"გურია ნიუსის" წყაროს ინფორმაციით, ქალაქ ოზურგეთისა და ოზურგეთის მუნიციპალიტეტში დასაქმებულ საჯარო მოხელეებს, ასევე ა(ა).ი.პ თანამშრომლებს, უფროსებსა და მოადგილეებს, გურიის გუბერნატორის ინიციატივითა და დავალებით, გურიის ხელისუფლება კახეთის რეგიონიდან შემოტანილ ყურძნის შეძენას ავალდებულებს, რომელიც ოქტომბრის ხელფასზე უნდა გადაიხადონ.
"დაგვავალეს ყურძნის შეძენა, ამ თვის ბოლოს ხელფასზე თანხები დაგვექვითება, ძალიან ბევრი ბანკის ვალი გვაქვს, ან რატომ უნდა შევიძინოთ, იქნებ არ გვჭირდება? ეს ყველაფერი წინა წლებში საჯარო მოხელეებისთვის ჰიბრიდული სიმინდის იძულებითი შეძენას გვახსენებს " – გვითხრა რამდენიმე საჯარო მოხელემ და (ა)ი. პ.-ების თანამშრომლებმა.
"გურია ნიუსი" შეეცადა აღნიშნულ საკითხთან დაკავშირებით, გურიის ხელისუფლების პირველ პირებთან გადაემოწმებინა ინფორმაცია, მათ კატეგორიულად უარყვეს საჯარო მოხელეების მიერ იძულებით ყურძნის შეძენა.
ოზურგეთის მუნიციპალიტეტის გამგებელი მერაბ ჭანუყვაძე "გურია ნიუსთან" ამბობს, რომ არცერთ საჯარო მოხელეს ხელფასი ამის გამო არ დაქვითვია.
"მსგავსი რამ არ ყოფილა, არ ყოფილა ძალდატანებითი, არავის არავისთის არ უთქვამს, რომ გინდა თუ არა, უნდა შეიძინოთ ყურძენიო. ეს იყო უბრალოდ შეთავაზება, ჩვენ შეგვეძლო, როგორც რაიონს რეგიონისთვის თანადგომა გამოგვეცხადებინა. ასევე ვაპირებთ ციტრუსის სეზონზე ყველა რეგიონს გვერდით დადგომა ვთხოვოთ. აქ ვერაფერს ვხედავ საგანგაშოს, თუმცა ჯერ არ განხორცილებულა ოზურგეთის მუნიციპალიტეტიდან შესყიდვა. არცერთ საჯარო მოხელეს და ა.(ა)ი.პ. თანამშრომელს თანხა ხელფასიდან ამ კუთხით არ გადაუხდია, უბრალოდ ეს იყო კეთილი ნება და გვერდით დგომა კახეთის რეგიონისთვის, არცერთ საჯარო მოხელეს ხელფასი არ დაქვითვია"_ გვითხრა ჭანუყვაძემ.
ქალაქ ოზურგეთის მუნიციპალიტეტის საკრებულოს თავმჯდომარე გელა კობალაძე "გურია ნიუსთან" განმარტავს, რომ რადგან ქალაქ ოზურგეთის მუნიციპალიტეტს არ აქვს "რქაწითელის" ჯიშის ყურძენი, ამიტომ შეიძინეს ნებაყოფლობით.
"არანაირი დავალება არ ყოფილა, ოზურგეთის მერიამ და საკრებულომ თავისით გამოთქვა სურვილი, რომ დავხმარებოდით კახელ გლეხებს ყურძნის რეალიზაციაში. იცით, რომ ჩვენთან ყურძნის მოსავალი არ არის. ყოველ წელს ვყიდულობდი მე პირადად ყურძენს ბაზარზე და ამიტომ რადგან გაჩნდა იმის შესაძლებლობა, რომ კახელ გლეხებს მიეღოთ სარგებელი და ჩვენ შეგვეძინა პრუდუქცია, შევადგინეთ სია, ვის რამდენი კილო უნდოდა, ეს ხდებოდა სურვილისამბერ, საჭიროებისამებ, ამის მიხედვით ვიყიდეთ ყურძენი. არანაირი დავალება და მითითება არ ყოფილა"_ ამბობს კობალაძე.
გურიის გუბერნატორის გია სალუქვაძის თქმით, ყურძენი შეიძინეს არა მარტო საჯარო მოხელეებმა, არამედ ბიზნესმენებმაც.
"ჩვენი სურვილი იყო დავხმარებოდით კახეთის რეგიონს. აი, როგორც ჩვენ ციტრუსის რეალიზაცია გვჭირდება და შესაძლოა სხვა რეგიონებმაც წაიღონ. ჩვენ ვკითხეთ თავად მათ, კახელებს სჭირდებოდათ თუ არა ჩვენი დახმარება. მათი მხრიდან ამის დიდი სურვილი იყო, თუმცა იმ რაოდენობის ჩამოტანა მაინც ვერ მოახერხეს, სულ ჩამოვიდა ერთი თუ ორი მანქანა, იყიდეს არა მარტო საჯარო სამსახურებში დასაქმებულებმა, არამედ ბიზნესმენებმაც, რომლებსაც სჭირდებოდათ ყურძენი. მეც შევიძინე 100 კილო. ასე, რომ აბსურდია იმის მტკიცება, რომ ეს ვინმეს დავალებით მოხდა"- ამბობს გუბერნატორი.
