"გურია ნიუსის" ინფორმაციით, ოზურგეთის მუნიციპალიტეტის საკრებულომ გამგეობას 2016 წლის ბიუჯეტის პროექტი დაუბრუნა. ეს ინფორმაცია ჩვენთან საუბრის დროს ოზურგეთის მუნიციპალიტეტის საკრებულოში დაადასტურეს.
თუ რა შენიშვნები აქვს საკრებულოს ამას "გურია ნიუსიდან" გაიგებთ.
"ოზურგეთის მუნიციპალიტეტის წარმოდგენილი ბიუჯეტის პროექტი ვერ აკმაყოფილებს პროგრამული ბიუჯეტის სტანდარტებს, რომელიც განსაზღვრულია ფინანსთა მინისტრის 2011 წლის 8 ივლისის N 385 ბრძანებით.
მიგვაჩნია, პროგრამული ბიუჯეტის ძირითადი უპირატესობა, თქვენს მიერ წარმოდგენილ ტრადიციული, ორგანიზაციული სტრუქტურის მქონე ბიუჯეტთან შედარებით მდგომარეობს იმაში, რომ იგი საშუალებას იძლევა ორიენტირებული იყოს შედეგებზე. პროგრამულ ფორმატში ნათელია მიზეზ-შედეგობრივი კავშირი კონკრეტულ პროგრამებში ჩადებულ ფინანსურ რესურსებსა და დაგეგმილ (მოსალოდნელ) შედეგებს შორის.
აუცილებელია პროგრამული ბიუჯეტის შესრულების მონიტორინგისა და ანგარიშგებისას ნათლად გამოჩნდეს მიღწეული შედეგები და არა მხოლოდ განხორციელებული ღონისძიებები და ათვისებული ასიგნებანი; შესაბამისად ბიუჯეტის შესრულების შეფასებისას აქცენტი უნდა იყოს დაგეგმილ და მიღებულ შედეგებს შორის არსებულ განსხვავებზე და არა მხარჯავი დაწესებულებების დამტკიცებული და დაზუსტებული გეგმით გათვალისწინებულ ასიგნებებსა და საკასო შესრულებას შორის არსებულ განსხვავებაზე;
წარმოდგენილი პრიორიტეტების დოკუმენტი არ პასუხობს ჩვენს მიერ განსახორციელებელ ადმინისტრაციული ერთეულების განვითარების ძირითად გეგმას, რომელიც ასახავს ინფორმაციას საშუალოვადიანი სამოქმედო გეგმების შესახებ, ანუ იგი უნდა მოიცავდეს ძირითად, სტაბილურად განვითარებად მიმართულებებს, რომლებიც რადიკალურ ცვლილებებს არ უნდა ექვემდებარეობდეს, რადგან იგი ამავდროულად გვაწვდის ინფორმაციას თითოეული პრიორიტეტის პროგრამულ ნაწილსა და აღწერილობით ნაწილზე.
ამ კუთხით ოზურგეთის მუნიციპალიტეტის 2016-2019 წლების პრიორიტეტების დოკუმენტი მნიშვნელოვნად განსხვავდება 2015-2018 წლების პრიორიტეტების დოკუმენტისაგან, რაც ჩვენი მოსაზრებით პოლიტიკურად არასწორია.
აქედან გამომდინარე, მიზანშეწონილად მიგვაჩნია პრიორიტეტების დოკუმენტი დალაგდეს შემდეგი თანმიმდევრობით: ინფრასტრუქტურის მშენებლობა, რეაბილიტაცია და ექსპლოატაცია; განათლება; მოსახლეობის ჯანმრთელობის დაცვა და სოციალური უზრუნველყოფა; კულტურა, რელიგია, ახალგაზრდობის ხელშეწყობა და სპორტი;
ბიუჯეტის შემოსულობების მაჩვენებელში 2016 წლის ბუნებრივი რესურსებით სარგებლობის გეგმიური მოსაკრებელი (კოდი 14151) წარმოდგენილია 49.4 ათასი ლარის ოდენობით. მიზანშეწონილია აღნიშნული მაჩვენებელი გაიზარდოს მიმდინარე წლის გეგმიურ მოცულობამდე და შეადგინოს 180,0 ათასი ლარი;
არაა დაგეგმილი შემოსავლები მიწის იჯარიდან და მართვაში გადაცემიდან (2015 წლის ბიუჯეტის შესაბამისი გეგმა 30,0 ათას ლარს შეადგენს) .
მიზანშეწონილია შემოსავლების აღნიშნული გეგმა (კოდი 14154) განისაზღვროს 30,0 ათასი ლარის ოდენობით.
აქედან გამომდინარე, მიზანშეწონილად მიგვაჩნია, ოზურგეთის მუნიციპალიტეტის ბიუჯეტის საშემოსავლო ნაწილი გაიზარდოს მინიმუმ 160,0 ათასი ლარით და ნაცვლად 8338,0 ათასი ლარისა შეადგინოს 8498,0 ათასი ლარი; 2016 წლის ბიუჯეტის პროექტში წარმომადგენლობითი და აღმასრულებელი ორგანოების დაფინანსებაში გათვალისწინებულია პრემია 177,8 ათასი ლარის ოდენობით.
საკრებულოს მიაჩნია, როგორც 2015 წელს, ასევე 2016 წელსაც წარმომადგენლობითმა და აღმასრულებელმა ორგანოებმა უარი უნდა თქვან პრემიალურ თანხებზე; მიზანშეუწონლად მიგვაჩნია ბიუჯეტის ხარჯვით ნაწილში მუხლი "კულტურა, რელიგია, ახალგაზრდული და სპორტული ღონისძიებები"(ორგ კოდი 05 00) დაფინანსებული იქნას 883,3 ათასი ლარით.
განსაკუთრებით გადასახედია შესაბამისი დარგის ა.(ა) ი. პ.-ის დაფინანსება; მიზანშეწონილად მიგვაჩნია გაზიარებულ იქნას სივრცით-ტერიტორიული დაგეგმარების და ინფრასტრუქტურის კომისიის ინიციატივა, ბიუჯეტის ხარჯვით ნაწილში 150,0 ათასი ლარით გაიზარდოს "ინფრასტრუქტურის მშენებლობა, რეაბილიტაცია და ექსპლოატაცია" მუხლის დაფინანსება; მიზანშეწონილად მიგვაჩნია დაფინანსდეს შემდეგი სოციალური პროგრამები: ფრაქცია "ქართული ოცნება-დემოკრატიული საქართველოს" ინიციატივა: დაფინანსდეს პედაგოგთა მგზავრობის ღირებულება როგორც მუნიციპალურ, ასევე კომერციულ მარშრუტებზე. ამ პროექტის დაფინანსებისათვის საჭიროა 60,0 ათასი ლარი. ფრაქცია "ქართული ოცნება-ეროვნული ფორუმის" ინიციატივა: მუნიციპალიტეტის ტერიტორიაზე რეგისტრირებულ ომისა და სამხედრო ძალების ვეტერანთა სოციალური დახმარების მიზნით მოხმარებული ბუნებრივი აირის კომუნალური გადასახადის დაფინანსება (დეკემბერი – იანვარი – თებერვალი – მარტი 10 ლარი, დანარჩენი თვეები 5 ლარი). წლიურად პროექტის ღირებულება შეადგენს 38,0 ათას ლარს; მიზანშეწონილად მიგვაჩნია C ჰეპატიტით დაავადებულ პირების კვლევის დაფინანსების პროგრამა დაფინანსდეს 100%-ით. პროექტის ღირებულება შეადგენს 40,0 ათას ლარს; პროექტის განმარტებით ბარათში წარმოდგენილი ბიუჯეტის შემოსულობების მაჩვენებლები და ცხრილის ფორმატით მოცემული შემოსულობების მაჩვენებლები ერთმანეთს არ ემთხვევა. მიზანშეწონილად მიგვაჩნია ჩასწორდეს აღნიშნული შეუსაბამობა;“ – წერს საკრებულო გამგეობას.
"შენიშვნების აბსოლუტური უმრავლესობა მისაღებია და სამართლიანია. აუცილებლად იქნება გათვალისწინებული ბიუჯეტის ახალი ვერსიის შექმნის დროს." – თქვა ჩვენთან საუბრის დროს ოზურგეთის მუნიციპალიტეტის გამგეობის საფინანსო-საბიუჯეტო სამსახურის უფროსმა გია მამაკაიშვილმა.
