8 ოქტომბერს, ღამით, ლანჩხუთის მუნიციპალიტეტში მომხდარი სტიქიის სალიკვიდაციო სამუშაოებისთვის, გამგებლის, ზაზა ურუშაძის ინფორმაციით, 1 200 000 ლარია გამოყოფილი. თანხის ათვისება ორ ეტაპად მოხდება. პირველი ეტაპისთვის უკვე გამოიყო 700 ათასი, ხოლო დარჩენილი 500 ათასი ლარი იანვარში უნდა ჩამოირიცხოს.
აღნიშნული 700 ათასი ლარიდან 106 366 ლარი ჯურუყვეთის ადმინისტრაციულ ერთეულში გაიხარჯება, სადაც სტიქიის შედეგად დაზიანებული ოთხი ობიექტის აღდგება. აქედან, 22 850 ლარით ერთ დაზიანებული ხიდს აღადგენენ, ხოლო დარჩენილი 83 516 ლარი ნაპირსამაგრი სამუშაოებისთვისაა განკუთვნილი.
ჩოჩხათის ადმინისტრაციულ ერთეულში სტიქიისგან მიყენებული ზარალის აღმოსაფხვრელად ხუთ ობიექტზე 84 737 ლარის გახარჯვაა გამიზნული. აქედან, ორზე _ ჩამოწოლილი მეწყერი უნდა გაიწმინდოს, რაზეც, მთლიანობაში, 41 053 ლარია საჭირო, ხოლო 43 684 ლარი ხიდების აღდგენას მოხმარდება. ასევე, ხუთი ობიექტია აღსადგენი ნინოშვილშიც, რისთვისაც 127736 ლარია გამოყოფილი. სამ ადგილას ხიდის აღსადგენად 59 467 ლარია საჭირო, ხოლო დანარჩენი 68 269 ლარი ნაპირსამაგრი სამუშაოების გახორციელებას მოხმარდება.
რვა ოქტომბრის სტიქიის შედეგად, ნიგვზიანის ადმინისტრაციულ ერთეულში სამი ობიექტზეა სალიკვიდაციო სამუშაოები შესასრულებელი და მთლიანობაში, 66 857 ლარის გახარჯვაა გამიზნული. 22 035 ლარით სოფელ არჩეულში ეგ. ნინოშვილის სახლ-მუზეუმთან მისასვლელი დაზიანებული ნაპირი გამაგრდება. უშუალოდ ნიგვზიანში მდინარის ნაპირისა და გზის გასამაგრებლად 19 645 ლარია გამოყოფილი, ხოლო 25 177 ლარით სოფელ წიაღობანში სტიქიის შედეგად დაზიანებული გზის აღდგენა უნდა მოხდეს.
სტიქიის სალიკვიდაციოდ მამათში 70 522 ლარი გაიხარჯება, რაც, მთლიანობაში, დაზიანებული გზების აღდგენას მოხმარდება. რაც შეეხება ლესის ადმინისტრაციას, მას წილად სტიქიის შედეგად მიყენებული ზარალის აღმოსაფხვრელად 110 347 ლარი ერგო. აქედან, 9 624 ლარით სანიაღვრე არხი მოეწყობა, ხოლო დარჩენილი 100 723 ლარით ორ ადგილას ნაპირსამაგრი სამუშაოები შესრულდება.
გვიმბალაურის ადმინისტრაციაში სოფლის შიდა დაზიანებული გზების აღსადგენად, მთლიანობაში, 33 310 ლარია გამოყოფილი, ასევე, სტიქიის შედეგად დაზიანებული გზების აღდგენა იგეგმება აკეთის ადმინისტრაციულ ერთეულში, რისთვისაც 54 165 ლარია საჭირო. რაც შეეხება აცანას, აქ ძლიერი წვიმის შედეგად მილხიდია დაზიანებული, რომლის აღსადგენად 9492 ლარი გაიხარჯება, ხოლო დარჩენილი 35 760 ლარით გაბიონის მოწყობა იგეგმება.
წარმოდგენილმა ნუსხამ იმ ადმინისტრაციული ერთეულების დეპუტატთა უკმაყოფილება გამოიწვია, რომელთა სოფელიც თანხის გარეშე დარჩა და სტიქიის შედეგად მიყენებული ზარალის აღმოსაფხვრელად არაფერი ერგოთ. ამასთან დაკავშირებით მათ გარკვეული შენიშვნები გამგეობის ინფრასტრუქტურის სამსახურის მიმართ გამოთქვეს: "სტიქია ჩვენთანაც იყო და, შესაბამისად, აღსადგენი და შესაკეთებელი უამრავი რამ არის", _ ამბობდნენ ისინი, თუმცა, დეპუტატთა მხრიდან გამოთქმული შენიშვნები მიუღებელია თავად სამსახურის უფროსის ლევან ჩხაიძისთვის, რომლის თქმითაც, თანხა იმათ გამოეყოთ, ვინაც შესაბამისი დოკუმენტაცია წარმოადგინა, თუ რა სახის ზიანი მიადგა მათ სოფლებს.
მუნიციპალიტეტის გამგებლის ზაზა ურუშაძის თქმით, ის ადმინისტრაციული ერთეულები, რომელთაც წარმოდგენილი აქვთ შესაბამისი დოკუმენტაცია და ამ ჯერზე არ მოხვდნენ ჩამონათვალში, სტიქიის სალიკვიდაციოდ თანხას 500 ათასი ლარის ჩამორიცხვის შემდეგ მიიღებენ.
