორგი ჩხარტიშვილი: "უშუქობა, უწყლობა, უგზოობა, უგაზობა _ მეტი რა გინდათ, ამაზე მეტი პრობლემა შეიძლება ჰქონდეს სოფელში ვინმეს?!  მობრძანდა ჩვენი "ოცნება", იყავით ახლა, "იოცნებეთ"! გზა გექნებათო, სად არის? წყალი გექნებათო, არ გვაქვს, გაზი ექნება ყველა ოჯახსო, სადაა, გეკითხებით? რაც დაგვპირდნენ, ყველაფერი მოგვატყუეს. სასაფლაოზე მიცვალებული ვერ აგვყავს, ესაა საქმე?  ყველაფერი გადათხრილია და მიტოვებული".

ბიჭიკო შეყილაძე: "ყველაფერი მაწუხებს! სახლი მე არ მაქვს და კარი. ორი წელია, ვითხოვ სახლის გადასახურავ მასალას და მატყუებენ, სახლში წყალი ჩამომდის, უკიდურესად გაჭირვებული ვარ, არავინ ყურადღებას არ მაქცევს, ოჯახში ყველა  შრომისუუნარო ვართ"

სოფელ ნატანებში ოზურგეთის მუნიციპალიტეტის გამგებლის წარმომადგენლის ილია თავაძის განცხადებით ე.წ. "ლეკურას" უბანში გზის სარეაბილიტაციო სამუშაოები მომავალ წელს აუცილებლად დაიწყება.

"კი, ბატონო, დავპირდით, მეც და ბატონმა დავით სიხარულიძემ მოსახლეობას წინასაარჩევნოდ, რომ გზის პრობლემას მოვუგვარებდით, მაგრამ არც არავინ მოგვიტყუებია. გზა იმიტომაა გადათხრილი, რომ გაზი უნდა შეიყვანონ, ეს არის მიზეზი. ელოდებიან დარებს, რომ გაგრძელდეს სამუშაოები. რაც შეეხება გზის კაპიტალურ შეკეთებას,  წელსაა პროექტში ჩასმული. გზა მთლიანად 232 ათასი ლარი ჯდება. ეს სამომავლოდ აუცილებლად გაკეთდება. ზეგ დაიწყება მოხრეშვა (საუბარი ჩაწერილია 16 ოქტომბერს. რედ.). წყლის მხრივ რთული მდგომარეობაა. ვეთანხმები მოსახლეობას, თითქმის, 70 პროცენტს არ აქვს, მაგრამ იწყება წყალთან დაკავშირებული სარეაბილიტაციო სერიოზული პროექტი და აუცილებლად ექნებათ", _ ამბობს ილია თავაძე.

ჩვენს კითხვაზე, თუ რატომ არ იცის ნატანების მცხოვრებლების უმეტესობამ, რა გაკეთდა 2015 წელს სოფლის მხარდამჭერი პროგრამის ფარგლებში ნატანებში, სოფლის რწმუნებული ამბობს, რომ ამის მიზეზი მოსახლეობის სახლებიდან გამოუსვლელობაა.

თუ როდის განახლდება ორმხრივი მოძრაობა შრომა-ნატანები-ურეკის 20-კილომეტრიან სახელმწიფო გზაზე, თავაძე გვპასუხობს, რომ საგზაო დეპარტამენტი საქმის კურსშია და სარეაბილიტაციო სამუშაოები რამდენიმე დღეში განახლდება.