ოფიციალურად მოპოვებული დოკუმენტით ცხადი ხდება, რომ საკრებულოს თავმჯდომარემ, ანტონ ხუნდაძემ ჩოხატაურის მუნიციპალიტეტის წარმომადგენლობით და აღმსრულებელ ორგანოში მოქალაქეთა მიღების მიზნით გასახორციელებელი ღონისძიებების თაობაზე ბრძანება 12 მარტს გამოსცა, რომლის თანახმად, მოქალაქეთა მიღება მოხდება მხოლოდ ადმინისტრაციულ შენობაში მდებარე მოქალაქეთა მომსახურების ცენტრის მეშვეობით. თანამდებობის პირებთან და საჯარო მოსამსახურეებთან მოქალაქეთა მიღებაზე ჩაწერას საკრებულოს და გამგეობის შესაბამისი მთავარი სპეციალისტები უზრუნველყოფენ, თუმცა, როგორც ფაქტები მოწმობენ, ამ სპეციალისტებისთვისაც ბევრი რამ გაუგებარია.
ორშაბათს, მოქალაქეთა მიღებაზე ჩაწერას გამგეობის საგარეო ურთიერთობის (?!) სპეციალისტი, სოფო ჯინჭარაძე ახორციელებდა. ჩვენს თხოვნაზე, ზემდგომთან შეეთანხმებინა და გამგეობის და საკრებულოს ოთახების წარწერების გადაღების უფლება მოეცა, კატეგორიული უარი გვითხრა:
_ თუ კონკრეტულ პირთან შეხება გაქვთ(?!), იმ შემთხვევაში შემიძლია გაშვება. მხოლოდ ამის უფლება მაქვს.
_ რისი უფლება გაქვთ, რომ ადმინისტრაციულ შენობაში არ შეგვიშვათ ფოტოების გადასაღებად?
_ ნუ, ამჟამად მე რაც მევალება, გიპასუხებთ და სხვა არ ვიცი.
_ რის საფუძველზე არ მიშვებთ შენობაში? შესაბამისი დოკუმენტი მაჩვენეთ.
_ არანაირი უფლება არ მაქვს ინფორმაცია სხვა მხრივ მოგაწოდოთ.
_ ინფორმაციას არ გთხოვთ, დოკუმენტს გთხოვთ.
_ მე რაც მევალება გიპასუხეთ და სხვა არ ვიცი.
_ ის იცით, რის საფუძველზე ზიხართ აქ საგარეო ურთიერთობის სპეციალისტი და აკონტროლებთ საშინაო მიმოსვლას?
_ დღეისთვის რაც დამავალეს, იმას ვაკეთებ.
_ მე არ გეკითხებით, რა დაგავალეს. გეუბნებით, ვარ ჟურნალისტი და მაქვს უფლება, რომ შევიდე ადმინისტრაციულ შენობაში.
_ სხვანაირად პასუხს ვერ გაგცემთ.
_ ხომ მეუბნებით, რომ მოქალაქეების შენობაში შეშვება უნდა შეათანხმოთ. ჰოდა, შეათანხმეთ. მინიმუმ ადექით, დაურეკეთ ზემდგომს და უთხარით, რას ვითხოვთ…
_ მე პასუხი გაგეცით და მეტი არ ვიცი.
_ რა გაქვთ დავალებული, რომ ჟურნალისტი არ შეუშვათ?
_ ნებისმიერმა მოქალაქემ უფლება უნდა აიღოს კონკრეტულ პიროვნებასთან და იმის საფუძველზე გავუშვებთ.
_ გეუბნებით, რომ აიღეთ უფლება, ვისთანაც გინდათ და შემიშვით. ამის გარკვევას, არა მგონია, დიდი ცოდნა დასჭირდეს.
_ მე გიპასუხეთ უკვე.
_ ეგ პასუხი არ გვაკმაყოფილებს. რამდენიმე წუთია, გიხსნით, რისი უფლება გვაქვს კანონით და თქვენ ამ კანონს არღვევთ. თუ არ გვიშვებთ შენობაში, მიზეზი უნდა დაგვიკონკრეტოთ.
ამ საუბარში, მოქალაქეთა მისაღების თანამშრომელი, სოფო ჩხიკვაძე ჩაერთო და და გვითხრა, რომ ზემდგომს საქმის კურსში ჩააყენებდა.
რამდენიმე წუთში შენობაში შესვლის ნებართვა მივიღეთ. ახალი წესები, ჩვენთვის, ჟურნალისტებისთვის რომ მუშაობაში ხელისშემშლელია, ზემოთ მოტანილი ფაქტებიც ცხადჰყოფს. სანამ ეგერთ წოდებულ სპეციალისტებს გავაგებინეთ, რატომ და ვისთან მივდიოდით, ნახევარ საათზე მეტი გავიდა.
თუმცა, “გამჭვირვალე” და “ხელისუფლების საქმიანობაში მოსახლეობის ჩართულობის” მქადაგებელი ჩინოვნიკების ეს “ნოვაცია” როგორც ჩანს, საჯარო მოხელეებს უფრო წაადგებათ, რადგან მათი უმეტესობა კაბინეტებში არ დაგხვდა. ადმინისტრაციული შენობის მესამე სართულზე, საკუთარ სამუშაო ოთახებში საკრებულოს კომისიის თითქმის არც ერთი თავმჯდომარე არ იმყოფებოდა. ადგილზე მხოლოდ სოციალურ საკითხთა კომისიის თავმჯდომარე, ზაურ ოსეფაიშვილი დაგვხვდა, რომელმაც, როგორც ყოველთვის ახლაც “დაგვმოძღვრა” და ბრძანა, რომ კაბინეტებში მყოფი პიროვნებების შემოწმების უფლება ჩვენ არ გვაქვს.
ახალი წესები ჩოხატაურში კონტროლის პალატის ვიზიტის შემდეგ აამოქმედეს. მართალია, ბრძანებას 12 მარტითაა დათარიღებული, თუმცა მან დღის სინათლე მხოლოდ 19 მარტს ნახა. ყოველ შემთხვევაში, 13 მარტს, როდესაც გამგეობაში შესვლას მხოლოდ განცხადების დატოვების მიზნით ვითხოვდით, ეს ბრძანდება არავის გახსენებია.
ბრძანების თანახმად, სპეციალისტი ვალდებულია აწარმოოს მოქალაქეთა მიღების აღრიცხვა სპეციალურ ჟურნალში, სადაც შედის მონაცემები მოქალაქის ვინაობის, მიღების თარიღის, განხილული საკითხისა და მიღების შედეგის თაობაზე. თუმცა, ჩვენი იქ ყოფნის განმავლობაში ასეთი რამ არც ერთ სპეციალისტს არ განუხორციელებია. საგანგებოდ ამ საქმისთვის “მივლინებული” საგარეო ურთიერთობის სპეციალისტი, შენობაში შემსვლელი მოქალაქეების ვინაობას, ფურცლებზე იწერდა და ზემოდან მიღებული მითითების შემდგომ, საშვის გარეშე უშვებდა.
_ უსაფრთხოებიდან გამომდინარე, ადმინისტრაციულმა ორგანომ შეიძლება შემოიღოს მსგავსი წესები. თუმცა, მნიშვნელოვანია ის ფაქტი, რომ ეს წესები დეტალურად გაწერილი უნდა იყოს და არ უნდა ეწინააღმდეგებოდეს საქართველოს კანონმდებლობას. ასევე, განთავსებული უნდა იყოს ხელმისაწვდომ ადგილას. მოცემულ შემთხვევაში სახეზეა მოვლენათა საეჭვო დამთხვევა, რომელიც მეტყველებს იმ ფაქტზე, რომ ეს წესები განგებ იქნა შემოღებული, _ აღნიშნა “გურია ნიუსთან” საუბრისას ქართული მედიის სამართლებრივი დაცვის ცენტრის ხელმძღვანელმა, ნათია კაპანაძემ.
