გამოკითხვა _ უნდა ვრცელდებოდეს თუ არა წამების ამსახველი კადრები ტელევიზიით და ინტერნეტით?

თინა კილასონია:

_ არავითარ  შემთხვევაში. ეს ყველაზე ძალიან ცუდად მოქმედებს და არ  უნდა ვრცელდებოდეს.

ლელა ნამორაძე:

_ ძალიან ცუდად მოქმედებს. საერთოდ არ უნდა მოხდეს ასეთი რამ. და როცა არსებობს ასეთი კადრები და ავრცელებენ, გამაღიზიანებელია ეს ხალხისთვის.

ვერა დოლიძე:

_ უნდა აჩვენონ ხალხს, რა ხდება. ეს ცუდად მოქმედებს ადამიანებზე, მაგრამ, სიმართლე ყველამ უნდა იცოდეს.

ვალენტინა ელიეშვილი:

_ ეს ცუდად მოქმედებს ხალხზე და არ უნდა ვრცელდებოდეს.

ნოდარ ურუშაძე:  

_ ეს რა ვაჟკაცობაა?! იმის ტირაჟირება,  რაც მოხდა ციხეებში, ნამდვილად არ არის საჭირო. 86 წლის კაცი ვარ და ასეთი არაფერი მინახავს. ყველას მოვუწოდებ, რომ ნუ აჩვენებენ ასეთ კადრებს _ ისედაც ვიცით, რა მოხდა ცხრა წლის განმავლობაში.

ნათელა კალანდაძე:

_ აუცილებლად უნდა გავიდეს ტელევიზიით წამების ამსახველი კადრები, რადგან ყველამ უნდა იცოდეს სიმართლე, რა მოხდა "ნაცმოძრაობის" დროს.

იური შარაშიძე:

_ ძალიან მძიმედ მოქმედებს და არ უნდა ვრცელდებოდეს. ვითომ ამით რაღაცას აკეთებენ, მაგრამ ვერაფერისაც ვერ აკეთებენ. პირიქით, აღიზიანებენ ხალხს.

გრიშა კეკელიძე:

_ ასეთი რამეები არ უნდა ხდებოდეს და არც უნდა ვრცელდებოდეს. 

ხვიჩა მაღლაფერიძე:

_ არ ვთვლი მიზანშეწონილად, რომ ტელევიზიით აჩვენონ ასეთი კადრები. ისედაც იტანჯებიან პატიმრები და მათი წამების ამსახველი კადრების გავრცელება არ არის მართებული.

რომან ჟღენტი:

_ არ უნდა ვრცელდებოდეს. ამას უყურებს საზოგადოება, ახალგაზრდები. ბოდიში ბიძია თქვენთან, მაგრამ ახალგაზრდობა ისედაც წასულია ხელიდან და კიდევ ასეთი კადრების ყურება უნდათ?!