საქართველოს პარლამენტის იურიდიულ საკითხთა კომიტეტის თავმჯდომარე პავლე კუბლაშვილი ამ წუთებში არასამთავრობო ორგანიზაციის წარმომადგენლებს ხვდება.
შეხვედრა დახურულ რეჟიმში მიმდინარეობს. თუმცა, შეხვედრის დაწყებამდე კუბლაშვილმა ჟურნალისტებთან კომენტარი გააკეთა.
მან განაცხადა, რომ ამ კანონთან დაკავშირებით მთავარ თემებზე უკვე არიან ჩამოყალიბებულები და მთავარი საკითხები არ შეიცვლება. ყველა კანონდარღვევა, რაც დაფიქსირდება პარტიების მხრიდან, იქნება დასჯადი.
_ კანონით გათვალისწინებული ძირითადი მიზნების გადახედვას არ ვაპირებთ. ძირითადი მიზნები არავითარ შემთხვევაში არ შეიცვლება. ამის მიღმა არის სხვა საკითხები, რომელზეც დღესაც მქონდა საუბარი და სავარაუდოდ, გაგრძელდება ჩვენი პოზიციების შეჯერება. ყველა ქმედება, რასაც კონტროლის პალატა ახორციელებს კანონიერია”, _ განაცხადა კუბლაშვილმა.
_ ბატონო პავლე, რასაც კონტროლის პალატა ახორციელებს სხვადასხვა რეგიონში, ესეც კანონის ფარგლებში ჯდება?
_ როგორც კონტროლის პალატამ აღნიშნა, არის გარკვეული შემთხვევა, რომლებიც უკავშირდება “ქართულ ოცნებას”, როდესაც მათი ხარჯებით ხდება ესა თუ ის აქტივობა, ოფისის ქირავნობა და ასე შემდეგ, რაც არ არის დეკლარირებული პარტიის მიერ. ასეთ შემთხვევაში კონტროლის პალატას აქვს ვალდებულება, რომ გადაამოწმოს ეს ინფორმაცია. ამ ინფორმაციის გადამოწმება უნდა მოხდეს, შესაბამისად, კონტროლის პალატის წარმომადგენლის მიერ და ეს ხდება კიდევაც. რაც შეეხება იმას, რომ ვიღაცას უნდა უტრირება და ამ საკითხის სხვანაირად ტრიალი, არ მგონია, ეს ვინმეს გამოუვიდეს, პირიქით, ყველას ძალიან კარგად უნდა ესმოდეს, რომ ხარჯებთან დაკავშირებით, ძალიან მნიშვნელოვანია, საზოგადოებამ მიიღოს სრული ინფორმაცია. ყველა პარტიის ინტერესებში უნდა შედიოდეს, მსგავსი ფაქტების შესახებ ინფორმაცია საჯარო გახდეს და რაიმე სხვა ფორმის მოფიქრება, მაგალითად, როგორ ავუაროთ კანონს გვერდი, როგორ დავარღვიოთ კანონი ისე, რომ ვერ შეგვამჩნიონ, ასეთი რამე არავის შერჩება. ბუნებრივია, თუ ასეთ რამეს აქვს ადგილი, კონტროლის პალატამ რეაგირება უნდა მოახდინოს.
_ ბატონო პავლე, იკითხებიან რიგითი მოქალაქეები, რომლებსაც არანაირი კავშირი არ აქვთ პოლიტიკურ პროცესებთან.
_ რიგით მოქალაქეებს შეიძლება გარკვეული სახის კავშირები ჰქონდეს ამა თუ იმ პოლიტიკურ ორგანიზაციასთან.
_ რაც შეეხება მოქალაქეების ჩხრეკას, ეს არის კანონით დაშვებული? აქვს კონტროლის პალატას ამის უფლება?
_ მე რამდენადაც ვიცი, ასეთ ფაქტებს ადგილი არ ჰქონია, არანაირი ჩხრეკა იქ არ მიმდინარეობს. ჩვენთვის ასეთი ფაქტები უცნობია და დარწმუნებული ვარ, არც ჰქონია ადგილი. აქაც რომ შემოდიხართ პარლამენტში, გადიხართ დეტექტორებზე, ხომ ასეა?
_ კი, მაგრამ საკრებულოს შენობაში ეს ადამიანები დეტექტორის გავლით კი არ შედიოდნენ, არამედ მათი ჩხრეკა ხდებოდა, თანაც როგორც თავად ამბობენ, საკმაოდ უხერხული ფორმით.
_ მარტივად შემიძლია გიპასუხოთ _ ყველა ის პროცედურა, რაც არის გამოყენებული დარწმუნებული ვარ, რომ ჯდება კანონის ფარგლებში. თუ რაიმე სხვა სახის ინფორმაცია გექნებათ, აუცილებელია, საზოგადოებას მიაწოდოთ.
