ლარის კურსის ვარდნამ და ეკონომიკურმა პრობლემებმა დიდი გავლენა მოახდინა სამომხმარებლო ბაზარზეც. პროდუქტების ფასის ზრდამ დააზარალა როგორც მოვაჭრეები, ასევე მომხმარებლებიც. მოსახლეობის უმეტესი ნაწილი ფიქრობს, რომ პროდუქტის ფასი ისევ მოიმატებს და ეს არსებულ მდგომარეობას მეტად გაამწვავებს. გარდა ამისა, დღეისათვის, საქართველოში არ არის ის ფინანსური მდგომარეობა, რომ მოქალაქემ შეძლოს იმ პროდუქტების შეძენა, რომელიც საარსებოდაა საჭირო.
მოვაჭრეები მთავარ პრობლემას იმაში ხედავენ, რომ მთავრობა არ ზრუნავს მოქალაქეებზე და არაფერს არ აკეთებს იმისთვის, რომ ქვეყანაში მდგომარეობა გაუმჯობესდეს. მათი თქმით, ფასების ზრდასთან ერთად მომხმარებლების რაოდენობამაც საგრძნობლად იკლო და, შესაბამისად, ფინანსური მდგომარეობა გაუარესდა.
"გურია ნიუსი" დაინტერესდა რამდენად აისახა ლარის კურსის ვარდნა პროდუქტების ფასებზე და თბილისში, ე.წ. დეზერტირების ბაზარში, შერჩევითი მეთოდით როგორც მოვაჭრეები, ასევე მომხმარებლები გამოკითხა:
მიხეილ ივანაური, გარემოვაჭრე: ბაზარზე დღეს ძალიან ცუდი მდგომარეობაა, მთელი დღის განმავლობაში მხოლოდ 3 კილოგრამი კარტოფილი გავყიდე, ამ თანხით სახლში საჭმელი მივიტანო თუ მედიკამენტი ვიყიდო? მითხარით, რა გავაკეთო ამ ორი კაპიკით?!".
ნათელა ბერიძე, ბოსტნეულით მოვაჭრე: "საერთოდ აღარ აქვს აზრი, მგონი, ამ თემაზე ლაპარაკს, მთავრობა მაინც არაფერში არ გვეხმარება და რა აზრი აქვს? დღეს არაფერი გამიყიდია, გუშინდელი ღამენათევი დღეს აქ მთელი დღე ფეხზე ვდგავარ რომ რაღაც გავყიდო, მაგრამ ისე გააძვირეს ყველაფერი ხალხს არა აქვს იმის საშუალება რომ იყიდოს რამე".
თამაზ როსტომაშვილი, მოვაჭრე: "უკიდურესი მდგომარეობა გამოიწვია ლარის ვარდნამ ბაზარზე, ჩვენ თვითონაც აღარ გვაქვს უკვე იმდენი საშუალება რომ პროდუქტი შევიძინოთ და მომხმარებელს მივაწოდოთ".
ქეთევან დევიძე, მყიდველი: "ძალიან უკმაყოფილო ვარ მომატებული ფასებით, შეიძლება დღეში რამდენიმე თეთრი არაფერს ნიშნავდეს, მაგრამ საერთო ჯამში საშუალო და დაბალი ფენის ადამიანებისთვის, ასეთი ეკონომიკური მდგომარეობის მქონე ქვეყანაში, თითოეულ პროდუქტზე მომატებული თუნდაც რამდენიმე თეთრი, ბევრს ნიშნავს".
დემო დემურაშვილი, მომხმარებელი: "კატასტროფაა, მსგავსი რამ არსად არ ხდება, იმის იმედი გვქონდა, რომ ყველაფერი უკეთესობისკენ შეიცვლებოდა, მაგრამ მდგომარეობა ბევრად გაუარესდა. დროა ხალხი გამოფხიზლდეს და გამოვიდეთ ჩვენი ქვეყნის გადასარჩენად".
გამოკითხვის შედეგად დადგინდა, რომ როგორც მოვაჭრეების, ასევე მომხმარებლების ისედაც ცუდი ფინანსური მდგომარეობა ბევრად გაუარესებულია, რაც თითოეულ მოქალაქეზე აისახება.
