საზღვრისპირა სოფლების ერგნეთის, დიცის და ზარდიაანთკარში მცხოვრები მოსახლეობის დიდი ნაწილი ადგილობრივ ხელისუფლებას უყურადღებობაში ადანაშაულებს. სოფელ ერგნეთში მცხოვრები, ნიკო ჩლაჩიძე ამბობს, რომ მთავარია სოფელში წყლის პრობლემა გადაიჭრას.
"პირველ რიგში წყლის პრობლემაა სოფელში. დაიწყეს გაკეთება და საშველი არ დაადგა. დროულად გვინდა ეს პრობლემა მოგვარდეს, მაგრამ არც ძალიან შორიდან გვიწევს წყლის მოტანა. მთავარია მშვიდობა იყოს. პურის ფული გვიჭირს და უფრო მეტი ყურადღება გვჭირდება ხელისუფლებისგან. მოდიან ჟურნალისტები და აშუქებენ ხალხის სათქმელს. ხომ უსმენენ ტელევიზიას, მოვიდნენ და დაინტერესდნენ, რა ხდება, რა გვიჭირს, რა გვილხინს." -თქვა ჩვენთან საუბრის დროს ნიკო ჩლაჩიძემ.
“ნახეთ არხი, 31 წლის წინ ხელით გაიჭრა, ნერგები ამოვიდა არხზე… არც სასმელი და არც სარწყავი წყალი არ გვაქვს. ვითომ შუქი გამოგვიყვანეს, როგორც კი ქარი ამოვარდება, სამი-ოთხი დღით გათიშული გვაქვს, მხოლოდ გამრიცხველიანებას სინათლე არ მოჰყვება." – გვითხრეს ერგნეთში მცხოვრებლებმა.
"ცხოვრება წინ მიდის, ბაღებს ვაშენებ, არავინ მეხმარება, შევეჩვიეთ ამ შიშს, შეგუებულები ვართ, სროლების ხმა ისმის, ვარჯიშობენ… დაკავების ფაქტი იყო, სამი-ოთხი თვის წინ, ერედველ კაცს, თავისი დამწვარი სახლის მონახულება უნდოდა და იქით გადავიდა. გამოსასყიდი მოითხოვეს 2000 რუსული რუბლი. პოლიტიკოსები კამერის წინ პიარს იკეთებენ, ეგ არის. ერთი წყალი ვთხოვეთ, სად არ დავწერეთ და მაინც ჩემი ძალებით გამოვიყვანე, თუმცა სასმელად არ ვარგა. სასმელ წყალს 300 მეტრით დაშორებული ჭაბურღილიდან ვეზიდებით. " – გვიყვება სოფელ დიცში მცხოვრები ილია ბერიაშვილი.
ზარდიაანთაკარში ამბობენ, რომ ერთ დროს აქ ოცდაათზე მეტი ოჯახი ცხოვრობდა, ახლა კი სახლების უმეტესობა მიტოვებულია, რადგან არავინ ყურადღებას არ აქცევს მოსახლეობას.
გიორგი გაბლიშვილი, ზარდიაანთკარის მკვიდრი ამბობს, რომ ირგვლივ მხოლოდ მიტოვებული სახლებია. არანაირი დახმარება მთავრობისგან არ აქვთ.
ციცინო ელიკაშვილი, სოფელ ზარდიაანთკარის მცხოვრები ამბობს:" ნაკვეთი დავამუშავე, მაგრამ მოსავალი ვერ მივიღეთ, რადგან გახმა ყველაფერი. ოთხი ადამიანი ვცხოვრობთ, ბავშვები მერეთის საჯარო სკოლაში დადიან, ჩვენს სოფელში არ არის სკოლა. ძალიან მძიმე პირობებია, მაგრამ რა ვქნათ. ყველანი ვითხოვთ წყლის პრობლემის მოგვარებას. ხან ცოცხის დასასველებელი წყალი არ გვაქვს, ისეთი მდგომარეობაა. სოფელი მხოლოდ სოციალური დახმარების იმედზეა."
"გურია ნიუსი" გორის მუნიციპალიტეტის გამგეობის საზოგადოებასთან და მედიასთან ურთიერთობის სამსახურის უფროსს, ნათია მდინარიძეს დაუკავშირდა. მის მიერ მოწოდებული ინფორმაციით, ზემოთ ხსენებულ სოფლებში სხვადასხვა პროექტი ხორციელდება.
"გორის მუნიციპალიტეტის გამგეობა, ისევე როგორც ცენტრალური ხელისუფლება, განსაკუთრებულ ყურადღებას აქცევს ოკუპირებული ტერიტორიების მოსაზღვრე სოფლებს. ამ სოფლებში ხშირია ადგილობრივებთან შეხვედრა და პრობლემების მოგვარების გზებზე საუბარი. ერთ-ერთი დიდი პროექტი, რაც ამ სოფლებში განხორციელდა არის გაზიფიცირება, რამაც მოსახლეობას ყველაზე დიდი პრობლემა მოუგვარა. გამგეობისთვის 2014 წელს პრიორიტეტი იყო სოფლებში სასმელი წყლების სისტემების მოწესრიგება და საბავშვო ბაგა-ბაღები, რაც, როგორც მოგეხსენებათ ერთ-ერთი ყველაზე მნიშვნელოვანია ადგილობრივი მოსახლეობისთვის."- აცხადებენ გორის მუნიციპალიტეტის გამგეობაში.
გამგეობის პრესსამსახურში ასევე აცხადებენ, რომ სოფელ დიცში გაიხსნა ახალი საბავშვო ბაგა-ბაღი, მოწესრიგდა სასმელი წყლის სისტემა, ამისათვის გაიბურღა ახალი ჭაბურღილი და რეაბილიტაცია ჩაუტარდა სისტემის ქსელს, მომავალ წელს ამ სოფელში კიდევ ერთი ჭაბურღილის მოწყობა იგეგმება. დიცში მიმდინარე წელს, მოსახლეობის მოთხოვნით, დამონტაჟდა გარე განათების სისტემაც.
რაც შეეხება სოფელ ერგნეთის სასმელ წყალის, პროექტი მიმდინარეობს და ხელშეკრულების თანახმად, 13 დეკემბერს, მოხდება სამუშაოების დასრულება. პროექტი ადგილობრივი ბიუჯეტიდან ფინანსდება, უახლოეს დღეებში ერგნეთის მაცხოვრებლებს სასმელი წყლის პრობლემა აღარ შეაწუხებთ. გაზიფიცირება, ისევე როგორც სხვა ე.წ. საზღვრისპირა სოფლებში ამ სოფელშიც განხორციელდა და ადგილობრივი მოსახლეობა ბუნებრივ აირს მოიხმარს. სოფელ ერგნეთში მოხდა გამრიცხველიანება და სარწყავი წყლის სისტემის რეაბილიტაციაც. ჯანდაცვის სამინისტროს მიერ მოეწყო ამბულატორია, რომელიც სოფელში ამ დრომდე არ ყოფილა და ამჟამად სოფელში მოსახლეობას სამედიცინო პერსონალი ადგილზე ემსახურება. დაგეგმილია გარე განათების მოწყობაც.
სოფელ ზარდიაანთკარში რამოდენიმე მნიშვნელოვანი პროექტი განხორციელდა. ერთ-ერთი არის სასმელი წყლის სისტემის მშენებლობა. რეგიონალური განვითარების ფონდის მიერ გაიბურღა ახალი ჭაბურღილი, მოეწყო 25 ტონიანი რეზერვუარი, ახალი ქსელი შევიდა თითოეული მოსახლის ეზოში. ამ ეტაპზე მიმდინარეობს მუშაობა მრიცხველების დასამონტაჟებლად, რის შემდეგაც სასმელ წყალს ადგილობრივები უკვე საკუთარ ეზოებში მიიღებენ. ზარდიაანთკარში მოსახლეობას ბუნებრივი აირი უკვე მიეწოდება. თანადაფინანსებით კაპიტალურად მოეწყო 1 კმ-იანი საავტომობილო გზა, სანიაღვრე მილებით. ამ გზის ავარიულობის გამო, სამგზავრო ავტობუსი ვერ ახერხებდა სოფელში გადაადგილებას, გზის მოწყობის შემდეგ ეს პრობლემა სოფელში აღარ არსებობს.
"სოფლებში ინტენსიურად ხორციელდება სამელიორაციო სისტემების მოწესრიგებაც. შიდა არხები მიმდინარე წელს გამგეობის კეთილმოწყობის სამსახურის მიერ ეტაპობრივად გაიწმინდა. არხების მშენებლობას მელიორაციის დეპარტამენტი ახორციელებს.
საზღვრისპირა სოფლების მოსახლეობა, ისევე როგორც ადგილობრივ თემში შემავალ სხვა ყველა სოფელში, სარგებლობს სხვადასხვა პროგრამებით, როგორც ჯანდაცვის ასევე სოციალური კუთხით." – ამბობენ გორის მუნიციპალიტეტის გამგეობაში.
