მხოლოდ ერთ დღეში, საქართველოს რეგიონების მასშტაბით, კონტროლის პალატის უწყება საქართველოს 400-მდე მოქალაქეს მიუვიდა.
ტექსტი, რომლითაც კონტროლის პალატა კონკრეტულ ფიზიკურ პირს იბარებს, თავისი შინაარსით ძალიან ჰგავს პროკურატურის უწყებას და ასე გამოიყურება:
“საქართველოს კონტროლის პალატის პოლიტიკური პარტიების ფინანსური მონიტორინგის სამსახურში, პოლიტიკური სუბიექტების მოჩვენებითი, თვალთმაქცური გარიგების გზით დაფინანსების ფაქტზე ადმინისტრაციული წარმოება მიმდინარეობს, რასთან დაკავშირებითაც დაბარებული ხართ ახსნა-განმარტების მისაცემად.
კითხვები, რომელსაც კონტროლის პალატის სახელით სვამენ, ძირითადად, ივანიშვილის მოქალაქეობას და ფინანსებს შეეხება: _ რამდენი აიღე ხელწერების შეგროვებისთვის? გაზეთ “ქართულ ოცნებას” რომ არიგებ, ამისთვის რამდენ ლარს გიხდიან? რამდენი გადმოერიცხა პარტიას? რამდენია თქვენს მუნიციპალიტეტში ოპოზიციური პარტიის წევრი? რამდენი ხელწერა შეაგროვეთ? ვინ და რამდენ ეგზემპლარს ავრცელებს გაზეთ “ქართულ ოცნებას?”
მიმდინარე მოვლენებთან დაკავშირებით “გურია ნიუსი” ფრაქცია “ერთობა სამართლიანობისთვის” თავმჯდომარეს, დიმიტრი ლორთქიფანიძეს ესაუბრა.
დიმიტრი ლორთქიფანიძე: “დღეს პარლამენტის სხდომაზე გავაკეთე განცხადება იმ უკანონო ქმედებებთან დაკავშირებით, რასაც ადგილი აქვს კონტროლის პალატის ფინანსური მონიტორინგის სამსახურის მხრიდან. საზოგადოების წარმომადგენლებს რეგიონების მასშტაბით იბარებენ. ფაქტობრივად, მათ ბრალდებებს უყენებენ, როგორც ამა თუ იმ ორგანიზაციასთან დაკავშირებულ პირებს. შესაბამისად, მცდელობა აქვთ, რომ მათზე მოახდინონ ფსიქოლოგიური ზეწოლა. საქართველოს მასშტაბით, მარტო ერთ კვირა დღეს, 400 ადამიანი დაიბარეს. ამ ყველაფერს მხოლოდ ის დატვირთვა აქვს, რომ მოქალაქეები არ ჩაერთონ არანაირ პოლიტიკურ საქმიანობაში. უკრძალავენ მათ გაზეთების გავრცელებას, აგიტაციას და ნებისმიერი სახის სამოხალისეო საქმიანობას, რაც კანონით არ არის აკრძალული. ასეთი საქმიანობა თავისი შინაგანი რწმენიდან გამომდინარე, ნებისმიერ მოქალაქეს შეუძლია განახორციელოს. ჩოხატაურსა და ლანჩხუთში მიმდინარე მოვლენებიც სწორედ ფსიქოლოგიურ ზეწოლას ისახავს მიზნად.
ამ წუთებისთვის, გია ცაგარეიშვილი წყალტუბოშია წასული, სადაც ანალოგიურ ფაქტებს აქვს ადგილი და მალე იქედანაც მივიღებთ ინფორმაციებს.
_ კონტროლის პალატის უწყება მიიღეს იმ ადამიანებმაც, რომლებიც არანაირ პოლიტიკურ აქტივობებში არ არიან ჩართულები და, მით უმეტეს, არ განუხორციელებიათ რაიმე სახის გადარიცხვა.
_ სწორედ მაგაზე მაქვს საუბარი, რომ იბარებენ იმ პირებს, რომელთაც არანაირი დაკავშირებულობის სტატუსი არ გააჩნიათ. იმ 26-ე პრიმა მუხლთან, რომელიც გულისხმობს მონიტორინგის ქვეშ იმ იურიდიული და ფიზიკური პირების მოქცევას, რომლებიც შემომწირველები არიან, გამგეობებში დაბარებული ადამიანები არანაირ კავშირში არ არიან. შესაბამისად, ამ ადამიანების დაბარების არანაირი ფორმალური და სამართლებრივი საფუძველი არ არსებობს.
ამიტომ, ჩვენ პროტესტს გამოვთქვამთ და 20 მარტს, კონტროლის პალატის თავმჯდომარეს, ლევან ბეჟაშვილს ვიბარებთ პარლამენტში შესაბამისი შეკითხვებით, რომელიც სწორედ ამ კანონს და მისი ამოქმედების მექანიზმებს ეხება.
