ლანჩხუთში, ჟორდანიას ქუჩის #114 – ში მდებარე მრავალბინიანი საცხოვრებელი სახლის შიდა ეზოში საკანალიზაციო ჭის სიახლოვეს მიწა ჩავარდა და ხვრელი გაჩნდა, რომელიც შემდგომ სამშენებლო ბლოკებით ამოავსეს. თუმცა, ხვრელის გაფართოების რეალური საშიშროება არსებობს, რადგან მიმდებარე ტერიტორია წვიმისას გამუდმებით იტბორება.
აქ ცოტა ხნის წინ უშუალოდ საკანალიზაციო ჭა იყო დაზიანებული და ძლიერ წვიმაში წყალს ფეკალური მასებიც ემატებოდა. მართალია, უშუალოდ "გურია ნიუსის" ჩარევის შემდეგ "წყალმომარაგების კომპანიის" ლანჩხუთის თანამშრომლებმა დაუყოვნებლივ შეაკეთეს დაზიანებული ჭა, მაგრამ ამის შემდგომ უკვე სხვა პრობლემამ იჩინა თავი, რომლის მოგვარებაც მუნიციპალიტეტის პრეროგატივაა.
აღსანიშნავია, რომ მრავალბინიანი საცხოვრებელი სახლების შიდა ეზოს კეთილმოწყობა გათვალისწინებული იყო ქალაქის ცენტრის რეაბილიტაციის პროექტში, რომელიც დაპირებისამებრ ჯერ კიდევ ზაფხულში უნდა განხორციელებულიყო. საპროექტო ტენდერშიც გაიმარჯვა კიდეც ერთ-ერთმა კომპანიამ, მაგრამ სამუშაოები არ შეასრულა და საამისოდ ხელმეორე ტენდერიც ჩატარდა. თუმცა, საბოლოოდ მოხდა ისე, რომ თანხა არ ჩამოირიცხა და საუბრები წავიდა, რომ პროექტი გარდამავალი გახდებოდა, ანუ წელს დაწყებული საქმე მომავალი წლისთვის დასრულდებოდა.
მუნიციპალიტეტის გამგებლმა, ზაზა ურუშაძემ 27 ოქტომბერს გამართულ საკრებულოს სხდომაზე დაანონსა, რომ ქალაქის სარეაბილიტაციო სამუშაოების განხორციელება 2016 წლისთვის გადაიდო, რადგან დრო მცირეა და თანხების დახარჯვა შეიძლება ვერ მოესწროსო. თუმცა, შემდგეგ განაცხადა, რომ გარკვეული სამუშაოები წელს მაინც განხორციელდება და დაახლოებით 50 ათასი ლარი დაიხარჯებაო. ეს ნიშნავს იმას, რომ კიდევ ერთი პროექტი, 800 ათას ლარზე მეტი ღირებულების, მიმდინარე წელში ჩავარდა და გარდამავალი ეტაპის ბედი ირგუნა.
ჩვენ დავინტერესდით, წელს ასათვისებელ თანხაში არის თუ არა გათვალისწინებული აღნიშნული მრავალბინიანი სახლის მიმდებარე ტერიტორიის მოწესრიგება, თუმცა, მუნიციპალიტეტის გამგეობის ინფრასტრუქტურისა და არქიტექტურის სამსახურის უფროსმა, ლევან ჩხაიძემ განაცხადა, რომ ამ ეტაპზე ეს გარკვეული არ არის.
"ჯერ არ ვიცით რა სამუშაოები შესრულდება. რადგან ტენდერში მოგებულ კომპანიას ვადა მცირე აქვს, მასთან უნდა შევჯერდეთ, კონკრეტულად რა პროექტს განახორციელებს თვეზე ნაკლებ ვადაში. ამიტომ მოხდება თუ არა ამ ბინის ტერიტორიის ასფალტირება და სანიაღვრე არხის მოწყობა, ამას ვერ მოგახსენებთ. ერთს კი დანამდვილებით გეტყვით, რომ გაზაფხულამდე ეს პრობლემა აუცილებლად მოგვარდება", – თქვა ლევან ჩხაიძემ.
"მრავალი წელია ასე წყალში ვიხრჩობით, წვიმის დროს ისე იტბორება აქაურობა, ვერ გაივლი. ეს ორმოც სწორედ ამის შედეგია. არ ვიცით რომელი სამსახურიდან იყო, კაცი მოვიდა და სამშენებლო ბლოკით ამოავსო, მაგრამ ეს საქმეს ვერ უშველის, დროზე უნდა ყურადღების მიქცევა, სანამ უფრო არ გადიდებულა ორმო. ყველა არჩევნების წინ გვპირდებიან აუცილებლად გავითვალისწინებთ თქვენს პრობლემას და მოგიგვარებთო, თუმცა შედეგი აქამდე არ მოჰყოლია. ვიცოდით, წელს უნდა დაწყებულიყო სამუშაოები და გვეუბნებიან 2016 წელს იქნებაო. ეტყობა, ახლაც საარჩევნოდ უნდათ ჩვენი გულის მოგება, რომ მერე ხმები კარგად მიიღონ", – აცხადებენ ადგილობრივი მცხოვრებლები.
