ჩოხატაურელი გოჩა ჯიქია, ჩოხატაურის პოლიციის სამმართველოში 16 მარტს დაკითხეს.
როგორც ჯიქიამ ჩვენთან საუბრისას აღნიშნა, პოლიციაში ის მოწმის სტატუსი დაკითხეს: _ კონტროლის პალატის უწყება მეც მომივიდა, თუმცა, დაკითხვაზე ვერ მივედი. სწორედ მიუსვლელობის მიზეზის გასარკვევად დამიბარეს პოლიციაში, _ გვითხრა ჯიქიამ.
გოჩა ჯიქიასთვის პოლიციას უწყება არ გაუგზავნია. ჩოხატაურის პოლიციის სამმართველოს უფროსის მოადგილემ, გოჩა თავაძემ და გამომძიებელმა თედო ჭანუყვაძემ მას სახლში 16 მარტს, დაახლოებით 8 საათისთვის მიაკითხეს და პოლიციაში დაუყონებლივ წაყოლა მოსთხოვეს:
_ მოვიდნენ და მითხრეს, რომ დაუყონებლივ წავყოლოდი. ვუთხარი, რომ მეორე დღეს მივიდოდი, თუმცა, უარი მითხრეს, _ აღნიშნა ჯიქიამ.
მისი დაკითხვა ერთ საათზე მეტ ხანს გაგრძელდა. როგორც ჯიქიამ “გურია ნიუსთან” საუბრისას თქვა, ზეწოლას ადგილი არ ჰქონია და კითხვები მის პარტიულ საქმიანობას არ ეხებოდა:
_ მხოლოდ ის აინტერესებდათ, რატომ არ მივედი კონტროლის პალატაში დაკითხვაზე. ვუთხარი, რომ თბილისში ვიყავი და ამავე დროს, უწყებაზე არ იყო მითითებული, სად უნდა მივსულიყავი, შესაბამისად ვერ მოვახერხე მისვლა, _ ამბობს ჯიქია.
მისივე თქმით, პოლიციაში დააწერინეს, რომ იმ შემთხვევაში, თუკი პოლიცია ან კონტროლის პალატა ისევ დაიბარებდა, გამოცხადებას თავს არ აარიდებდა: _ პროკურატურა არ უხსენებიათ. მკითხეს, თუკი პოლიცია ან კონტროლის პალატა ისევ დაგიბარებთ, ხომ არ აარიდებთ გამოცხადებას თავსო, _ გვითხრა ჯიქიამ.
ჯერჯერობით, პოლიციაში არ დაუბარებიათ კიდევ ერთი “რესპუბლიკელი” _ მამუკა ცინცაძე, რომელიც ჯიქიას მსგავსად, 13 მარტს გამოიძახა კონტროლის პალატამ.
ჩვენი ინფორმაციით, პოლიცია ყველა იმ ადამიანს დაკითხავს, რომელმაც კონტროლის პალატის წარმომადგენლებთან გასაუბრება სხვადასხვა მიზეზით ვერ მოახერხეს. ჩვენი წყაროს თქმით, ამ ადამიანებს კონტროლის პალატის კითხვებზე პასუხის გაცემაც მოუწევთ.
