“გურიის მიმართ ჩემი პოზიცია ძალიან მგრძნობიარეა, რადგან მე თავად დედის მხრიდან გურიიდან გახლავართ. ძალიან მინდა ამ რეგიონს, რომელიც წლების განმავლობაში მიტოვებულია, ერთხელ და სამუდამოდ პატრონი გამოუჩნდეს.
მინდა გურიაში მცხოვრებ ჩვენს მოქალაქეებს ყველას ვუთხრა, რომ ძალიან მალე დადგება ის დრო, როცა ერთად დავიწყებთ გურიისთვის ყველაზე მთავარი პრობლემების მოგვარებას, როგორიცაა უმუშევრობა, განადგურებული სოფლის მეურნეობა და კიდევ უამრავი სხვა. ამ ყველაფერს მივხედავთ და დავიწყებთ თითოეული ჩვენი მოქალაქის კეთილდღეობაზე ზრუნვას.
გურიას ეყოლება ისეთი გამგებელი, ისეთი რწმუნებული, ისეთი ადგილობრივი თვითმმართველობის ორგანოები, რომელსაც ექნება თავისი ბიუჯეტი და ყველა ის პრობლემა, რასაც ამდენი წელია უძლებენ გურიის მაცხოვრებლები, აუცილებლად მოგვარდება.
ერთმანეთის იმედი უნდა გვქონდეს და რაც მთავარია, გურულების იუმორის იმედი მაქვს, რომ ამ ყველაფერს, ამ სირთულეებს რაც ახლა ხდება, ძალიან მალე, როგორც კი დავასრულებთ, იუმორით შეხედავენ…” _ განაცხადა “თავისუფალი დემოკრატების” ლიდერმა ირაკლი ალასანიამ “გურია ნიუსთან” ექსკლუზიურ ინტერვიუში.
_ ბატონო ირაკლი, პირველ რიგში, მინდა კომენტარის გაკეთება გთხოვოთ შინაგან საქმეთა სამინისტროს მიერ გავრცელებულ ინფორმაციაზე, რომლის თანახმად, საქართველოს სისხლის სამართლის კოდექსის 348.2-ე მუხლით დაწყებულია გამოძიება იმ პირთა მიმართ, რომლებიც არ გამოცხადდნენ კონტროლის პალატის მიერ მოწყობილ მასობრივ დაკითხვაზე. შინაგან საქმეთა სამინისტრო, ამ მუხლის საფუძველზე, მოწმის სახით, თქვენს მხარდამჭერებს დაკითხავს. როგორია თქვენი პოზიცია ამასთან დაკავშირებით და რას აპირებთ ამ ხალხის მხარდასაჭერად?
_ უპირველეს ყოვლისა, ძალიან დიდი მადლობა მინდა ვუთხრა თქვენს გაზეთს, “გურია ნიუსს” მოვლენების ასე ოპერატიულად და ობიექტურად გაშუქებისთვის.
რაც შეეხება ბოლო დროს განვითარებულ მოვლენებს, გეტყვით, რომ სააკაშვილის ხელისუფლება ძალიან დამფრთხალია. მათ ძალიან ეშინიათ თავისუფალი პირობებში ჩატარებული არჩევნების, რადგან კარგად იციან, რომ “ქართული ოცნება” მათ დაამარცხებს.
ჩვენ მოწმეებით ვართ იმისა, რეალურად თუ როგორ იცვლება სააკაშვილის ავტორიტარული რეჟიმი ტოტალიტარული რეჟიმით. მათ დაიწყეს რეპრესიული მანქანის სრული გამოყენება, რაშიც ჩართული ჰყავთ პოლიტიკური პოლიცია, რომელიც შექმნეს კონტროლის პალატის სახით და ამ პროცესში უკვე შინაგან საქმეთა სამინისტროც ჩაერთო. ეს მხოლოდ იმიტომ ხდება, რომ ხალხში შიშის განცდა კიდევ უფრო გააღრმავონ, რათა საზოგადოების დიდმა ნაწილმა არჩევნებში არ მიიღოს მონაწილეობა.
მე ახლაც რეგიონში ვიმყოფები, კერძოდ ხაშურში, ვხვდები მოსახლეობას და ვხედავ, რომ შიშის განცდა უკვე ტყდება. სწორედ ეს იქნება მთავარი რამ, რაც გადატეხავს წელში სააკაშვილის ხელისუფლებას.
ჩვენ ახლაც და ყოველთვის უზრუნველვყოფთ ჩვენი მხარდამჭერების სამართლებრივი დახმარებით და მხოლოდ ამით არ შემოვიფარგლებით _ გვერდში დავუდგებით მათ ოჯახებსაც; ყველას კარგად გვესმის, რომ ეს ბრძოლა ერთად გვაქვს გადასატანი, დღეს უკან დახევის დროს არ არის.
_ მოვლენები სამართლებრივი სივრციდან უკვე გასულია, რასაც მოწმობს კონტროლის პალატის მიერ მოქალაქეების დაკითხვის ფორმები _ ადამიანების უფლებები ირღვევა, ხშირია ზეწოლისა და შანტაჟის ფაქტებიც. როგორ ფიქრობთ, ეს ყველაფერი სიტუაციის მეტად გამწვავებისკენ არის მიმართული?
_ ჩვენი მთავარი მიზანია სააკაშვილს არ მივცეთ შესაძლებლობა მოვლენები სამართლებრივი სივრციდან გაიტანოს. ესაა მისი ჩანაფიქრი, მაგრამ ჩვენ აუცილებლად მივაღწევთ იმას, რომ მხოლოდ არჩევნების გზით, წინასაარჩევნოდ და არჩევნების დღეს უარი ვუთხრათ რეჟიმს და ნაციონალური მოძრაობის მმართველობას.
მთავარი ამოცანაა, ეს ხალხი დავიცვათ სამართლებრივად, მაგრამ ამავდროულად, არ უნდა მივცეთ სააკაშვილის საშუალება, მოვლენები ქუჩაში გადაიტანოს _ ქუჩის დაპირისპირება მხოლოდ სააკაშვილს სჭირდება და სურს, რომ ჩვენს ქვეყანაში სამოქალაქო დაპირისპირება შედგეს, მაგრამ ამის საშუალებას არ მივცემთ.
_ როგორ ფიქრობთ, გაუძლებენ ადამიანები ასეთ ზეწოლასა და მუქარას, განსაკუთრებით კი რეგიონებში, სადაც მათი დაცულობის ხარისხი გაცილებით ნაკლებია, ვიდრე თბილისში?
_ ჩვენ ადამიანებს არ მივატოვებთ არცერთ სიტუაციაში. გუშინ მქონდა შეხვედრა მთელ დიპლომატიურ კორპუსთან საქართველოში. გავაცანით ეს პრობლემები და ის ტოტალიტარული სისტემა, რომელიც სააკაშვილმა აამოქმედა. არ დააყოვნა ამერიკის ელჩმა და გააკეთა განცხადება, რომელიც პირდაპირ მეტყველებს, რომ ამერიკა შეშფოთებულია იმ პროცესით, რაც კონტროლის პალატამ და შინაგან საქმეთა სამინისტრომ ერთობლივად დაიწყეს. საერთაშორისო ზეწოლა გაიზრდება. ჩვენ გავაგრძელებთ სამართლებრივ ჩარჩოებში ბრძოლას, უკან არ დავიხევთ და გავტეხავთ წელში სააკაშვილის ავტორიტარულ მმართველობას.
_ პარლამენტის იურიდიულ კომიტეტსა და სამოქალაქო სექტორს შორის მიმდინარეობს ინტენსიური მოლაპარაკებები “მოქალაქეთა პოლიტიკური გაერთიანებების შესახებ” ორგანულ კანონში ცვლილებების შეტანაზე. ყველაზე პრინციპულ საკითხებზე, როგორიცაა ამომრჩევლის სისხლის სამართლებრივი პასუხისგება და ჯარიმების ათმაგი ოდენობა, ჯერჯერობით იურიდიული კომიტეტი დათმობაზე არ მოდის. ამაზე თუ გქონდათ საუბარი დიპლომატიურ კორპუსთან?
_ ეს საუბარი და დიალოგი ინიცირებული იყო სამოქალაქო საზოგადოების მხრიდან, რაც იმას ნიშნავს, რომ საქართველოში ყველა შეშფოთებულია ამ კაბალური კანონით. ზეწოლა კიდევ უფრო გაიზრდება საერთაშორისო თანამეგობრობის მხრიდან.
გუშინ შეხვედრა მქონდა გერმანიის საგარეო საქმეთა მინისტრთან, რომელმაც განაცხადა, რომ პირადად ჩაერთვება და გააკონტროლებს იმას, რომ სერიოზული მონიტორინგი გახორციელდეს წინასაარჩევნო პერიოდში და მოხდეს იმ პროცესებზე დაკვირვება, რომელიც რეგიონებში მიმდინარეობს. ასე რომ, ჩვენ გვაქვს სრული იმედი იმისა, რომ საერთაშორისო თანამეგობრობა სწორ პოზიციას დაიკავებს. მაგრამ ყველაზე დიდი და მთავარი იმედი ჩვენთვის ქართველი ხალხია. სააკაშვილმა ბევრი რამ წაართვა ქართველ ხალხს, მაგრამ ღირსებას ჩვენს მოქალაქეებს ვერავინ წაართმევს. ძალიან ცდება, თუ ფიქრობს, რომ ქართველი ხალხი ვერ ხედავს რა მოუტანა მათ ამ ათწლიანმა მმართველობამ.
