ამერიკული გამოცემა „The Times“-ი პარიზელ შაჰიდ ასნა აიტბულასენზე საინტერესო ინფორმაციას აქვეყნებს. როგორც გაირკვა, 26 წლის ტერორისტმა ცხოვრების უმეტესი ნაწილი მორწმუნე მუსლიმისთვის მიუღებელი ცხოვრების წესით გაატარა.
ასნა აიტბულასენის დედა თვლის, რომ მის გოგონას „გონება გამოურეცხეს“. ნაცნობებისა და ნათესავების განცხადებებით,დაღუპულ თვითმკვლელ-ტერორისტს, რომელიც დასავლეთ ევროპაში პირველ ქალ თვითმკვლელ-ტერორისტად შერაცხეს, მოზარდობის ასაკში – დალევა, მოწევა და გართობა უყვარდა. სტუმრობდა ღამის კლუბებს, ურთიერთობა ნარკო-დილერებთანაც კი ჰქონდა და ყურანის მიმართ არანაირ ინტერესს არ ავლენდა. ამერიკული გაზეთის ინფორმაციით, ერთი წელიწადიც კი არ გასულა, რაც ასნამ ფარანჯის ტარება დაიწყო.
„ის თავის სამყაროში ცხოვრობდა. მე არასდროს დამინახავს, რომ მას ყურანი გადაეშალოს. მუდმივად თავის ტელეფონს ჩასცქეროდა და „Facebook“-ში ან „WhatsApp“-ში იმყოფებოდა“ – ჰყვება მისი ძმა იუსუფ აიტბულასენი.
გარდა ამისა, გოგონა სოციალური ქსელების ფანატი და ექსცენტრიკული ჩაცმულობის მოყვარულიც ყოფილა. ფართო შლიაპების სიყვარულის გამო მეტსახელი „კოვბოიც“ მიუღია.
შეგახსენებთ, 13 ნოემბრის საღამოს საფრანგეთის დედაქალაქში ტერაქტების სერია განხორციელდა, რომლის შედეგად არანაკლებ 132 ადამიანი დაიღუპა. საფრანგეთის პოლიციის გამოძიების თანახმად, ტერაქტების ორგანიზატორი აბდელჰამიდ აბაუდი იყო, რომელიც ასნა აიტბულასენის ბიძაშვილი გახლდათ.
18 ნოემბერს პარიზის გარეუბან სენ-დენიში, ფრანგული სპეც-სამსახურის “RAID”-ის ჩატარებული სპეც-ოპერაციის შედეგად 3 ტერორისტი მოკვდა. მათ შორის იყო 26 წლის ასნა აიტბულასენი, რომელმაც „შაჰიდის ქამარი“ გააქტიურა და თავი აიფეთქა.
