ვიცეპრემიერი, ენერგეტიკის მინისტრი კახი კალაძე საზოგადოებას თხოვნით მიმართავს, რომ ტელეკომპანია "რუსთავი 2"-ის ირგვლივ მიმდინარე დავას პოლიტიკურ ჭრილში ნუ გადაიყვანენ:
"მესმის, რომ ძალიან დიდია ინტერესი ამ დავასთან დაკავშირებით. დაველოდოთ სასამართლოს გადაწყვეტილებას. უბრალოდ, ძალიან დიდი თხოვნა იქნება, რომ ამ დავას ნუ გადავიყვანთ პოლიტიკურ ჭრილში, რასაც გარკვეული დაჯგუფებები, კონკრეტული ადამიანები ცდილობენ.
განჩინებას რაც შეეხება, ჩვენ უნდა შევეგუოთ, უნდა მივეჩვიოთ, რომ როდესაც სასამართლო იღებს გადაწყვეტილებას, ეს შეიძლება ერთი მხარისთვის იყოს დამაკმაყოფილებელი, მისაღები, მეორე მხარისთვის იყოს მიუღებელი.
რა თქმა უნდა, როდესაც საკონსტიტუციო სასამართლომ მიიღო გადაწყვეტილება ნორმის შეჩერებასთან დაკავშირებით, მე დარწმუნებული ვარ გარკვეული პიროვნებებისთვის ეს იყო მიუღებელი, თუმცა გარკვეული პიროვნებებისთვის იყო მისაღები.
ანალოგიურად შეიძლება ვიმსჯელოთ მეორე გადაწყვეტილებაზე, რომელიც ბატონმა ურთმელიძემ მიიღო. ამიტომ, მე თავს შევიკავებდი ჩემი პოზიციის დაფიქსირებისგან, რადგან ჩემი თანამდებობიდან გამომდინარე შეიძლება ეს გამოყენებულ იქნეს ვინმეს მხარდაჭერად, ან ვინმეზე ზეწოლად.
ამიტომ, ჩვენ თუ ვაშენებთ დემოკრატიულ ქვეყანას, დემოკრატიულ ინსტიტუტებზე დაფუძნებულ სახელმწიფოს, მაშინ ვიცით, რომ სასამართლო არის დამოუკიდებელი და პატივი უნდა ვცეთ მოსამართლის მიერ მიღებულ გადაწყვეტილებას, რამდენად მისაღები ან მიუღებელი შეიძლება იყოს ის ადამიანებისთვის", – განაცხადა კალაძემ.
მისივე თქმით, საქართველოს მოქალაქეებს თავისუფალი სიტყვის გამო არავინ სდევნის და მედია თავისუფალია:
_ ჟურნალისტები დამეთანხმებით, რომ თავისუფალი გარემო შექმნილია და ეს ჩვენი, თქვენი, ხელისუფლების, ხალხის დამსახურებაა, _ აღნიშნა კალაძემ.
