ადვოკატ გოგა ონიანის განცხადებით, ხელისუფლება ყველანაირი სამართლებრივი ჩარჩოდან არის გასული.
როგორც ონიანმა "გურია ნიუსს" განუცხადა, ეს სასამართლოს გადაწყვეტილება არ არის, ეს ბიძინა ივანიშვილის გადაწყვეტილებაა და სასამართლო არის გამოყენებული.
"სასამართლოს ყველა ქმედება პოლიტიკურად მოტივირებულია. ამ ადამიანებს აინტერესებთ "რუსთავი2"-ის საინფორმაციო ბადის შეცვლა, რომ აღარ ისმოდეს ხელისუფლების კრიტიკა და მათი დაპირებების შეხსენება. უნდათ, "რუსთავი 2" დაემსგავსოს 2330-ს, სადაც მხოლოდ ხოტბას ასხამენ ივანიშვილს. ვინაიდან ხელისუფლება გასულია სასამართლო ჩარჩოდან მათზე საუბარი ზედმეტია. როდესაც ბოლო გადაწყვეტილებაში მოსამართლე ურთმელიძემ განაცხადა, "რუსთავი 2"-ის მმართველი იმიტომ უნდა შეიცვლოს რომ არაობიექტურ ინფორმაციას აქვეყნებსო, ამის შემდეგ სამართლებრივ ჩარჩოზე საუბარი უაზროდ მიმაჩნია. აქ უნდა ვისაუბროთ იმაზე, რომ ბიძინა ივანიშვილი ცდილობს NTV-ს სცენარი "რუსთავი2"-ზე გაიმეოროს", _ ამბობს ონიანი.
რაც შეეხება დემონსტრაციას, ონიანმა ზუსტად არ იცის, რამდენ ხანს შეიძლება იყოს საზოგადოება შეკრებილი "რუსთავი2"-ის ეზოში ტელეკომპანიის დასაცავად.
"ეს არ არის ჩვენი დემონსტრაცია. გუშინ სულ სხვა ხალხს ვხედავდი აქ და დღეს სულ სხვა ხალხია მოსული, დარწმუნებული ვარ ხვალ სულ სხვა ადამიანები მოვლენ. ეს არის სპონტანური პროტესტი, რაც საზოგადოებას გაუჩნდა, ამიტომ ვერ დავგეგმავთ, რამდენ ხანს შეიძლება გაგრძელდეს დემონსტრაცია. საქართველოს ხელისუფლებას საზოგადოება არ მისცემს იმის უფლებას, რომ დაადუმოს ბოლო ფანჯარა, სადაც საზოგადოების პრობლემების გასაჯაროება ხდება", _ აღნიშნა ონიანმა.
