ოზურგეთის ალ.წუწუნავას სახელობის სახელმწიფო თეატრში ქალაქ ოზურგეთის მუნიციპალიტეტის მერმა, ბეგლარ სიორიძემ, გაწეული საქმიანობის ერთი წლის ანგარიში საკუთარ ამომრჩევლებსა და ფართო საზოგადოებას წარუდგინა.
მან თავისი გამოსვლის წინ აღნიშნა, რომ ასრულებდა თვითმმართველობის კანონით გათვალისწინებულ მოთხოვნას ამომრჩევლისთვის ანგარიშის ჩაბარების შესახებ; მისი თქმით, აქ არავინ ყოფილა მოწვეული ბარათებით და ძალდატანებით, რომ მას არ სურს ეს შეხვედრა პლენუმს დაემსგავსოს. მერის სურვილია, შეხვედრა მხოლოდ საქმიანი იყოს, რადგან ის გაწეული მუშაობის შესახებ კონკრეტული ფაქტებით ისაუბრებს.
ანგარიშის წარდგენისას ბეგლარ სიორიძემ ისაუბრა, რომ ძირითადად მერიის მუშაობა ეფუძნება მოქალაქეთა მოთხოვნების გათვალისწინებას, ეს არის პრიორიტეტი და მოქალაქეთა პრობლემების გადაჭრა ხდება კანონსა და ფინანსებთან შესაბამისობაში. 2015 წელს სოციალური სფეროს მიმართულებით ბიუჯეტიდან გაიცა 403256 ლარი. ხოლო ქალაქის ტერიოტორიაზე მცხოვრებ 1633 მოქალაქეს გაეწია დახმარება.
ზოგადად, მერის ანგარიშიდან ჩანდა, რომ ქალაქის მერიის საქმიანობის ძირითადი პრიორიტეტებია სოციალური მიმართულებები; ასევე, განსაკუთრებით მასშტაბური და უპრეცენდენტო ინფრასტრუქტურული პროექტების განხორციელება.
ბეგლარ სიორიძემ დეტალურად მიმოიხილა ერთი წლის მანძილზე ქალაქ ოზურგეთის მერიაში შემუშავებული და გახორციელებული 10 სოციალური პროგრამა:
შეჭირვებულ მოქალაქეთა სამედიცინო დახმარების, იძულებით გადადგილებულ პირთა ერთჯერადი დახმარების, მძიმე საცხოვრებელ პირობებში მყოფი ოჯახების, ხანდაზმულთა ერთჯერადი მატერიალური დახმარების, უსინათლო მოქალაქეთა ერთჯერადი დახმარების, თირკმლის უკმარისობით დაავადებულ პირთა ერთჯერადი დახმარების , დედ – მამით ობოლი, 18 წლამდე ასაკით ბავშვთა ერთჯერადი დახმარების, მრავალშვილიანი ოჯახების სოციალური დახმარების, ვეტერანთა ერთჯერადი მატერიალური დახმარების და ვეტერანთა სარიტუალო დახმარების პროგრამა.
ოზურგეთის მერმა ხაზგასმით აღნიშნა, რომ ყველაზე მნიშვნელოვანია მერიის მიერ გახორციელებული უპრეცენდენტო და მასტაბური პროექტები.
"მერიის ფორმირების პროცესის პარალელურად ქალაქის სახეს წარმოადგენდა მოუწესრიგებელი ქუჩები, ამორტიზირებული მიწისქვეშა კომუნიკაცია, სიძველით დაზიანებული და ფუნქციადაკარგული შენობები ქალაქის ცენტრში. სწორედ ამიტომ ხელისუფლებამ საბიუჯეტო სახსრების დიდი ნაწილი ამ პრობლემების გადჭრისკენ მიმართა. ქალაქის მერიამ დაამთავრა გარდამავალი ინფრატრუქტურული პროექტები, 1 536 300 ლარის ღირებულებით, რომელიც რეგიონული განვითარების ფონდიდან ფინანსდებოდა. ქალაქ ოზურგეთის მერიის მიერ კი 2015 წლის განმავლობაში ინფრასტრუქტურული პროექტების გახორციელებაზე 7 241 556 ლარი დაიხარჯა,"_ თქვა სიორიძემ.
როგორც ოზურგეთის მერმა განმარტა, ქალაქის 15 ქუჩაზე გზის მოასფალტება, ჭავჭავაძის და რუსთაველის ქუჩაზე ოთხი მრავალბინიანი საცხოვრებელი სახლების, ეზოების კეთილმოწყობის სამუშაოები, უსახლკაროთა თავშესაფრის შენობის რეაბილიტაცია, რომელიც 60 უსახლკარო ოჯახისთვის რემონტდება და ისინი აქ ერთი თვის შემდეგ შევლენ, ძალზედ მნიშვნელოვანია.
მისივე თქმით, სრული რეაბილიტაცია ჩაუტარდა ქალაქის ცენტრალურ ნაწილს და მიმდებარე ნაწილს, რის გამოც წელს პირველად ქალაქის ცენტრის დატბორვა არ მომხდარა. ეს შედეგი კი დადგა იმით, რომ გურიის და აღმაშენებლის ქუჩაზე სანიაღვრე არხები გაკეთდა, ყაზბეგის ქუჩის მიმდებარედ კი მდინარე აჭისწყლის გასწორხაზოვნება და გაბიონების მოწყობა მოხდა. 12 ობიექტზე _ ქალაქის ქუჩებსა და მდინარების ნაპირებზეგ აკეთდა სანიაღვრე არხები და ნაპირდამცავი ჯებირები თუ ბეტონის კედლები. რაც შეეხება საკუთრივ ოზურგეთის ბიუჯეტს, ინფრასტრუქტურული ობიექტების მშენებლობა-რეაბილიტაციისთვის იხარჯება 828 618 ლარი. 2015 წლის ოქტომბრის მდგომარეობით 16 ქუჩაზე დასრულებულია საცხოვრებელი სახლების წინა და გვერდითი ფასადების, კაპიტალური შეკეთების, სახურავების რეაბილიტაციის, წყალგაყვანილობის შიდა ქსელის, მილგაყვანილობის და არხის მოწყობის, ლიფტის უჯრედის სახურავის, ბაზრის ფასადის რეკონსტრუქციის სამუშაოები.
"ერთ – ერთი ძალიან მნიშვნელოვანი პროექტი, რომლის დაწყებასაც ქალაქის დიდი ნაწილი ელოდებოდა, არის წყლის სისტემის რეაბილიტაცია. პროექტი ყველა ცენტრალურ ქუჩას მოიცავს, თითოეულ აბონენტს წყლის მილი მიუვა და და 2016 წლის ბოლომდე დასრულდება," _ თქვა სიორიძემ.
ოზურგეთის მერი ანგარიშის წარდგენისას გენდერულ თემასაც საგანგებოდ შეეხო.
როგორც სიორიძემ აღნიშნა, განსაკუთრებით გამოირჩევა ქალაქის მერიის კულტურის, განათლებისა და გენდერული თანასწორობის სამსახურის ( უფროსი მარინა ჯაფარიძე) საქმიანობა. მიმდინარე წელს ამ სამსახურმა საქართველოს პარლამენტის გენდერული საბჭოსა და გაეროს ეგიდით გამოცხადებულ კონკურსში "გენდერული ბიუჯეტის დაგეგმვისათვის" უმაღლესი ჯილდო მიიღო.
საანგარიშო სიტყვის დასასრულს ოპოზიციონერმა დეპუტატმა ნათია შარაშენიძემ სიორიძეს მიმართა: "თქვენ ხართ მერი, რომელსაც აქვს ბიუჯეტი, რომლის 97% სახელფასოა, ხოლო 3% ეკუთვნის სოციალურად დაუცველებს…", რაზეს ოზურგეთის მერმა უპასუხა: "როცა საკრებულოს სხდომაზე მე თქვენს კითხვებს ვპასუხობ, სულ გარბიხართ. ახლა გიპასუხებთ, _ თქვენ რომ შეგეძლოთ ბიუჯეტის წაკითხვა, გეცოდინებათ, რას წარმოადგენს იგი", _ აღნიშნა სიორიძემ.
"გასაგებია, რომ თქვენ არ გსურთ ჩემი მოსმენა, მაგრამ მაინც მოგიწევთ", _ განაცხადა შარაშენიძემ და დარბაზი დატოვა.
დასასრულ ბეგლარ სიორიძემ ამომრჩევლებს აღუთქვა, რომ მისი უფლებამოსილების პერიოდში ოზურგეთი ერთ – ერთი სამაგალითო ქალაქი გახდება.
ქალაქ ოზურგეთის მერის ანგარიშს ესწრებოდნენ: ოზურგეთის მაჟორიტარი დეპუტატი, უმრავლესობის ლიდერი საქართველოს პარლამენტში ზვიად კვაჭანტირაძე, პარლამენტარები: თამაზ მეჭიაური, თემურ ჭკუასელი და ოთარ ებანოიძე. სახელმწიფო რწმუნებული – გუბერნატორი გურიის მხარეში გია სალუქვაძე და ოზურგეთის მუნიციპალიტეტის გამგებელი მერაბ ჭანუყვაძე.
(R)
