მოგელი ტყებუჩავა კონტროლის პალატის დაკითხვების შესახებ
"ქართული ოცნების" რეგიონული პოლიტიკის თემატური ჯგუფის წევრი, მოგელი ტყებუჩავა, კონტროლის პალატისა და პოლიციის მხრიდან ჩვენებების მისაცემად ადამიანების დაბარებას, უკანონოდ მიიჩნევს. შსს ფოთის სამმართველოს გამომძიებლის ხელმოწერილი უწყება, მის ოჯახს ფოთში მიუვიდა, იმის მიუხედავად, რომ მისი საცხოვრებელი მისამართი, იურიდიულად და ფაქტობრივად, თბილისია. ამის შესახებ ტყებუჩავამ ჩვენთან საუბრისას განაცხადა.
"თვალი გადავავლე ამ საქმესთან მიმართებაში ყველა საკანონმდებლო აქტს, კონტროლის პალატის უწყებიდან მოყოლებული. რასაც გვედავებიან, ცნობილი თემაა _ პოლიტიკურ პარტიასთან თვალთმაქცური გარიგება. ჩემი თანამოაზრეები ყველანი დაიბარეს, რომლებიც ხელმოწერების შეგროვებასთან კავშირში იყვნენ. ეს ადრე, ნოემბერ-დეკემბერში იყო, თუმცა, კანონებში ცვლილება შევიდა 2012 წლის 15 იანვრიდან. კანონის უკუქცევის მიუხედავად, კანონდარღვევა არც ერთ შემთხვევაში არ იყო, რადგან ჩვენ პრეზიდენტს ამ ხელმოწერებით მხოლოდ მივმართეთ, რომ ივანიშვილისთვის მოქალაქეობა აღედგინა. ამასთან, ეს ხელმოწერები ჩვენ შევაგროვეთ უწმინდესის კურთხევის შემდეგ, როდესაც მან ითხოვა პრეზიდენტისგან, რომ აღედგინა მოქალაქეობა ივანიშვილისთვის. ამის შემდეგ, ჩვენ, 104-მა არასამთავრობო ორგანიზაციამ "სამოქალაქო ერთობა" დავაფუძნეთ თბილისში და სრულიად უანგაროდ, ერთი თეთრიც რომ არ აგვიღია, ხელმოწერების შეგროვება დავიწყეთ," _ აცხადებს ტყებუჩავა, რომელიც განმარტავს, რომ მას არ აქვს ინფორმაცია პარტიული კუთხით, თუ ვინ გააკეთა, მაგრამ სამეგრელოს რეგიონში არასამთავრობოების მიერ 13 ათასი ხელმოწერის შეგროვება ყოველგვარი ანაზღაურების გარეშე მოხდა. შესაბამისად, ის კონტროლის პალატაში და პოლიციაში დაბარების მიზეზს ვერ ხვდება.
ტყებუჩავა განმარტავს, რომ "ქართული ოცნების" თემატურ ჯგუფში მისი საქმიანობა, ასევე ანაზღაურების გარეშე ხორციელდება: "კოალიციაზე თუა საუბარი, ეს სულ სხვა თემაა, მაგრამ პოლიტიკური მოძრაობა "ქართული ოცნება _ დემოკრატიული საქართველო" ჯერ არ შექმნილა. აქედან გამომდინარე, უნდა ვივარაუდოთ, რომ ეს დაბარებები და უწყებები, არის მხოლოდ ზეწოლა, იმ თვალსაზრისით, რომ შემდგომი პერიოდი არჩევნების მოახლოებასთან ერთად იქნება უფრო დაძაბული, საზოგადოებას უნდა აგრძნობინონ, რომ ყველას დააპატიმრებენ", _ აცხადებს ტყებუჩავა.
მისივე განმარტებით, კონტროლის პალატის უწყება, 12 მარტს, ფოთში, მისი მშობლების სახლში მივიდა, რის შემდეგაც, მერიის შენობაში კონტროლის პალატის წარმომადგენელთან გასაუბრების მიზნით, მისი ძმა გამოცხადდა.
"ფოთში არ ვცხოვრობ სამ წელზე მეტია. ამიტომ ახსნა-განმარტების მისაცემად, რომც მომენდომებინა მისვლა, ვერ მოვასწრებდი, რადგან უკვე 12 საათი იყო და 16 საათამდე ფოთში ვერ ჩამოვიდოდი. ამიტომაც, 13 მარტს, დავრეკე კონტროლის პალატის ცხელ ხაზზე და ვითხოვე, უწყება ჩემს თბილისის მისამართზე გამოეგზავნათ, თუმცა ასე არ მოხდა," _ განაცხადა ტყებუჩავამ, _ ამიტომაც, პოლიციის გამომძიებლის მიერ გამოგზავნილი უწყება, რომელიც ჩემს ოჯახს გუშინ მიუტანეს, ყალბია. მე არ მითქვამს ახსნა-განმარტების მისაცემად მისვლაზე უარი. ყველაფრის მიუხედავად, მე ხვალ მოვდივარ და კანონიერად მივცემ ჩვენებას გამომძიებელ-დეტექტივს. ერთიცაა _ უწყებაში არ შეიძლება არ იყოს მითითებული საფუძველი, რის გამო გიბარებენ. არ ვიცი, რატომ მიბარებენ და რისთვის მიბარებენ", _ აცხადებს მოგელი ტყებუჩავა.
