“კონტროლის პალატამ ან აგვიხსნას რა ხდება, ან კონკრეტული ფაქტები დადოს!”

ყველაზე პრობლემატური 26-ე პრიმა მუხლი მთელი დატვირთვით შევიდა ძალაში. შეგახსენებთ, რომ ამ მუხლის თანახმად, რა შეზღუდვებიც უწესდება პარტიას, იგივე შეზღუდვები მოქმედებს სხვა სუბიექტებზეც. ეს სუბიექტები არიან იურიდიული და ფიზიკური პირები, რომლებიც დაკავშირებულები არიან პარტიასთან პირდაპირ ან არაპირდაპირ.

უკვე მეორე დღეა, გამგეობების წინ კონტროლის პალატის უწყებით დაბარებული ადამიანების ცოცხალი რიგები დგას. მედიის წარმომადგენლებს აკრძალული აქვთ შენობაში შესვლა. ამ საკითხთან დაკავშირებით “გურია ნიუსმა” კომენტარის გაკეთება თხოვა “ახალი მემარჯვენეების” ერთ-ერთ ლიდერს, ლევან კალანდაძეს.

_ ბატონო ლევან, რა კომენტარს გააკეთებდით იმ მასიურ დაკითხვასთან დაკავშირებით, რომელსაც კონტროლის პალატა უკვე ორი დღეა უწყვეტ რეჟიმში ახორციელებს?

_ ნამდვილად არ ვიცი, რას ითხოვს კონტროლის პალატა, მაგრამ ფაქტი ისაა, რომ ამ ყველაფერს პოლიტიკური ელფერი დაკრავს და ემსგავსება გარკვეულ პოლიტიკურ ორგანიზაციებზე ზეწოლის ფაქტებს. ბუნებრივია, ეს ძალიან უსიამოვნო პრეცედენტებია.

მე მესმის კონტროლის პალატის არგუმენტები იმასთან დაკავშირებით, რომ მათ სურთ ფულის გათეთრებასთან დაკავშირებით ყველა ოპერაცია და ტრანზაქცია კონტროლის ქვეშ ჰქონდეს, მაგრამ თუ გავითვალისწინებთ იმას, ეს ყველაფერი პოლიტიკურ პარტიებთან დაკავშირებულ საქმიანობას უკავშირდება, გარკვეულ უხერხულობებს ნამდვილად იწვევს. კონტროლის პალატას აქვს იმის საშუალება და ყველა ბერკეტი, რომ ყოველგვარი დაბარებების გარეშე გააკონტროლოს ის ტრანზაქციები, რომელსაც ესა თუ ის პოლიტიკური პარტია თუ პოლიტიკურად აქტიური პირი ახორციელებს და მხოლოდ ამის შემდეგ მოხდეს რეგიონებში ადამიანების დაბარება და მათი დაკითხვა.

_ კონტროლის პალატა მხოლოდ პოლიტიკურად აქტიურ სუბიექტებს არ იბარებს. დაბარებულია “გურია ნიუსის” დანფუძნებლის, ია მამალაძის ძმაც, რომელიც პროფესიით ექიმია და არანაირ პოლიტიკურ აქტივობაში არ არის ჩართული.

_ ეგ ძალიან უცნაური ფაქტია და სამართლიანად იწვევს შეშფოთებას საზოგადოებაში _ როგორც პოლიტიკურ წრეებში, ასევე იმ ადამიანებში, რომლებიც პოლიტიკასთან საერთოდ არანაირ კავშირში არ არიან. კონტროლის პალატამ ამასთან დაკავშირებით განმარტებები უნდა გააკეთოს და აუხსნას საზოგადოებას, რას ნიშნავს ეს ყველაფერიAან გააქარწყლონ ეჭვები, რომელიც საზოგადოებაში არსებობს და თუ კონკრეტული ფაქტები აქვს, რომელიც სამართალგადაცდომას უკავშირდება, დაასახელოს. ამ ყველაფერმა უკვე პერმანენტული ხასიათი მიიღო და თანაც საკმაოდ ბუნდოვანი ფორმით.