ოზურგეთის მუნიციპალიტეტის გამგებელი, მერაბ ჭანუყვაძე სოფელ ორმეთში (შრომა) აქციის მონაწილეებს შეხვდა.
"სოფელში არის კარიერი, სადაც სატვირთო მანქანები დადის. ეს მანქანები ეკუთვნის ჩინურ კომპანიას. სოფელში მცხოვრები ჩინურ კომპანიას სთხოვდნენ გზის დაგებას. ოზურგეთის მუნიციპალიტეტი გზის მოხრეშას და გამაგრებით სამუშაოებს შეასრულებს. ასევე მინდა გითხრათ, რომ ამ გზის პროექტირებას ვიწყებთ და როგორც კი გამოჩნდება საშუალება კაპიტალურად შევაკეთებთ. ასევე, მოსახლეობასთან შევთანხმდით იმაზე, რომ მომავალ წელს ორმეთში დაიწყება ელექტრო მრიცხველების დამონტაჟება, რაც ამ დრომდე არ გაკეთებულა" _ გვითხრა მერაბ ჭანუყვაძემ.
ცნობისთვის, დღეს ორმეთში მცხოვრებლებმა ის გზა გადაკეტეს, რომლითაც ჩინური კომპანიის მანქანები გადაადგილდებოდნენ. მოსახლეობა ჩინურ კომპანიას გზის დაგებას სთხოვდნენ. კომპანიის წარმომადგენლების თქმით კი, გზის დაგება მათ არ ავალდებულებდა.
"თავისუფალი დემოკრატების" ლიდერი, თემურ სალუქვაძე ამბობს, რომ ორმეთელების პრობლემები ახალი არ არის.
"ამის შესახებ ჩვენ "თავისუფალი დემოკრატები", ჯერ კიდევ, 2012 წლის არჩევნებამდეც ვსაუბრობდით და ვითხოვდით იმ დროინდელი ხელისუფლებიდან, ყურადღება გამოეჩინა სოფლის მოსახლეობის მოთხოვნების მიმართ … შეიცვალა ხელისუფლება, მაგრამ ორმეთელებისთვის არაფერი შეცვლილა, პირიქით, დამძიმდა კიდეც. ხალხი თავს გრძნობს დაუცველად, მოტყუებულად და მიტოვებულად. კარიერის ფუნქციონირებამ მძიმე ვითარებაში ჩააყენა ადგილობრივი მოსახლეობა, გაუსაძლისი გახადა ცხოვრება. ასევე, ამორტიზირებული ელექტროგადამცემი სისტემა და სხვა მრავალი პრობლემა, აიძულებს სოფლის მოსახლეობას ასეთი ფორმით გამოხატოს პროტესტი. მინდა, შევახსენო ხელისუფლებას ხელისუფლებას, ეს ის მოსახლეობაა, რომელთა თანადგომით მოხვედით ხელისუფლებაში. ნება იბოძეთ და სასწრაფოდ მიიღეთ შესაბამისი ზომები! დაპირებებს შესრულება უნდა! აუცილებელია, სასწრაფოდ გაიმართოს კერძო კომპანიის წარმომადგენლებთან, შესაბამისი სტრუქტურების წარმომადგენლების შეხვედრა, სადაც განხილული იქნება მოსახლეობის სამართლიანი მოთხოვნები და მაქსიმალურად დაცული მათი უფლებები. ასევე, აღნიშნული პრობლემების მოგვარება, გათვალისწინებულ იქნას მიმდინარე 2016 წლის ბიუჯეტში.“ _ თქვა თემურ სალუქვაძემ
