თერჯოლასთან, დროებითი ავტომაგისტრალის დაზიანების გამო, აღმოსავლეთ საქართველოდან დასავლეთ საქართველოს მიმართულებით გადაადგილება ზესტაფონი-ბაღდათის გზით არის შესაძლებელი, თუმცა, ავტომანქანების ნაკადის სიჭარბის გამო, სოფელ სვირთან საცობებია.
როგორც "გურია ნიუსს" ზესტაფონიდან აცნობეს, მდინარე ყვირილაზე გადასასვლელი ხიდი მანქანების ნაკადს ვერ ატარებს, რის გამოც მძღოლებს რამდენიმე საათით საცობში დგომა უწევთ.
ცნობისთვის, მდინარე ყვირილაზე არსებულ ხიდზე, რომლითაც ზესტაფონი ბაღდათის რაიონს უკავშირდება, მხოლოდ ცალმხრივი მოძრაობაა შესაძლებელი. ამასთანავე, მოძრაობას ხელს უშლის სოფლებში არსებული მკვეთრი მოსახვევები და ვიწრო გზა.
როგორც ადგილობრივები "გურია ნიუსთან" საუბრისას ამბობენ, გზის ამ მონაკვეთზე რამდენიმე ადგილზე მეწყერსაშიში ზონაა. უხვმა ნალექმა კი, მიწის მასების მოძრაობა გამოიწვია და მოასფალტებული გზის ნაწილი საგრძნობლადაა დაწეული.
გარდა ამისა, ადგილობრივები აცხადებენ, რომ ყვირილაზე არსებული ხიდის მდგომარეობაც შესამოწმებელია. მათი ინფორმაციით, რამდენიმე თვის წინ ხიდზე ნაპრალები გაჩნდა, თუმცა საფუძვლიანად მისი შეკეთება არ მომხდარა.
"ყვირილის ხიდი უკვე კარგა ხანია რამდენიმე ადგილას გაბზარულია, თუმცა, არავის შეუკეთებია, მხოლოდ ზედაპირულად გადაასწორეს გზის საფარის დაგებისას. ერთი კვირაა სვირის მონაკვეთზე მანქანების მოძრაობა არ წყდება. 48-ტონიან ტრაილერებს ეს ხიდი როგორ გაუძლებს არ ვიცით. სამი მანქანა უკვე დაზიანდა ამ ვიწრო გზებზე. ერთი რამდენიმე დღის წინ მეორე სვირთან ამობრუნდა და ცეცხლი გაუჩნდა. იმდენად ვიწრო მონაკვეთებია, ორი მანქანა გვერდს ერთმანეთს ვერ უვლის", _ ამბობენ ადგილობრივები და დასძენენ, რომ ზესტაფონი-სვირის მონაკვეთზე რამდენიმეკილომეტრიანი საცობებია.
"გურია ნიუსი" ინფორმაციის გადასამოწმებლად საქართველოს რეგიონული განვითარებისა და ინფრასტრუქტურის სამინისტროს დაუკავშირდა.
უწყებაში აცხადებენ, რომ ყვირილაზე არსებული ხიდის მდგრადობა-მედეგობა შემოწმებულია.
"ხიდი აქამდეც შემოწმებული იყო, თუმცა, როდესაც შემოვლითი გზა ამ მონაკვეთზე გავხსენით, მაშინაც შევამოწმეთ. პრობლემები არ აქვს", _ აცხადებენ სამინისტროში და დასძენენ, რომ თერჯოლასთან მდინარე ჩხარაზე დროებითი გადასასვლელი სავარაუდოდ ამაღამ ან ხვალ გაიხსენება.
რაც შეეხება სოფელ მეორე სვირში ავტომანქანის ამობრუნების და დაწვის შემთხვევას, შინაგან საქმეთა სამინისტროში მომხდარს ადასტურებენ.
"სამი დღის წინ სოფელ მეორე სვირში მსუბუქი ავტომანქანა ნამდვილად ამობრუნდა და დაიწვა. თუმცა შემთხვევის შედეგად არავინ დაშავებულა. მანქანაში მხოლოდ მძღოლი იმყოფებოდა, რომელმაც გადმოსვლა მოასწრო. ავტოსაგზაო შემთხვევა ადმინისტრაციულად გაფორმდა", _ უთხრეს "გურია ნიუსს" სამინისტროში.
შეგახსენებთ, რომ უხვი ნალექის გამო, თერჯოლასთან, მდინარე ჩხარას ადიდებამ ავტომაგისტრალის თითქმის 30-მეტრიანი მონაკვეთი 11 ნოემბერს წაიღო, მას შემდეგ გადაადგილება თერჯოლის სოფლებისა და ზესტაფონი ბაღდათი-ქუთაისის შემოვლითი გზით არის შესაძლებელი.
შენიშვნა: ფოტოს ავტორი კახა მჭედლიძე
