თითქმის სამი საათია, კოალიცია “ქართული ოცნების” ორი აქტივისტი, კონტროლის პალატას დაკითხვაზე ჰყავს. დაკითხვა ჩოხატაურის მუნიციპალიტეტის ადმინისტრაციულ შენობაში მიმდინარეობს.
ჯერჯერობით მხოლოდ ერთი მოქალაქე, ეროვნული ფორუმის წარმომადგენელი, თამაზ ჯინჭარაძე გამოვიდა დაკითხვიდან. მისი თქმით, კონტროლის პალატის წარმომადგენლები ინტერესდებიან, როგორ გაკეთდა ივანიშვილის მოქალაქეობის აღდგენის ხელმოწერები. მისივე თქმით, მათ აინტერესებთ, გადაუხადეს თუ არა ამაში მოქალაქეებს თანხა.
შენობაში არ უშვებენ ჟურნალისტებს. ჩვენ დილის შემდეგ ვცდილობთ გამგეობის შენობაში შესვლას. დღეს, საკრებულოს სხდომა 2 საათზე უნდა გამართულიყო, თუმცა, როგორც საკრებულოს პრესსამსახურის ხელმძღვანელმა, მზია სიხარულიძემ გვითხრა, გადაიდო. სიხარულიძის განმარტებით, გადადების მიზეზი ერთი საკითხის დაუზუსტებლობა გახდა, თუმცა, რომელი საკითხის, პრესსამსახურის ხელმძღვანელს არ დაუკონკრეტებია.
სიხარულიძეს არ აქვს პასუხი კითხვაზე, რატომ არ გვიშვებენ შენობაში ჟურნალისტებს. ამ კითხვაზე პასუხი, არც მუნიციპალიტეტის გამგებელს, ლელა იმედაშვილს გააჩნია. ჩვენს სატელეფონო ზარებს არ პასუხობს საკრებულოს თავმჯდომარე ანტონ ხუნდაძე; ყურმილს არც გურიის გუბერნატორის მოადგილე, ლელა თავართქილაძე იღებს.
ჩვენ დილის შემდეგ ვცდილობთ გამგეობის მისაღებში განცხადების დატოვებას, თუმცა, დაცვის პოლიცია არც ამის საშუალებას გვაძლევს.
გურიის გუბერნატორის, ვალერი ჩიტაიშვილის თქმით, განცხადების დატოვებაზე პრობლემა არავის ექმნება, თუმცა, ფაქტია, რომ “გურია ნიუსს” ამის საშუალებას არ აძლევენ.
აღსანიშნავია, რომ გამგეობის მისაღები, რომელიც “ღია კარის” პრინციპით არის გაკეთებული, იუსაიდის დაფინანსებულია და იმისთვის გაკეთდა, რომ მოქალაქეებს ხელისუფლებასთან ურთიერთობა გაუადვილონ, თუმცა, როგორც აღვნიშნეთ, ჩვენთვის გამგეობის მისაღებში შესვლა დილიდან შეუძლებელია.
დაცვის პოლიციის თანამშრომლები არ გველაპარაკებიან, შესაბამისად, გაურკვეველია, რატომ არ გვიშვებენ შენობაში, სადაც გამგეობა, საკრებულოს და საგანმანათლებლო რესურსცენტრია განთავსებული.
ამ წუთებში დაკითხვას კიდევ 5 მოქალაქე ელოდება.
როგორც შევიტყვეთ, დაკითხვის ოთახში დაცვის უპრეცედენტო ზომებია მიღებული და შიგ შესვლამდე ადამიანებს საფუძვლიანად ჩხრეკენ _ ტანსაცმელს და ფეხსაცმელსაც კი ხდიან.
ამ წუთებში დაკითხვიდან გამოვიდა ბექა შენგელია. მისი თქმით, დაკითხვა კონტროლის პალატის წარმომადგენელმა, ვინმე გაგამ, თავიდან ადვოკატის გარეშე დაუწყო:
_ მთხოვდა, რომ დამეწერა ხელწერილი, რომელშიც მითითებული იქნებოდა, რომ მე არ ვითანამშრომლებდი პოლიტიკურ პარტიებთან. მთხოვდა თანამშრომლობას და იმის დაწერას, ვინ აგროვებდა ხელწერებს და ვინ რამდენი თანხა აიღო, _ გვითხრა შენგელიამ.
მისივე თქმით, რომ არა ადვოკატი, რომელიც რამდენიმე წუთის შემდეგ შეიყვანეს ოთახში, ფსიქოლოგიური ზეწოლა ძლიერი იქნებოდა.
როგორც შენგელიამ გვითხრა, დაკითხვა, რომელიც თითქმის სამი საათის განმავლობაში გრძელდებოდა, მხოლოდ ერთ კონკრეტულ საკითხს _ ივანიშვილის მოქალაქეობის აღდგენის მოთხოვნით გაკეთებულ ხელმოწერებს ეხებოდა.
