21 ოქტომბერს ლანჩხუთში "ერთიანი ნაციონალური მოძრაობის" პარტიის ოფისთან განვითარებულ მოვლენებზე, რა დროსაც "ქართული ოცნების" აქტივისტებმა საპროტესტი აქციის მიმდინარეობისას ოფისში შესასვლელი რკინის კარი შეადუღეს, საკუთარი პოზიცია დააფიქსირეს მუნიციპალიტეტში მოქმედი პარტიების ხელმძღვანელებმა.
საყურადღებოა, რომ აქციის მონაწილეთა აბსოლუტური უმრავლესობა სხვადასხვა სამსახურებში დასაქმებული პირები იყვნენ.
აქციაზე იმყოფებოდა "საქართველოს პატრიოტთა ალიანსის" ადგილობრივი წარმომადგენლობის ხელმძღვანელი და თვითმმართველობის არჩევნებისას გამგებლობის კანდიდატი ბორის ჭყონიაც, როmel, ის სრულ მხარდაჭერას უცხადებს ლანჩხუთში განვითარებულ მოვლენებს და მიაჩნია, რომ დაუშვებელია ქვეყანაში ფუნქციონირების საშუალება ქონდეს ისეთ დანაშაულებრივ დაჯგუფებას, როგორიც "ნაციონალური მოძრაობაა".
''იმის გათვალისწინებით, რაც "ერთიანმა ნაციონალურმა მოძრაობამ" ცხრა წლის განმავლობაში ჩაიდინა, მართლაც სამარცხვინოა, რომ ამ პარტიას აქამდე ეძლევა ფუნქციონირების საშუალება. ვთვლი, რომ ამ დანაშაულებრივი პარტიული დაჯგუფების მოღვაწეობა საერთოდ უნდა აიკრძალოს ქვეყანაში და საამისოდ ნებისმიერი მეთოდი ჩემთვის მისაღებია. მეც ვიმყოფებოდი 21 ოქტომბერს ლანჩხუთში "ნაცმოძრაობის" პარტიის ოფისთან მიმდინარე აქციაზე და სოლიდარობასაც ვუცხადებ მის აქტივისტებს" -გვითხრა ჭყონიამ.
განსხვავებულ შეფასებას აძლევს ლანჩხუთში განვითარებულ მოვლენებს თავისუფალი დემოკრატების ადგილობრივი ორგანიცაზიის თავმჯდომარე ვახტანგ ზენაიშვილი. "ლანჩხუთში, სხვადასხვა სამსახურებში დასაქმებულმა "ოცნების" აქტივისტებმა "ნაციონალური მოძრაობის" ადგილობრივი ორგანიზაციის ოფისის კარი, ვინაიდან რკინის იყო და ვერ "აჭედავდნენ", ინოვაციური მეთოდით, ერთ–ერთი ა(ა)იპ–ის კუთვნილი "სვარკის" აპარატის გამოყენებით დაადუღეს. ამ უმსგავსობაზე ერთი შემიძლია ვთქვა: ძალიან მძიმე საყურებელია ბრბოდ ქცეული ბნელი ადამიანები, პრიმიტიული ინსტინქტებითა და ინტერესებით. ამ ველურობის წახალისება გადაიყოლებს „ოცნებას", -ამბობს ზენაიშვილი.
"ქართული ოცნების" ლანჩხუთის ორგანიზაციის ხელმძღვანელმა და ამავდროულად საკრებულოს თავმჯდომარემ გოგი ხელაძემ არ ისურვა განვითარებულ მოვლენებზე კომენტარის გაკეთება- "როცა ეს მოვლენები განვითარდა, ლანჩხუთში არ ვიმყოფებოდი და თავს შევიკავებ შეფასებებისგან."
"დემოკრატიული მოძრაობის" ადგილობრივი წარმომადგენლობის ხელმძღვანელი ნონა მურვანიძე ჩვენთან საუბარში აღნიშნავს, რომ მისთვის ნებისმიერი ძალადობა, ვინც არ უნდა იყოს ადრესატი, დასაგმობია.
"ნაციონალური მოძრაობა", როგორც რეჟიმი 2012 წლის არჩევნებზე დამარცხდა, რასაც უნდა მოჰყოლოდა დამნაშავეთა სამართლებრივი გზით გასამართლება და არა ასე ბარბაროსული ქმედებებით", – აღნიშნა მურვანიძემ.
პარტია კონსერვატორების სახელით კომენტარი გააკეთა საკრებულოს წევრმა ალექსანდრე მახათაძემ- "მთლიანად ქვეყანაში მიმდინარე პროცესებიდან გამომდინარე მოხდა ის, რაც მოხდა. რა თქმა უნდა, არ არის მისაღები ამგვარი ხერხებით ბრძოლა, მაგრამ, როგორც ჩანს, გარკვეული ადამიანების კატეგორიას აქვს უკმარისობის გრძნობა და ამ ფორმით ცდილობენ დაუპირისპირდნენ იმ პოლიტიკურ ძალას, რომელსაც არ აქვს უფლება აქეთ უკითხოს მორალი საზოგადოებას".
ლანჩხუთში "რესპუბლიკელთა" წარმოამდგენელი რომან ბიწაძე კატეგორიულად ემიჯნება ''ნაცმოძრაობის" ოფისთან განვითარებულ მოვლენებს და აცხადებს, რომ აქცია არ იყო კოალიციის მიერ ორგანიზებული.
"პირველ რიგში, მინდა ღმერთს მადლობა ვუთხრა, რომ მოვლენები უფრო სერიოზულ ექსცესებში არ გადაიზარდა და შეიძლება ითქვას, მშვიდობიანი დასასრული ქონდა. მთელი პასუხისმგებლობით მინდა განვაცხადო, რომ ამ აქციასთან არანაირი კავშირი არ აქვს კოალიციას და მასში შემავალ ცალკეულ სუბიექტებს. მე პირადად წინააღმდეგი ვარ ყოველგვარი ძალადობის. ჩემი აზრით, დღევანდელმა ხელისუფლებამ საკუთარი მუშაობით უნდა მოახერხოს, ისე რომ "ნაციონალების" კარგიც და ცუდიც ხალხს დაავიწყოს.
ჩემი გადმოსახედიდან ლანჩხუთში განვითარებული მოვლენები იყო გამოძახილი მთლიანად ქვეყანაში მიმდინარე პროცესების და ვფიქრობ, ამ აქციამ ნაწილობრივ მაინც მოახდინა ნაციონალური მოზრაობის რეაბილიტირება".- განაცხადა ბიწაძემ.
