“ეს შენ გეხება”

კამპანიაში ჩართული ორგანიზაციების საგანგებო განცხადება

“საქართველოს კონტროლის პალატის ფინანსური მონიტორინგის სამსახურის მიერ 12, 13 და 14 მარტს საქართველოს სხვადასხვა მუნიციპალიტეტში დაკითხულ მოქალაქეთა რაოდენობამ 150-ს გადააჭარბა. ახსნა-განმარტებების ჩამორთმევის პროცესში კონტროლის პალატის წარმომადგენელთა მხრიდან, მოქალაქეებზე გახორციელებული ფიზიკური და ფსიქოლოგიური ზეწოლის, დაშინების და მუქარის ფაქტებს კამპანია “ეს შენ გეხება” უარყოფითად აფასებს”, _ ნათქვამია კამპანიაში “ეს შენ გეხება” ჩართული არასამთავრობო და მედიაორგანიზაციების გავრცელებულ ერთობლივ განცხადებაში. ისინი გმობენ, კონტროლის პალატის მიერ რეგიონებში ახსნა-განმარტებების მასობრივი ჩამორთმევის ფაქტებს. “გურია ნიუსი” განცხადებას უცვლელად გთავაზობთ: “მიგვაჩნია, რომ კონტროლის პალატის ქმედებები, რომლებიც, მათივე განმარტებით, პარტიების ფინანსური გამჭვირვალობის უზრუნველყოფას ისახავდა მიზნად, შეიცავდა განსხვავებული პოლიტიკური შეხედულებების მქონე მოქალაქეთა დევნის ნიშნებს. კონტროლის პალატის წარმომადგენლების ქმედებები მრავლად შეიცავდა, ასევე, უფლებამოსილებათა გადამეტების ფაქტებს, კერძოდ უწყების თანამშრომლების მიერ მოქალაქეთათვის დასმული კითხვები, ფინანსური ხასიათის საკითხების გარდა, შეეხებოდა მოქალაქეთა პოლიტიკური აქტივობების დეტალებს და კონკრეტულ პოლიტიკურ ძალასთან მათი თანამშრომლობის მიზეზებს. დაბარებულ პირებს პრობლემები ექმნებოდათ ადვოკატების დასწრებასთან დაკავშირებით, ადგილი ჰქონდა ადვოკატის ფიზიკური და სიტყვიერი შეურაცხყოფის ფაქტებს, რის გამოც მათ არ მიეცათ დაკითხვის პროცესზე დასწრების საშუალება. ჟურნალისტებს ხელი ეშლებოდათ პროფესიული საქმიანობის განხორციელებაში. კონტროლის პალატის თანამშრომლები მოწვეულ მოქალაქეებს არ აწვდიდნენ სრულყოფილ ინფორმაციას, თუ რა სახის სამართალდარღვევის ფაქტზე და ვის მიმართ იყო დაწყებული სამართალწარმოება. გარდა ამისა, ახსნა-განმარტების მიღების პროცესში მოქალაქეების მიმართ ხორციელდებოდა ღირსების შემლახველი ქმედებები”, – ნათქვამია კამპანიის წევრი ორგანიზაციების ერთობლივ განცხადებაში. კამპანიის წევრებმა საზოგადოებას დღეს რეგიონული მედიის მიერ გავრცელებული წერილობითი და ვიდეომასალაც წარუდგინეს, რომელშიც კონტროლის პალატაში ახსნა-განმარტების მისაცემად დაბარებული პირები მათი მისამართით შეურაცხყოფისა და ფსიქოლოგიური ზემოქმედების ფაქტებზე საუბრობენ.  “ვფიქრობთ, დაკითხვის მანერა, ხანგრძლივობა (რაც ხშირ შემთხვევაში 6 საათი იყო), დასმული შეკითხვები, კონტროლის პალატის წარმომადგენელთა მხრიდან მოქალაქეებთან ურთიერთობის შეურაცხმყოფელი ფორმები, მათზე მუქარისა და ზეწოლის ხერხების გამოყენება მოქალაქეთა დაშინებას უფრო ისახავდა მიზნად, ვიდრე პარტიების უკანონო ფინანსური საქმიანობის დადგენის ფაქტს. აღნიშნული ქმედებები საარჩევნო წელს ცალსახად გამოიწვევს მოქალაქეებში შიშის დანერგვას, პოლიტიკურ და სამოქალაქო აქტივობებში ჩართულობასთან დაკავშირებით და კიდევ უფრო დაამძიმებს წინასაარჩევნო გარემოს ქვეყანაში”, – აღნიშნულია კამპანია “ეს შენ გეხება” წევრი ორგანიზაციების ერთობლივ განცხადებაში. კონტროლის პალატის პარტიების ფინანსური მონიტორინგის სამსახური საქართველოს რეგიონებში უკვე მეოთხე დღეა, მოქალაქეებისთვის “ქართულ ოცნებაში” გაწევრიანებული პოლიტიკური ორგანიზაციების წევრი მოქალაქეებისთვის ახსნა-განმარტების ჩამორთმევას განაგრძობს. ახსნა-განმარტების მისაცემად დაბარებული პირები ფსიქოლოგიურ ზეწოლაზე, მორალურ ტერორსა და შეურაცხყოფაზე საუბრობენ.”