საქართველოს ფეხბურთის ფედერაციის აღმასკომის სხდომის იმ გადაწყვეტილების შესახებ, რომლის თანახმადაც საფეხბურთო კლუბ "გურიას" ბოლო ვადა მიეცა 15 ნოემბრამდე რომ თემურ ლორიასა და თენგიზ პატარაიას მიმართ არსებული დავალიანება დაფაროს, უკვე გაცნობეთ.
ამ ჯერზე ჩვენ შევეცადეთ გაგვეგო უშუალოდ კლუბის პოზიცია აღნიშნულთან დაკავშირებით, თუ ცნობს ის ამ დავალიანებას და რას აპირებს მოსალოდნელი სანქციების თავიდან ასაცილებლად. ამ საკითხზე კლუბის აღმასრულებელ დირექტორს, ოთარ ჩხაიძეს შევეხმიანეთ, რომელმაც სასამართლოში შეტანილ საჩივარზე დაიწყო საუბარი:
– მინდა გითხრათ, რომ ჩვენ ველოდებით სასამართლოს გადაწყვეტილებას და მხოლოდ მას შემდეგ გავაკეთებთ სათანადო რეაგირებას.
თქვენ ამბობთ რომ ასაჩივრებთ ამ საკითხს?
დიახ, ვასაჩივრებთ.
ე. ი. არ ცნობთ არსებულ დავალიანებას ყოფილ მწვრთნელებთან მიმართებაში?
ჩვენ ვცნობთ სიმართლეს, რაც იქნება კანონიერი და რასაც დაგვავალდებულებენ, იმას გავაკეთებთ.
15 ნოემბრამდე თუ მოგიწიათ ამ თანხის დაფარვა?
თუ მოგვიწია, დავფარავთ კიდეც.
გაქვთ ანგარიშზე ამისთვის საჭირო თანხა?
ყველაფერი იქნება.
კლუბის აღმასრულებელი დირექტორის პოზიციასთან დაკავშირებით საქართველოს ფეხბურთის ფედერაციის იურისტს, კესო ჩხიკვაძეს დავუკავშირდით, რომელიც გაკვირვებას ვერ მალავს ჩხაიძის ასეთი პოზიციის გამო.
"რა სასამართლოზეა საუბარი, ეს ჩემთვის გაუგებარია. საერთოდ "გურიაში" რამდენი დირექტორი მოვა თუ წავა, ყველას განათლების გაკვეთილს ვერ ჩავუტარებ. ფედერაციის წესდებაში პირდაპირ წერია, კლუბს არ აქვს უფლება არსებული საკითხი სამოქალაქო სასამართლოში გაასაჩივროს, მითუმეტეს სპორტული ტრიბუნალის გადაწყვეტილება, რომელიც საბოლოოა და გასაჩივრებას არ ექვემდებარება. ან რა სადაოა ის, რომ კლუბი ცნობს თუ არა ამ ვალს. "გურიამ" უკვე ორჯერ მიმართა აღმასკომს, რომ აღიარებს ამ ვალს და გადახდის გადავადებას ითხოვს" – განაცხადა კესო ჩხიკვაძემ.
მისივე თქმით, თუ კლუბი თანხას არ შემოიტანს 15 ნოემბრამდე, სანქციები აუცილებლად ამოქმედდება. ეს რომ ასეა, ამას გურიის ფეხბურთის ფედერაციის ექსთავკაცი, კახა ებრალიძეც ადასტურებს, რომელიც კვლავ იხსენებს იმ აღმასკომის სხდომას და კლუბში მომუშავე არაკვალიფიციური კადრების არსებობაზე აკეთებს აქცენტს.
"ბოლო აღმასკომის სხდომაზე, რომელსაც მეც ვესწრებოდი, ყველა ერთმნიშვნელოვნად აცხადებდა, რომ "გურიამ" ეს ვალი აუცილებლად უნდა დაფაროს. განსაკუთრებული კატეგორიულობით თბილისის "დინამოს" პრეზიდენტი, რომან ფიფია გამოირჩეოდა, რომელმაც აღნიშნა, რომ თანხის გადახდის ვადის ორჯერ გადავადებას იმიტომ დათანხმდა, საქმე "გურიას" ეხებოდა და ბოლოსდაბოლოს ყველაფერს საზღვარი აქვსო.
რაც შეეხება ოთარ ჩხაიძის ამ განცხადებებს, ეს კიდევ ადასტურებს, რომ რიგ ხელმძღვანელ პირებს, კლუბი კვლავაც ძველი ჩაის ფაბრიკა გონიათ და საერთოდ, ფედერაციის ხელმძღვანელობამ აუცილებლად უნდა მიაქციოს ყურადღება იმას, თუ რა დონის ფეხბურთის მიმართებაში არაკომპეტენტური ხალხი მართავს დღესდღეობით კლუბ "გურიას". ადრე, როცა აღმასკომის წევრი ვიყავი ამის თქმას თავს ვარიდებდი, მაგრამ ახლა იძულებული ვარ ეს ვაღიარო", – განაცხადა ებრალიძემ.
ამასობაში 15 ნოემბერიც მალე მოვა და ჯერჯერობით მაინც გაურკვეველია თუ რას აპირებს კლუბის ხელმძღვანელობა. მუნიციპალიტეტის გამგებელი და კლუბის პრეზიდენტი, ზაზა ურუშაძე ფედერაციიდან ოფიციალურ კომენტარს არ აკეთებს.თუმცა, ფაქტია, რომ ამასწინ მუნიციპალიტეტის საკრებულოს საფინანსო – საბიუჯეტო სხდომაზე კლუბის მიერ გაკეთებული განვლილი 9 თვის საფინანსო ანგარიშიდან კარგად ჩანს, რომ კლუბს წელს გამოყოფილი თანხები უკვე თითქმის ამოწურული აქვს და უფრო მეტიც, მისი მიმდინარე საკრედიტო დავალიანება ნახევარ მილიონ ლარს აჭარბებს.
