ლანჩხუთის საკრებულოს თავმჯდომარე, გოგი ხელაძე კოლეგის, ჩოხატაურის მუნიციპალიტეტის საკრებულოს თავმჯდომარის ოჯახის დაყაჩაღების ფაქტს შემაძრწუნებელს უწოდებს.
"მე ძალიან ახლო ურთიერთობა მაქვს ბატონ ზაალთან, ამ ფაქტის შემდეგ ვესაუბრე კიდეც მას. გაოგნებული ვარ მომხდარით, ეს იყო ნამდვილად შემაძრწუნებელი ამბავი ყველასთვის. სამართალდამცავმა უწყებებმა რაც შეიძლება მალე უნდა გაატარონ ოპერატიულ-სამძებრო სამუშაოები და უზრუნველყონ დამნაშავეების დაპატიმრება. მალე უნდა გაირკვეს, სინამდვილეში რასთან გვქონდა საქმე- მართლა ყაჩაღობასთან თუ სხვა რამესთან. არ უნდა შევუწყოთ ხელი საზოგადოებაში დაუცველობის სინდრომის გაღვივებას", _ განაცხდა გოგი ხელაძემ.
ლანჩხუთის მაჟორიტარი დეპუტატი საქართველოს პარლამენტში თემურ ჩხაიძე, ორიოდე დღის წინ ჩოხატაურში მომხდარ შემთხვევას, რა დროსაც საკრებულოს თავმჯდომარის ოჯახი დააყაჩაღეს შემაშფოთებელს უწოდებს:
"ძალიან ცუდი ფაქტი მოხდა და ყველა ვალდებულები ვართ გვერდით დავუდგეთ ამ ოჯახს, რაც შეიძლება მალე უნდა გაირკვეს სინამდვილე. ჩემი აზრით, არა მგონია ეს შემთხვევა ვინმეს დაშინებას და დაშანტაჟებას ემსახურებოდა, მე უფრო შეცდომა მგონია. უტყუარია, რომ, რაც შეიძლება სწრაფად უნდა მოხდეს საქმის გამოძიება და დამნაშავეების დასჯა", _ აღნიშნავს ჩხაიძე.
პარტია "თავისუფალი დემოკრატების" ადგილობრივი ორგანიზაციის თავმჯდომარის ვახტან ზენაიშვილი მომხდარს ხელისუფლების სისუსტედ აღიქვამს, რადგან მისი აზრით, "ხელისუფლება, რომელიც სოციალისტური ნაგავითაა თავგამოჭედილი, არ გააჩნია პოლიტიკური ნება და კულტურა ხელი შეუწყოს ქვეყნის თავისუფალ, დემოკრატიულ გარემოში განვითარებას".
"რაც მეტი აკრძალვა და რეიდები იქნება, პირდაპირი თუ გადატანითი მნიშვნელობით, მით მეტი ავაზაკი და ქურდი გვეყოლება. ფაქტია, რომ მომხდარმა შემთხვევამ კიდევ უფრო გაზარდა დაუცველობის შეგრძნება მოსახლეობაში".
ყველაფერი რაც ჩვენს ქვეყანაში ხდება პოლიციაზე მეტად იმ დანაშაულებრივი რეჟიმის დამსახურებაა, რომელიც ივანიშვილმა ჩამოაყალიბა. ქვეყანაში სადაც კრიმინალი არის წახალისებული, სადაც კრიმინალი და ხელისუფლება ერთ მოედანზე ძოვს და მეტიც, ისინი ანგარიშგასაწევ პერსონებად ითვლება, შედეგებიც ფატალურია!
შეიძლება ითქვას არა მხოლოდ გურიაში, არამედ საქართველოს მასშტაბით უპრეცედენტო შემთხვევა მოხდა ბოლო 12 წლის განმავლობაში", _ აღნიშნავს ზენაიშვილი
"ჩოხატაურის საკრებულოს თავმჯდომარის ზაალ მამალაძის ოჯახი დააყაჩაღეს დაბა ჩოხატაურში,რომელიც ამავდროულად გამომცემლობა "გურია ნიუსის" რედაქტორის ია მამალაძის ძმაა. მგონი, ზემოთ ჩამოთვლილი საკმარისია რომ ამ ძალიან სამწუხარო, შემთხვევას ვუწოდოთ უპრეცედენტო და არ გადავაჭარბებ თუ ვიტყვი, რომ წლის სკანდალია. თანადგომა დაზარალებულ ოჯახს!" _აცხადებს ლანჩხუთის საკრებულოს ოპოზიციონერი დეპუტატი კახა ასკურავა.
შეგახსენებთ, რომ ჩოხატაურის მუნიციპალიტეტის საკრებულოს თავმჯდომარის ზაალ მამალაძის ოჯახი 28 ნოემბერს, დაახლოებით, 21 საათსა და 30 წუთზე დააყაჩაღეს. თავდამსხმელებს სახეზე სამედიცინო ნიღბები ეკეთათ.
ზაალ მამალაძის მეუღლე სტომატოლოგია და როგორც გვითხრა იმ დროს პაციენტს ელოდებოდა:
" პაციენტებს ველოდებოდი. დაახლოებით ათის ნახევარი იქნებოდა, როცა კარზე დააკაკუნეს და ზაალი იკითხეს. კარი გავაღე თუ არა შემოიჭრნენ იარაღებით", _ იხსნებეს ნინო მამალაძე.
ყაჩაღები ოქროს და ფულს ითხოვდნენ და სისასტიკით გამოირჩეოდნენ. ზაალ მამალაძეს წინააღმდეგობის გაწევის შემდეგ ფიზიკური შეურაცხყოფა მიაყენეს. ფიზიკური ძალა გამოიყენეს ნინო მამალაძის მიმართაც. თავდამსხმელებმა ფიზიკური შეურაცხყოფის შემდეგ ოჯახის წევრები დააბეს და მიმდებარე ტერიტორია ზაალ მამალაძის კუთვნილი ავტომობილით დატოვეს.
აღსანიშნავია, რომ ეს ყველაფერი იმ დროს მოხდა, როცა პოლიცია რეიდებს ატარებდა და ავტომანქანებს, მგზავრებსა და ფეხით მოსიარულეებსაც, საფუძვლიანად ამოწმებდა. უნდა ითქვას ისიც, რომ ზაალ მამალაძის სახლი ჩოხატაურის პოლიციის შენობიდან ორასიოდე მეტრში მდებარეობს. თვითმხილველების თქმით, ყაჩაღობის დროს მამალაძეების სახლის მიმდებარე ტერორიტიაზე საპატრულო ეკიპაჟი მოძრაობდა და ეს იქვე მდებარე "ავერსის" საავადმყოფოს და "ვისოლის" ავტოგასამართი სადგურის კამერებმაც დააფიქსირა. გატაცებული ავტომობილი, გურიის სამხარეო პოლიციის თანამშრომლებმა გუშინ, იმერეთის ტერიტორიაზე იპოვეს.
