ჩოხატაურში, “პოლიტიკური კოალიცია ქართული ოცნების” ბანერი გასულ კვირას, იმ შენობაზე გააკრეს, სადაც კოალიციაში შემავალი სუბიექტების ოფისებია განთავსებული. “ქართული ოცნების” ოფისი, ოფიციალურად, ამ დრომდე არ გახსნილა. ჯერჯერობით უცნობია, ვინ იქნება პირველი კაცი კოალიციაში, თუმცა, როგორც წყარო ამბობს, ამ პოსტისთვის ბრძოლა უკვე დაწყებულია. უფრო მეტიც, “ქართული ოცნების” ჩოხატაურელი წარმომადგენლები, პირად საუბრებში ერთმანეთის მიმართ პრეტენზიებს აფიქსირებენ.
კოალიციის ერთ-ერთი წევრი ვახტანგ გაჩეჩილაძე, რომელიც ჩოხატაურის მუნიციპალიტეტის საკრებულოს წევრიცაა, ჩვენთან საუბრისას ამბობს, რომ დაპირისპირების შესახებ ინფორმაცია არ აქვს. გაჩეჩილაძემ არც ის იცის, ვინ იქნება “ქართული ოცნების” პირველი პირი ჩოხატაურში, თუმცა, იცის რაზე ოცნებობს და ისიც, როგორი გზით აპირებს ოცნებების ასრულებას.
_ ბატონო ვახტანგ, რაზე ოცნებობთ?
_ უკეთეს მომავალზე.
_ და ამ მომავალს “ქართულ ოცნებაში” ხედავთ?
_ რა თქმა უნდა. ეს არის კოალიცია, რომელსაც რეალურად შეუძლია საქართველოში პოლიტიკური ამინდის შეცვლა.
_ ბოლო დროს, კოალიცია ბევრმა ცნობილმა სახემ დატოვა. ბევრი კრიტიკა ისმის “გაერთიანებული” ლიდერების მისამართით და ჩნდება ლოგიკური ეჭვი, რომ ეს გაერთიანება არჩევნებამდე ვერ მიაღწევს…
_ შენიშვნები და კრიტიკა, რა თქმა უნდა, იქნება, როცა ასეთი დიდი კოალიციაა. როგორც წესი, ცდილობენ, რომ ყველას გაუხსენონ წარსულში დაშვებული შეცდომები, რომელიც არ არის დანაშაული. გემოვნებაზე არ დავობენ _ ზოგს ის პარტია მოსწონს და ზოგს ეს პარტია. მაგრამ ადამიანი, რომელსაც უნდა, რომ საქართველოში სიტუაცია რადიკალურად შეიცვალოს, უნდა მოერიდოს ცალკეული პერსონების კრიტიკას.
_ რას გულისხმობთ? ივანიშვილის ცნობილ გამონათქვამებს?
_ არა. მე ვგულისხმობ იმ სტატიების მთავარ გმირებს, რომლებიც ბოლო დროს კოალიციის ლიდერებს აკრიტიკებენ სხვადასხვა გაზეთების საშუალებით. ახლა არ არის იმის დრო, რომ კოალიციის ლიდერებს დარტყმა მივაყენოთ.
_ მართალია, საქმე დარტყმამდე არ მისულა, მაგრამ როგორც გვითხრეს, სერიოზული განხეთქილებაა “ქართული ოცნების” ჩოხატაურის ორგანიზაციაში. რა ვერ გაიყავით?
_ ჩემთვის ასეთი ფაქტი ცნობილი არ არის. ერთმანეთში გასაყოფი არაფერია _ ჩვენ ერთი საკეთებელი საქმე გვაქვს.
_ ის თუ არის თქვენთვის ცნობილი, რომ თქვენი კოლეგები ხელისუფლებასთან ალიანსში გდებენ ბრალს? მართალია, ამაზე საჯაროდ საუბარი არ სურთ, მაგრამ პირად საუბრებში ამბობენ, რომ თქვენ ის ოპოზიციონერი ხართ, რომელიც საკრებულოს სხდომებზე ხელისუფლების პოზიციას ყოველთვის ემხრობით.
_ თუ ვინმეს რაიმე პრეტენზია აქვს, მე უნდა მითხრას, თუ რაიმეს არასწორად ვაკეთებ, მიმითითონ და მასწავლონ. ეს უკეთესიც იქნება ჩემთვის.
_ მათი პრეტენზიები უსაფუძვლოა?
_ გააჩნია საკითხებს.
_ მაინც?
_ მე არ ვიცი რა ფაქტებზე საუბრობენ.
_ როცა ადგილობრივი ბიუჯეტის მიღებას მხარს უჭერთ, როცა ხელისუფლების ყველა წინადადებას ხელის აწევით ეთანხმებით ან თავს იკავებთ საკრებულოს სხდომებზე, თქვენს თანამებრძოლებს ეს ყველაფერი ეჭვს უჩენს, რომ ხელისუფლებასთან გარიგებული ხართ.
_ არის საკითხები, რომელსაც არ ვემხრობი. არის ისეთები, რომელზეც თავს ვიკავებ, რადგან გასარკვევია და არის საკითხები, რომელზეც შეიძლება იდავო. თუნდაც ის, რომ სამაშველო სამსახური უნდა შეიქმნას, სადავო არ არის და ბუნებრივია, რომ ამას მხარი დავუჭირე. არის ბიუჯეტში ხარჯვითი ნაწილები, რომლის განმარტება მოვითხოვე და რომელიც უახლოეს დღეებში დასაბუთებული უნდა მომცენ.
_ ბატონო ვახტანგ, ფიქრობთ, რომ იმ კადრებით, რომლებითაც დღეს ხართ წარმოდგენილები, ჩოხატაურში არჩევნების მოგებას შეძლებთ?
_ არჩევნებს ხალხი იგებს. ჩვენმა გუნდმა ხალხს უნდა აუხსნას, რატომ არ ვარგა ეს ხელისუფლება და უნდა დავარწმუნოთ, რომ ხალხი არჩევნებზე გავიდეს ყოველგვარი შიშის გარეშე და თავისუფლად გამოხატოს საკუთარი ნება. დარწმუნებული ვარ, რომ ქართველი ხალხი დაიღალა ამ ხელისუფლების ტყუილებით, დანაშაულებრივი ქმედებით და ვირტუალური ცხოვრებით. ხალხს სჭირდება რეალური შედეგი, რომელიც დადგება მაშინ, როცა ეს ხელისუფლება წავა და შეიცვლება.
_ ისიც ხომ რეალობაა, რომ იმ გუნდმა, რომელსაც თქვენ წარმოადგენთ, რამდენიმე არჩევნები წააგო…
_ ჩვენი გუნდის თითოეული წევრი მთელი გულით და სულით არის ჩართული ამ ხელისუფლების წინააღმდეგ მიმართულ პროცესებში. ისინი არ იშურებენ ძალღონეს, მაგრამ საყოველთაოდ ცნობილია, რომ დაწყებული 2008 წლის საპრეზიდენტო არჩევნებიდან, ყველა არჩევნები იყო გაყალბებული არა ყუთებთან, არამედ _ ყუთებამდე. მოსახლეობას აშინებდნენ, პირდებოდნენ და ზოგიერთს თანხებსაც ურიგებდნენ. ამ გუნდის თითოეულმა წევრმა ყველაფერი გაიღო საიმისოდ, რომ მაქსიმალური შედეგები ყოფილიყო. თუმცა, ამ ხელისუფლების ხელში და ამ კანონმდებლობით ყოველთვის რთული იყო არჩევნებში ჭიდილი. ხელისუფლება ხომ ყოველ წუთში ცვლის საარჩევნო კანონმდებლობას. განსაკუთრებით ამ ბოლოს, როცა პარტიულ დაფინანსებაში შეიტანეს კაბალური ცვლილებები,
_ საკმაოდ დაბალი პროცენტი ჰქონდა ბოლო არჩევნებზე ოპოზიციას. ხომ არ ფიქრობთ, რომ ამ შემთხვევაში გაყალბება გადაჭარბებული ნათქვამია?
_ არავითარ შემთხვევაში. ზუსტადაც რომ გაყალბების ბრალი იყო ეს შედეგები _ ტერორის, მუქარის.
_ კონკრეტული ფაქტები გაქვთ?
_ ეს უკვე წარსულია და მაგის დამტკიცება რთულია. არავინ არასდროს არ ლაპარაკობს იმაზე, თუ ვინ რა თანხა აიღო და ვინ ვინმე როგორ შეაშინა. ფაქტია, რომ შუაგანახლებაში და დაბლაციხეში ჩვენი გამარჯვების ყველაზე დიდი და რეალური შანსი იყო, მაგრამ ხელისუფლებამ მთელი თავისი რესურსი ჩართო ჩვენს წინააღმდეგ, განსაკუთრებით ამ ორი სოფლის მიმართულებით, რადგან ძალიან ძლიერი კანდიდატები გვყავდა.
_ იქნებ, არჩევნებში წარუმატებლობა იმ კადრების ბრალია, რომლითაც დღეს “ქართული ოცნება” ჩოხატაურშია წარმოდგენილი? ავტორიტეტი ხომ ბევრს ნიშნავს.
_ რა თქმა უნდა, ავტორიტეტი ბევრს ნიშნავს, მაგრამ კიდევ ერთხელ ვიმეორებ, რომ “ქართულ ოცნებაში” შემავალი პიროვნებები და სუბიექტები არიან გულწრფელნი, მებრძოლნი და საქართველოზე შეყვარებული ადამიანები, მათთვის სულერთი არ არის ხვალინდელი დღე.
_ საარჩევნოდ ფინანსები საკმარისად გექნებათ?
_ საარჩევნოდ გამოყოფილი თანხები კანონიერია. როცა საარჩევნო შტაბები იქმნება, ყალიბდება სტრუქტურა. ყველა დახარჯული თეთრი იქნება გამჭვირვალე. ამ ინფორმაციას თქვენც მიიღებთ. დასამალი არაფერია.
