საქართველოს პარლამენტის წევრი ანი მიროტაძე მიიჩნევს, რომ ჩოხატაურის საკრებულოს თავმჯდომარის, ზაალ მამალაძის ოჯახის დაყაჩაღების ფაქტი სახელმწიფოსთვის ძალიან დიდი გამოწვევაა.
"გურია ნიუსის" კითხვაზე როგორ შეაფასებთ ჩოხატაურში მომხდარ ფაქტს – საკრებულოს თავმჯდომარის, სიის პირველი ნომრის დაყაჩაღებას და არის თუ არა ეს სახელმწიფოს გამოწვევა? – მიროტაძე გვპასუხობს:
"მე საერთოდ რანგირებით და სოციალური მდგომარეობის მიხედვით არ ვაფასებ, როდესაც საქმე ეხება კრიმინალს. კრიმინალი არის კრიმინალი და ყველა კრიმინალური ფაქტი არის სახელმწიფოს გამოწვევა. ზოგადად ყველა ფაქტი გამოწვევაა. როდესაც საკრებულოს თავმჯდომარეს ეხება საქმე და თანამდებობის პირს, მე შემიძლია ვთქვა ეს კიდევ უფრო ამძიმებს ვითარებას. გამოწვევა ყველა შემთხვევაში არის და ვამბობ ყველა კრიმინალური ფაქტი გამოწვევაა. სახელმწიფომ ყველაფერი უნდა გააკეთოს იმისთვის ეს დანაშაული გაიხსნას თუ აქამდე გახსნილი არ არის", _ განაცხადა მიროტაძემ.
შეგახსენებთ, რომ ჩოხატაურის მუნიციპალიტეტის საკრებულოს თავმჯდომარის ზაალ მამალაძის ოჯახი 28 ნოემბერს, დაახლოებით 21 საათსა და 30 წუთზე დააყაჩაღეს. თავდამსხმელებს სახეზე სამედიცინო ნიღბები ეკეთად.
ზაალ მამალაძის მეუღლე სტომატოლოგია და როგორც გვითხრა იმ დროს პაციენტს ელოდებოდა:
_ პაციენტებს ველოდებიდი. დაახლოებით ათის ნახევარი იქნებოდა, როცა კარზე დააკაკუნეს და ზაალი იკითხეს. კარი გავაღე თუ არა შემოიჭრნენ იარაღებით, _ იხსნებეს ნინო მამალაძე.
ყაჩაღები ოქროს და ფულს ითხოვდნენ და სისასტიკით გამოირჩეოდნენ. ზაალ მამალაძეს წინააღმდეგობის გაწევის შემდეგ ფიზიკური შეურაცხყოფა მიაყენეს. ფიზიკური ძალა გამოიყენეს ნინო მამალაძის მიმართაც. თავდამსხმელებმა ფიზიკური შეურაცხყოფის შემდეგ ოჯახის წევრები დააბეს და მიმდებარე ტერიტორია ზაალ მამალაძის კუთვნილი ავტომობილით დატოვეს.
აღსანიშნავია, რომ ეს ყველაფერი იმ დროს მოხდა, როცა პოლიცია რეიდებს ატარებდა და ავტომანქანებს, მგზავრებსა და ფეხით მოსიარულეებსაც, საფუძვლიანად ამოწმებდა. უნდა ითქვას ისიც, რომ ზაალ მამალაძის სახლი ჩოხატაურის პოლიციის შენობიდან ორასიოდე მეტრში მდებარეობს. თვითმხილველების თქმით, ყაჩაღობის დროს მამალაძეების სახლის მიმდებარე ტერორიტიაზე საპატრულო ეკიპაჟი მოძრაობდა და ეს იქვე მდებარე "ავერსის" საავადმყოფოს და "ვისოლის" ავტოგასამართი სადგურის კამერებმაც დააფიქსირა. გატაცებული ავტომობილი, გურიის სამხარეო პოლიციის თანამშრომლებმა გუშინ, დაახლოებით 16 საათზე სამტრედიაში იპოვეს. ამ დრომდე უცნობია დამნაშავეების ვინაობა.
