ოზურგეთის მუნიციპალიტეტის ადმინისტრაციულ შენობაში, კონტროლის პალატის წარმომადგენლებმა, 12 მოქალაქეს ჩამოართვეს ახსნა-განმარტება.
სვეტლანა ბაკურაძე, რომელიც ცოტა ხნის წინ გამოვიდა დაკითხვიდან, “გურია ნიუსის” კორესპონდენტთან ჟანა მეგრელიშვილთან საუბარში ამბობს, რომ მას მაისური და ქურთუკი გახადეს, ჩანთა და მობილური ტელეფონი კი შესასვლელში დაატოვებინეს:
_ დამკითხველმა არ წარმომიდგინა თავი. ჩხრეკის ჩატარების შემდეგ დაიწყო დაკითხვის რამდენიმე საათიანი პროცესი. ადვოკატის გარეშე დამკითხეს, დაცვის თანამშრომლებმა მითხრეს, რომ ადვოკატი ორ საათს ვერ მოვიდოდა.
არა ერთი კითხვა დამისვეს, ფსიქოლოგიურად დავითრგუნე. მე ამ ყველაფერს ზეწოლას დავარქმევ. მკითხეს, რამდენი ხელწერა შევაგროვე, რამდენი ავიღე ფული და ვინ გადმომცა, შვილები თუ მყავს და სად მუშაობენ. მითხრეს, კიდევ მოგიწევთ ჩემთან მოსვლაო. სავარაუდოდ, ვერ მიიღეს ჩემგან ისეთი პასუხი, რასაც ელოდნენ. არ ვიცი, როდის და სად დამიბარებენ.
დაკითხვიდან ბოლოს “თავისუფალი დემოკრატების” წევრი კახა გობრონიძე გამოვიდა. ის დაკითხვაზე დღის 5 საათზე იყო დაბარებული, თუმცა ერთი საათის დაგვიანებით დაუძახეს. ის ადვოკატის თანხლებით კახა საჯაიას შეკითხვებს 40 წუთის განმავლობაში პასუხობდა.
“არც ზეწოლას ჰქონია ადგილი და არც მუქარას. პარტიის შესახებ მკითხეს, დაინტერესდნენ რას ვსაქმიანობ, ხელწერებს თუ ვაგროვებდი, ამისთვის თუ ავიღე ფული და რამდენი. არ ამიღია და ეგეც ვუთხარი. ქურთუკი დამატოვებინეს შესასვლელში, ფეხსაცმელიც გამხადეს. დაკითხვის ბოლოს საჯაიამ თითი დამიქნია და მითხრა, იქ ხომ იტყვი ყველაფერს, კიდევ რომ დაგიბარებენო?! _ თქვა გობრონიძემ “გურია ნიუსთან” საუბარში.
დაკითხვის პროცესი დილის ათი საათიდან ოზურგეთის მუნიციპალიტეტის ადმინისტრაციულ შენობაში მესამე სართულზე მიმდინარეობდა, იქ სადაც გურიის სამხარეო ადმინისტრაციაა განთავსებული.
დაკითხვების სერია ოზურგეთში ხვალ გაგრძელდება, ვინაიდან რამდენიმე მოქალაქეს კონტროლის პალატიდან უწყება 14 მარტს, საღამოს საათებში მიუვიდა.
დასაკითხთა რიგებში ამჯერადაც “თავისუფალი დემოკრატების” და “რესპუბლიკელების” აქტივისტები და პარტიის წევრები მოხვდნენ.
