ღია წერილი გურიის გუბერნატორს, ოზურგეთის მუნიციპალიტეტის საკრებულოს თავმჯდომარეს და ოზურგეთის მუნიციპალიტეტის გამგებელს!
ოზურგეთის მუნიციპალიტეტის სოფელ გურიანთის მცხოვრებთა განცხადება
როგორც ვიცით, გაზის ცენტრალური მილი სოფელ გურიანთაში გადის. გაზი ოზურგეთის მუნიციპალიტეტის სოფლებსა და მთლიანად ქალაქს ამ გაზსადენიდან მიეწოდება. უკვე რამდენიმე წელია, სოფელ გურიანთის მცხოვრებლები ვითხოვთ გაზის შემოსვლას, მაგრამ ჩვენი მოთხოვნა უყურადღებოდ რჩება. უფრო მეტიც _ წელს, როცა დაიწყო სოფლის გაზიფიცირება, აღმოჩნდა, რომ გაზი არ შემოვა ჩვენს უბანში _ “სიმონიშვილების” უბანში (აქ მცხოვრებთა უმეტესობა ამ გვარისაა და სოფელ ოზურგეთის საზღვარზეა).
რამდენიმე არჩევნებმა ჩაიარა დაპირებებით, რომ გვექნებოდა გაზი, მოწესრიგდებოდა შიდა გზები, დაიდგმებოდა სანაგვე ურნები, მაგრამ დაპირება დაპირებად დარჩა ჩვენთვის, თქვენთვის კი საარჩევნო ხმების განაღდებად.
კარგად გვახსოვს, წინასაარჩევნოდ, ბატონი ვალერი ჩიტაიშვილი როგორ შეხვდა სოფელ გურიანთის მოსახლეობას და ზემოთ აღნიშნული პრობლემების მოგვარებას შეჰპირდა, მაგრამ იმ დაპირებებიდან ერთიც კი არ გაუკეთებიათ ჯერ.
საინტერესოა, მომავალი არჩევნებისთვის რა დაპირებებს ამზადებენ, როცა წინა არჩევნების დანაპირები ჯერ შეუსრულებიათ?
ძალიან გთხოვთ, გაზეთ “გურია ნიუსის” რედაქციას, გაგვიწიეთ შუამავლობა იმ კომპეტენტურ ორგანოებთან, რომლებსაც ეხებათ ამ საკითხის მოგვარება. თუ თქვენ ვერ დაგვეხმარებით, ისღა დაგვრჩენია, პრეზიდენტს მივწეროთ!
განცხადებას ხელს აწერს 20 მოქალაქე
