ოზურგეთში, რიგითი მოქალაქეების დატერორებას, კონტროლის პალატის პარალელურად, არც საგადასახადო სამსახური ერიდება.
“გურია ნიუსი” საშემოსავლო სამსახურის მიერ მარკეტების დაჯარიმების ფაქტების შესახებ უკვე წერდა. რედაქციაში მოდიან ადამიანები, რომლებიც საგადასახადო სამსახურის ქმედებაზე საუბრობენ, თუმცა, ზოგიერთი მათგანი ღიად საუბარს შიშის გამო მაინც ერიდება: _ რა ვიცი, უარესი არ დამმართონ, გადაგვეკიდებიან და გვირჩევნია, არაფერი ვთქვათო, _ ამბობენ ისინი. არიან ისეთებიც, რომლებიც სიმართლის ხმამაღლა თქმას არ ერიდებიან.
რამდენიმე დღის წინ, ოზურგეთში, ჭანტურიას ქუჩა #35-ში მდებარე ერთ-ერთი მარკეტი კერძო საგადასახადო სამსახურის ინსპექტორმა 500 ლარით დააჯარიმა. ამ ფაქტის შესახებ “გურია ნიუსს” “ახალი მემარჯვენეების” ოზურგეთის რაიონული განყოფილების თავმჯდომარემ, ავთანდილ სურგულაძემ აცნობა. მარკეტის თანამშრომელი ნინო შველიძე “გურია ნიუსთან” საუბარში აღნიშნავს, ეს იყო ნამდვილი თაღლითური ხერხით დაჯარიმება:
_ თბილისში ვმუშაობდი 15 წლის განმავლობაში, ვიყავი მენეჯერი, გამყიდველი, კონსულტანტი, მოლარე, მაგრამ ასეთი რამ, რაც ამ გოგომ მოიმოქმედა, თვალად არ მინახავს. ასეთი ქმედებები, როგორიც დღეს ხდება, ყოველგვარ ზღვარს სცილდება _ შემოვიდა, იყიდა ერთი ცალი კაკაო და ერთი ვანილი, სულ _ 70 თეთრის ღირებულების. ჯერ ერთი, როცა ასეთ სამსახურში მუშაობ და ხარ საგადასახადოს თანამშრომელი, სავალდებულოა თუ არა, რომ ჩაცმულობით და ქცევით საგადასახადო ინსპექტორს ჰგავდე? თავხედურად და თაღლითურად მომიდგა, უნდოდა რომ დავბნეულიყავი. მე სალარო აპარატის ქვითარი, თითქმის, ამოწერილი მქონდა, რომ მან დასტაცა პოლიეთილენის პარკს ხელი და გარეთ გავარდა. უცებ გავიაზრე, რომ რაღაც ხდებოდა და ქვითრის ამოწერა დავამთავრე. თვითონ კი შემოვიდა ორ წუთში, ორი თითით ასწია ქვითარი, უყურებს დროს საათზე და მეუბნება, დააგვიანეო. მე ვუთხარი, რომ გაიქეცი, მე სად მოგდიო,-მეთქი. მაღაზიაში მომხმარებელი მელოდებოდა.
უკაცრავად, მაგრამ ვიღაც ლაწირაკი იყო, რომელმაც უფროსთან როგორ მოიქცეს, ისიც არ იცის. დღეს, ასეთი მძიმე პირობების დროს, გვაქვს კი საშუალება, რომ ამხელა ჯარიმები ვიხადოთ? ამომიწერა 500-ლარიანი ჯარიმა. სადაა სამართალი, ამის მეტად ადამიანის ღირსებები დაცული არ უნდა იყოს, ასე თაღლითურად უნდა გამოსძალო ადამიანს ფული?!
_ თავი როგორ წარმოგიდგინათ?
_ მითხრა, კერძო საგადასახადოს ინსპექტორი ვარო.
“ახალი მემარჯვენეების” ოზურგეთის რაიონული განყოფილების თავმჯდომარე ავთანდილ სურგულაძე “გურია ნიუსთან” საუბარში ამბობს, რომ ამ ფაქტს თავად შეესწრო: _ მე ვიყავი ამ ფაქტის თვითმხილველი. ეს იყო არაადამიანური საქციელი. ვყიდულობდი სიგარეტს. დავინახე, რომ გამყიდველმა ქვითარი ამოწერა, თუმცა, მყიდველი არ დაელოდა და გარეთ გავარდა. მიზეზი ხომ უნდა ჰქონოდა? ეს მოხდა აშკარად გამიზნულად.
შემოსავლების სამსახურის ოზურგეთის მომსახურების ცენტრში “გურია ნიუსთან” ამ საკითხზე არავინ საუბრობს. მათ არა ერთხელ გვითხრეს, რომ კომპეტენტურები არ არიან, რადგან ეგრეთ წოდებული ინსპექტორები, ხელშეკრულების საფუძველზე, შემოსავლების სამსახურის მიერ დაქირავებული კერძო პირები არიანო(?).
