ტელეკომპანია "რუსთავი-2"-ის ეთერში , გადაცემა "არჩევანში" საუბრისას ჟურნალისტმა ნანუკა ჟორჟოლიანმა იმ პერიოდზე ისაუბრა, როდესაც ტელეკომპანია ქიბარ ხალვაშს ეკუთვნოდა. ჟორჟოლიანმა ხალვაშს ტელეკომპანიიდან მაშინ თანამშრომლების გაშვების ფაქტი შეახსენა და წყნეთში ქიბარ ხალვაშთან შეხვედრის დეტალები გაიხსენა.
_ "მე მაშინ "რუსთავი2"-ში ვმუშაობდი როდესაც იყო ქიბარ ხალვაში და ქიბარ ხალვაში როდესაც დღეს საუბრობს იმაზე, რომ დაიცავს აქ მყოფ ადამიანებს პოლიტიკაში ჩარევისგან, ქიბარ ხალვაშ ავიწყდება ერთი რამ რომ ჩვენ გვახსოვს როგორ ვერ დაიცვა მან ამ არხის გენერალური დირექტორი ნიკა ტაბატაძე.
სწორედ ის ადამიანი, რომელიც მაშინ იყო სიტყვის თავისუფლების გარანტი ნებისმიერი აქ მომუშავე ადამიანისთვის და როდესაც ქიბარ ხალვაშს მაშინდელი ჟურნალისტები ეკითხებოდნენ, რატომ გაუშვა მან ნიკა ტაბატაძე სმს-ის საშუალებით სამსახურიდან, მას ელემენტარული პასუხიც კი არ ჰქონდა. ჩვენ მასთან ვიყავით სახლში, წყნეთის სახლში ვიმყოფებოდით, ძალიან ბევრი ჟურნალისტი, რომლებიც შემდეგ უკვე ყოველ დღე ტოვებდნენ ამ არხს.
რა მნიშვნელობა აქვს ვისი ზეწოლით მოხდა, რა მნიშვნელობა აქვს რომელი ხელისუფლების წნეხს ვერ გაუძლო ქიბარ ხალვაშმა და რა მნიშვნელობა აქვს რომელ ხელისუფლებას გაუცვალა ქიბარ ხალვაშმა ბიზნესში ტელევიზია. რა მნიშვნელობა აქვს, ეს პრეცედენტი ამ ტელევიზიას ერთხელ უკვე ახსოვს, რომ ქიბარ ხალვაშმა ვერ გაუძლო ცდუნებას," _ განაცხადა ნანუკა ჟორჟოლიანმა.
"გურია ნიუსი" კომენტარისთვის ქიბარ ხალვაშს დაუკავშირდა:
_მოკლედ ვიტყვი, რომ sms-ებით გაშვება გვარამიამ დანერგა, _ გვითხრა ხალვაშმა.
მისივე ინფორმაციით, ჟურნალისტები თავისი ნებით წავიდნენ:
_ ტაბატაძეს ორი საათი ველაპარაკე და ბოდიში მოვუხადე, რომ მიშას ულტიმატუმებს გირგვლიანის სასამართლოს შემდეგ ვუსმენდი და სხვა გამოსავალი აღარ მქონდა. ჟურნალისტებმა მხარი დაუჭირეს და თავისი ნებით წავიდნენ, ვერ შევინარჩუნე, _ აღნიშნა "გურია ნიუსთან" ინტერვიუში ქიბარ ხალვაშმა.
მისივე თქმით, სააკაშვილი მაშინ მოერია, თუმცა, "ომი მრავალი ბრძოლებისგან შედგება":
"სააკაშვილი ნიკას შეხვდა და უთხრა _ ქიბარი რომ გიშვებდა მე ვერ მითხარი, ჩვენ ხომ მეგობრები ვართო! ნიკამ უთხრა, რომ ქიბარმა მითხრა შენი ზეწოლის შედეგად მიიღო გადაწყვეტილებაო. მერე, კიდევ მე და მიშამ ისევ ვიომეთ მაგ თემაზე და ვუთხარი, რომ მის კაი კაცობას ჩემი მერჩივნა. ვაღიარებ რომ მაშინ მომერია, მაგრამ მაშინ. ომი მრავალი ბრძოლებისგან შედგება" _ ამბობს ქიბარ ხალვაში.
_ ბატონო ქიბარ, გვითხარით, რომ sms-ებით გაშვება ნიკა გვარამიამ დანერგა. იმ პერიოდში განვითარებულ მოვლენებთან გვარამია რა შუაშია?
_ სმს-ებით გაშვება ახალი სტრატეგია "რუსთავი 2" -ში ნიკა გვარამიას მოსვლის შემდეგ დაიწყეს. პიარადად ვიცი მასეთები, _ გვითხრა ხალვაშმა, თუმცა, კონკრეტიკას მოერიდა.
_ სახელებს ვერ ვიტყვი. თუმცა, ნამდვილად ვიცნობ სმს-ით გაშვებულებს, _ აღნიშნა ხალვაშმა.
"გურია ნიუსი" ასევე დაინტერესდა ვინ მიაჩნია ხალვაშს "ზონდერ ჟურნალისტებად", რომელთა სახლში გაშვებას აპირებს ტელევიზიის დაბრუნების შემთხვევაში:
_ ვისაც სურვილი აქვს და პროფესიონალია, ყველა იმუშავებს უნამუსოობის პრემიის გარეშე, _დასძინა ხალვაშმა.
როგორც ტელეკომპანია "რუსთავი 2"-ის ყოფილი მფლობელი ამბობს, ამ თემაზე ვრცელ განმარტებებს, მალე, საჯაროდ გააკეთებს.
