ქალაქ ოზურგეთის მუნიციპალიტეტში 2016 წლის ბიუჯეტის პროექტის განხილვა ჯერ არ მომხდარა. ჩვენს მიერ მოპოვებული ინფორმაციით, ამ ეტაპზე პროექტს საკრებულოს ფრაქციები და კომისიები იხილავენ და ამ დღეებში გახდება ცნობილი თუ როგორ შეაფასებენ 2016 წლის მთავარ დოკუმენტს.
ქალაქ ოზურგეთის მუნიციპალიტეტის საკრებულოს პრესსამსახურის უფროსის, გია ბაბილოძის მიერ მოწოდებული ინფორმაციით, 2016 წლის ბიუჯეტის ძირითადი პრიორიტეტებია: ინფრასტრუქტურის მშენებლობა, რეაბილიტაცია და ექსპლოატაცია; კულტურა, რელიგია, ახალგაზრდული და სპორტული ღონისძიებები; განათლება; მოსახლეობის ჯანმრთელობის დაცვა და სოციალური უზრუნველყოფა.
ქალაქ ოზურგეთის მუნიციპალიტეტის 2016 წლის ბიუჯეტის ასიგნებები შეადგენს 9073,2 ათ ლარს, მ. შ: ხარჯები -7107,9 ათ. ლარს, არაფინანსური აქტივების ზრდა- 1934,3 ათ. ლარს, ვალდებულების კლება – 31,0 ათ. ლარს.
ფუნქციონალური კლასიფიკაციის მიხედვით ქალაქ ოზურგეთის მუნიციპალიტეტის ბიუჯეტის ხარჯებისა და არაფინანსური აქტივების ზრდა განსაზღვრულია 9042,2 ათ. ლარის ოდენობით.
ქალაქ ოზურგეთის მუნიციპალიტეტის საკრებულოს დეპუტატმა და "თავისუფალი დემოკრატების" ლიდერმა თემურ სალუქვაძემ, განაცხადა რომ უახლოეს პერიოდში ორი საინიციატივო წინადადებით წარდგება საკრებულოს წინაშე.
"ოზურგეთში არსებობს საქველმოქმედო ასოციაცია "გურია", სადაც დღის სტაციონარში ირიცხებიან შეზღუდული შესაძლებლობების სტატუსის მქონე ბავშვები. 18 წლამდე დაფინანსების წყაროს წარმოადგენს ჯანდაცვის სამინისტრო, ხოლო 18 წლის ზემოთ ადგილობრივი მუნიციპალიტეტები. სტაციონარში მყოფი ბავშვები აუცილებლად საჭიროებენ ძვირადღირებულ გამოკვლევებს, რაც არც პროგრამულ ბიუჯეტშია გათვალისწინებული და სამწუხაროდ, არც მშობლებს აქვთ შესაბამისი თანხები. როგორც საკრებულოს დეპუტატი, ვაყენებ წინადადებას, 2016 წლის რაიონისა და ქალაქის მუნიციპალიტეტების ბიუჯეტში გათვალისწინებულ იქნას იმ ძვირადღირებული გამოკვლევების თანხები, რომლებსაც საჭიროებენ დღის ცენტრის ბავშვები წელიწადში ორჯერ.
ასევე, მოგეხსენებათ, რომ კერძოდ, C ჰეპატიტის დიაგნოზი საქართველოში წლების განმავლობაში ფაქტობრივად სასიკვდილო განაჩენად აღიქმებოდა. წელს გამოცხადებული "C ჰეპატიტის პროგრამა სამოქალაქო სექტორისთვის", შეიძლება ითქვას, მნიშვნელოვანი შემობრუნების დასაწყისია. სახელმწიფოს მხრიდან დიდი თანადგომის მიუხედავად, არსებული მძიმე სოციალური ფონიდან გამომდინარე, ბევრი დაავადებული ადამიანი ვერ ახერხებს გარკვეული სახის წინასწარი კვლევების ჩატარებას, რაც პროგრამაში მონაწილეობის აუცილებელ პირობას წარმოადგენს და პროგრამის ფარგლებში არ ფინანსდება. დამერწმუნეთ, ეს ფაქტორი კიდევ უფრო ამძიმებს დაავადებულთა ფიზიკურ და ფსიქოლოგიურ მდგომარეობას. დამეთანხმებით, ალბათ, რომ ასეთი პრობლემის მქონე ადამიანები, თქვენც ხშირად შეგხვედრიათ. ვფიქრობ, სასურველია და აუცილებელი, 2016 წლის ბიუჯეტში გამოინახოს შესაბამისი მიზნობრივი თანხები და C ჰეპატიტით დაავადებული ადამიანების (მუნიციპალიტეტში მცხოვრები) წინასწარი დიაგნოსტირების ღირებულების თანადაფინანსება მოახდინოს რაიონისა და ქალაქის მუნიციპალიტეტებმა." – გვითხრა თემურ სალუქვაძემ.
