ე.წ. "ისლამური სახელმწიფოს" წევრებმა გუშინ ახალი ვიდეო მიმართვა, ამჯერად ქართულ ენაზე გაავრცელეს.
მიმართვის ავტორები ქართველები არიან. დადასტურებული ინფორმაციით, ერთ-ერთი ჩოხატაურის მუნიციპალიტეტის სოფელ ზოტში მცხოვრები რობიკო პაქსაძეა, ორი მათგანი _ ბადრი ირემაძე და მამუკა ანთაძე ოზურგეთის მუნიციპალიტეტის სოფელ ნასაკირალში ცხოვრობენ, ხოლო მეოთხე, აჭარაში მცხოვრები გოჩა გაბოძეა.
როგორც გავარკვიეთ, რობიკო პაქსაძე ბოლოს მშობლიურ სოფელს ოქტომბერში სტუმრობდა.
_ მთელი ზაფხული სახლში იყო. სათიბში მეხმარებოდა. ოქტომბერში წავიდა თურქეთში, _ ამბობს „გურია ნიუსთან“ საუბრისას რობიკოს ძმა ოთარ პაქსაძე.
მისივე ინფორმაციით, რობიკო კარგი მოსწავლე იყო, ზოტის საჯარო სკოლა წარჩინებით დაამთავრა და სწავლა თურქეთში გააგრძელა:
_ ოქტომბერში წავიდა სასწავლებელში. კარგა ხანს გვეხმიანებოდა, რომ კარგად იყო, სწავლობდა. ბოლო რამდენიმე დღეა მასთან კონტაქტი არ გვაქვს. ათიოდე დღის წინ სოციალურ ქსელში გავრცელდა ფოტო და ამის შემდეგ დავვეჭვდით, გადამოწმება მოვინდომეთ, თუმცა, კონტაქტზე ვერ გავედით, _ ამბობს პაქსაძე.
მისივე ინფორმაციით, რობიკო გასულ წელს თურქულ ენას სწავლობდა, წელს კი არაბულის შესწავლა დაიწყო:
_ თეოლოგიით დაინტერესდა. რელიგიათმცოდნეობა, ზოგადად, კარგიაო ამბობდა, სხვა არასდროს არაფერი უთქვამს. რაიმე რომ შემემჩნია, სარფში არ გადავაშვებინებდი, ვიტყოდი და მერჩივნა, აქ დაეჭირათ, აქ ყოფილიყო ციხეში, ვიდრე სხვაგან.
ოთარ პაქსაძე ამბობს, რომ ამბობს მის ძმას ფინანსური პრობლემა არ ქონია:
_ ჩასარიცხი ფულიც კი არ სჭირდებოდა. სახელმწიფო დაფინანსებას იღებდა, კარგად სწავლობდა. გამორიცხულია ეს ნაბიჯი ფულის გამო გადაედგა, _ ამბობს პაქსაძე ჩვენთან საუბრისას.
მისივე თქმით, რობიკო მორწმუნე ადამიანი კი იყო, მაგრამ რადიკალური არ ყოფილა.
პაქსაძე გამორიცხავს, რომ მისი ძმა ვაჰაბიტი იყო. ამბობს იმასაც, არასოდეს უკონტაქტია სოფელ ზოტის მკვიდრთან, სირიაში წასულ მებრძოლთან თამაზ ჭაღალიძესთან.
_ ვერ ვიტყვი, რომ თამაზს არ ვიცნობდით, მაგრამ კონტაქტი ნამდვილად არ გვქონია. მიუხედავად იმისა, რომ თანასოფლელები ვართ, ჩემს ეზოშიც კი არ არის ნამყოფი, _ დასძენს ჩვენი რესპონდენტი.
პაქსაძეების ოჯახი რობიკოს სირიაში წასვლის გამო, ძალიან წუხს:
_ 67 წლისაა მამაჩემი და ამ ამბის გამო ძალიან ცუდადაა, წამლების ქვეშაა. წარმოუდგენელია რაც მოხდა, _ დასძენს პაქსაძე და განმარტავს, რომ „ისლამური სახელმწიფოს“ წევრების იდეოლოგია ყველა მუსულმანისთვის მიუღებელია:
_ ღმერთმა დაგვიფაროს ყველა ურწმუნო ადამიანისგან. ვინ იქნება, არ აქვს მნიშვნელობა. მუსულმანს მაგათთან კავშირი არა აქვს. მე მუსულმანი ვარ, მორწმუნე ვარ, მაგრამ მაგათი არც მწამს და არც ვემხრობი. მუსლიმობა სულ სხვა რაღაცაა _ ვიღაცის კვლას და წამებას არ ითვალისწინებს ჩვენი სარწმუნოება.
ოთარ პაქსაძის თქმით, საქართველოში, კერძოდ კი ჩოხატაურში, მშვიდად ცხოვრობენ და მათ მიმართ დევნა, შევიწროება, რელიგიურ ნიადაგზე უსიამოვნება არასდროს მომხდარა:
_ ეს არც რობიკოს აწუხებდა, რადგან არასდროს უგრძვნია მსგავსი რამ. მე ყოველ პარასკევს მეჩეთში დავდივარ, არავინ მოსულა და უთქვამს, რომ სხვა სარწმუნოების ვარ,, არასდროს არავის შევუვიწროვებივარ და ცუდი არავის უთქვამს. არავინ არაფერს გვიკრძალავს. ეს რომ ვიღაცას დავაბრალო, გამორიცხულია. იქ ჩასული სულელი თუ ამას ამბობს, ვერ დავეთანხმები. მაშინ ჩვენც უნდა გვავიწროებდნენ, გვდევნიდნენ… გამორიცხულია ეგ იმისთვის წასულიყო, რომ აქ ცუდად გრძნობდა თავს, _ გვითხრა პაქსაძემ.
