სამი მიწის ნაკვეთი, საცხოვრებელი სახლი და ბინა პერსონალურ მონაცემთა დაცვის ინსპექტორის, თამარ ქალდანის ოჯახის საკუთრებაა, ხოლო წლიური შემოსავალი 200 000-ლარამდე მერყეობს.
ქონებრივი დეკლარაციის მიხედვით, რომელიც თამარ ქალდანმა 2015 წლის 6 ნოემბერს შეავსო, აღნიშნულია, რომ ის დუშეთში, სოფელი მჭადიჯვარში (მილისწყარო) 1500.00 კვ.მ-ის ფართობის მიწის ნაკვეთს ფლობს. ასევე, მის საკუთრებაშია 2005 წელს გამოშვებული მსუბუქი ავტომანქანა ფოლცვაგენ ჯეტა.
მისი მეუღლის, ლევან მოსახლიშვილის 100%-ია საკუთრებაშია თბილისში, ალექსანდრე ყაზბეგის გამზირზე მდებარე 140.92 კვ.-ის ფართობის ბინა; თბილისში, დაბა კოჯორში მდებარე 153.00 კვ.მ-ის ფართობის საცხოვრებელი სახლი და ორი მიწის ნაკვეთი – დაბა კოჯორში – 384.00 კვ.მ-ის ფართობის და მცხეთაში, სოფელი ცხვარიჭამიაში 740.00 კვ.მ-ის ფართობის.
რაც შეეხება ქალდანის ოჯახის ფინანსურ მდგომარეობას, როგორც დეკლარაციაშია აღნიშნული, ოჯახმა ერთი წლის განმავლობაში 196 026.21 ლარის შემოსავალი მიიღო.
კერძოდ, პერსონალურ მონაცემთა დაცვის ინსპექტორის თანამდებობიდან თამარ ქალდანს ანაზღაურების სახით 70800.00 ლარი აქვს მიღებული; ქართულ-ამერიკული უნივერსიტეტიდან, სადაც მას მოწვეული ლექტორის თანამდებობა ეჭირა – 4300.00 ლარი; ივ. ჯავახიშვილის სახელობის თბილისის სახელმწიფო უნივერსიტეტის (მოწვეული ლექტორი) 747.50 ლარი.
რაც შეეხება მისი მეუღლის შემოსავლებს, დეკლარაციის მიხედვით, ლევან მოსახლიშვილმა კავკასიის საერთაშორისო უნივერსიტეტის ასოცირებული პროფესორის თანამდებობიდან 17212.50 ლარის ანაზღაურება მიიღო; შ.პ.ს. კავკასიის უნივერსიტეტიდან (ასოცირებული პროფესორი) 5500.00 ლარი; სს საქართველოს ენერგეტიკის განვითარების ფონდის დირექტორის თანამდებობიდან იურიდიულ საკითხებში 78469.11 ლარი; ივანე ჯავახიშვილის სახელობის თბილისის სახელმწიფო უნივერსიტეტიდან (მოწვეული ლექტორი) – 858.35 ლარი; სულხან-საბა ორბელიანის სასწავლო უნივერსიტეტიდან (მოწვეული ლექტორი) – 1648.75 ლარი; სსიპ განათლების ხარისხს განვითარების ეროვნული ცენტრიდან (აკრედიტაციის ექსპერტი) – 240.00 ლარი.
გარდა ამისა, დეკლარაციაში აღნიშნულია, რომ ლევან მოსახლიშვილმა საექსპერტო მომსახურებიდან ჰონორარის სახით 10000.00 ლარის შემოსავალი მიიღო, ხოლო იურიდიული მომსახურებისთვის 6250.00 ჰონორარი აქვს მიღებული.
აღსანიშნავია, რომ დეკლარაციის შევსების მომენტში თამარ ქალდანის მიმდინარე ანგარიშზე თი-ბი-სი ბანკში 3098.16 ლარი იყო; ამავე ბანკის საკრედიტო ანგარიშზე – 2500.00 ლარი; სახელფასო ანგარიშზე – 4372.50 ლარი და 6.35 დოლარი; ხოლო რესპუბლიკა ბანკის მიმდინარე ანგარიშზე – 180.10 ლარი;
რაც შეეხება ქალდანის მეუღლის, ლევან მოსახლიშვილის ანგარიშებს, დეკლარაციის შევსებისას თი–ბი–სი ბანკის საკრედიტო ანგარიშზე მას 2900.94 ლარი ჰქონდა; თი–ბი–სი ბანკის სახელფასო (ოვერდრაფტი) ანგარიშზე – 3099.68 ლარი; საქართველოს ბანკის საკრედიტო ანარიშზე – 4000.02 ლარი; ვი–თი–ბი ბანკის სახელფასო ანგარიშზე – 21.75 ლარი; ლიბერთი ბანკის სახელფასო ანგარიშზე – 117.07 ლარი; ხოლო რესპუბლიკა ბანკის მიმდინარე ანგარიშზე 0.17 ლარი ირიცხებოდა.
დეკლარაციის მიხედვით, ლევან მოსახლიშვილის სახელზე სამი საკრედიტო სესხია. კერძოდ, 125 000.00-დოლარიანი იპოთეკური სესხი (უძრავ ქონებაზე – 140.92 კვ.მ ბინა მდებარე ალ/ყაზბეგის#34(ნაკვეთი#30), ხელშეკრულების ვადები: 15/02/2011, 15/02/2011 – 05/12/2020) ბანკ „რესპუბლიკა“-დან აქვს აღებული, რისი პროცენტის დასაფარადაც ერთი წლის განმავლობაში 17730.00 დოლარი გადაიხადა;
ამერიკან ექსპრესის საკრედიტო ბარათით (4000 ლარიანი ლიმიტით), 4000.00 ლარი აქვს აღებული (ხელშეკრულების ვადები: 15/11/2009, 15/11/2009 – უვადო) საქართველოს ბანკიდან, რისთვისაც 86.00 ლარის გასავალი ჰქონდა.
ხოლო თი-ბი-სი ბანკიდან აღებული 683.02-ლარიანი სესხი, რომელიც საოჯახო ტექნიკაზე განვადებისთვის გამოიყენა (ხელშეკრულების ვადები: 05/07/2014, 05/07/2014 – 05/07/2015) 292.10 ლარი აქვს გადახდილი.
დეკლარაციის მიხედვით, ოჯახი არ ფლობს ფასიან ქაღალდებს და ძვირადღირებულ ნივთებს, ერთი წლის განმავლობაში არც ფასიანი საჩუქრები მიუღიათ.
