ქალაქ ოზურგეთის პირველი გერბი, ჯერ კიდევ 19 საუკუნეში, რუსეთის იმპერიის ეპოქაში შეიქმნა. 1840 წელს რუსეთის იმპერიამ საქართველოს ტერიტორიაზე ადმინისტრაციული რეფორმა განახორციელა და საქართველო-იმერეთის გუბერნია ჩამოაყალიბა. როგორც „Полное собрание законов Российской империи “-ის („Второе собрание 1825 – 1881“) ელექტრონული არქივიდან ირკვევა,1842 წლის დეკემბერში, იმპერატორმა ნიკოლოზმა საქართველო-იმერეთის გუბერნიის გერბების შემუშავების შესახებ ბრძანება გამოსცა. ამ ბრძანების შედეგად, რუსეთის სენატმა 1843 წელს საქართველო-იმერეთის გუბერნიის და მასში შემავალი 11 ქალაქის გერბი დაამტკიცა. გერბის შექმნამდე, საიმპერატორო ხელისუფლების ბრძანებით, ოზურგეთს ქალაქის სტატუსი მიენიჭა და 1843 წლის 21 მაისს ოზურგეთის პირველი გერბიც დამტკიცდა.
გუბერნიის დანარჩენი ქალაქების გერბების მსგავსად , ოზურგეთის გერბიც საქართველო-იმერეთის გუბერნიის გერბს ემყარებოდა, რომელიც თავის მხრივ სომხეთის ოლქის 1833 წელს შექმნილი გერბის მსგავსად შეიქმნა.
ოზურგეთის პირველი გერბის დახასიათება და განმარტება საბედნიეროდ ჩვენთვის ცნობილია. გერმანული წარმოშობის ცნობილმა ჰერალდისტმა პაველ ვინკლერმა, 1900 წელს გამოსცა ნაშრომი „რუსეთის იმპერიის ქალაქების, გუბერნიების, ოლქების და დასახლებების გერბები“, სადაც სხვებთან ერთად ოზურგეთის გერბის დახასიათებაც დაგვიტოვა. ვინკლერის ნაშრომის თანახმად, ოზურგეთის გერბს ფრანგული ფარის ფორმა ჰქონდა და სამ ნაწილად იყოფოდა. ზედა ნახევარი ორი ნაწილისაგან შედგებოდა და საქართველო-იმერეთის გუბერნიის გერბს იმეორებდა. მარცხენა ნაწილში, ოქროსფერ მინდორზე არარატის მთაზე შეჩერებული ნოეს კიდობანი, მარჯვენა ნაწილში კი შავი ზღვა იყო გამოსახული. გერბის ზედა მხარეს, საერთო გერბისთვის ასევე დამახასიათებელი წმინდა გიორგის გამოსახულებაც გვხვდებოდა. ოზურგეთის გერბის ქვედა მხარე ერთი ნაწილისგან შედგებოდა. მასზე ვერცხლისფერ მინდორზე გამოსახული იყო გუთანი, ზეთისხილის რტო, ვაზის რტო და ნაყოფი. ეს ყველაფერი აქაური ბუნების განსაკუთრებული მცენარეული სიმდიდრის სიმბოლიზებას ახდენდა.
ოზურგეთის გერბზე საქართველო-იმერეთის გუბერნიის გერბისთვის დამახასიათებელი ორთავიანი რუსული არწივი გამოსახული არ გახლდათ. ოზურგეთის პირველ გერბს შემდგომი სახეცვლილება აღარ განუცდია და მან საქართველოს რუსეთის იმპერიის შემადგენლობაში არსებობამდე იარსება.
