„საქართველოს შინაგან საქმეთა სამინისტროს სსიპ საგანგებო სიტუაციების მართვის სააგენტო (დეპარტამენტი) წარმოადგენს შინაგან საქმეთა სამინისტროს სტრუქტურულ ქვედანაყოფს, რომელიც თავისი კომპეტენციის ფარგლებში ახორციელებს ქვეყნის მასშტაბით საგანგებო სიტუაციების (საგანგებო სიტუაცია _ მდგომარეობა შექმნილი განსაზღვრულ ტერიტორიაზე ბუნებრივი და ტექნოგენური, სტიქიური ან სხვა რაიმე ხასიათის უბედურების შედეგად, რასაც მოჰყვა ან შეიძლება მოჰყვეს ადამიანთა მსხვერპლი, მნიშვნელოვანი მატერიალური დანაკარგები, საფრთხე შეექმნას ადამიანის ჯანმრთელობას ან გარემოს.) თავიდან აცილების, მათი შედეგების შერბილებისა და ლიკვიდაციის მიზნით საქმიანობის კოორდინაციას, ასევე საომარი მდგომარეობის პერიოდში სამოქალაქო თავდაცვის ამოცანების განხორციელების უზრუნველყოფას.“ _ ეს ის ოფიციალური ინფორმაციაა სსიპ-ის შესახებ, რომელსაც შინაგან საქმეთა სამინისტროს ვებ გვერდზე ნახავთ.
სხვადასხვა საიტებზე კი იპოვით ბევრ ისეთ ინფორმაციას, სადაც აღნიშნული სამსახურის თანამშრომლების თავდადებაზე და გმირობაზეა საუბარი. ნებისმიერ დროს _ დარსა და ავდარში, მაშველები მზად არიან, მოქალაქეების დასახმარებლად. ხშირად ისინი იმისთვისაც კი გამოუძახიათ, რომ აივანზე კატა ან ძაღლი იყო დარჩენილი და პატრონს ვერ გამოყავდა. იყო შემთხვევები, როცა ხეზე ასული ადამიანის ჩამოსაყვანადაც კი მაშველები გამოიძახეს.
ამ სტატიაში ყურადღებას არ გავამახვილებთ ამ ადამიანების თავგანწირვაზე _ მთელი საქართველოსთვის ცნობილია მაშველების თავდაუზოგავი მუშაობა სტიქიების დროს და სხვის გადასარჩენად განწირული საკუთარი სიცოცხლის შესახებ.
ერთი სიტყვით, ეს ადამიანები ჩვენი დროის გმირები არიან, რომლებიც უსიტყვოდ, კამერებს მიღმა ჩვენი უსაფრთხოების სადარაჯოზე დგანან და თავიანთ საქმეს არა 
პიარისთვის, არამედ ადამიანების სიყვარულისთვის აკეთებენ. ალბათ ამიტომაცაა, რომ მათ შორის ძნელადაა საპოვნელი ადამიანი, რომელიც საკუთარ თავზე გესაუბრებათ.
ასეა ჩოხატაურშიც, სადაც მაშველებს განსაკუთრებულად რთულ პირობებში უხდებათ მუშაობა _ ავარიული შენობა ყოველდღე ინგრევა; ოთახებში, სადაც მათ ღამის გათევა უწევთ, ზოგჯერ წვიმა ჩამოდის და ძალიან ცივა, ფანჯრებზე „ცელოფნებია“ აკრული; ორსართულიანი შენობის ნაწილი ნაგვითაა სავსე.
ჩოხატაურელ მაშველებს სააბაზანოც კი არ აქვთ; სახელდახელოდ შეჭედილი საპირფარეშო შენობის გარეთ მდებარეობს. იქვეა საგანგებოდ მოწყობილი ხელსაბანი.
ამ ყველაფერს ავარიული მანქანებიც ემატება, რომლის შეკეთებას თავად მაშველები ცდილობენ, თუმცა, ტექნიკის სიძველის გამო, ხშირ შემთხვევაში არ ხერხდება.
_ ჩვენი მაშველები თვითონ არიან სასწრაფოდ საშველები, _ ხშირად ხუმრობენ ჩოხატაურელები, თუმცა, ყველა თანხმდება, რომ ეს სახუმარო თემა არაა:
_ სახანძრომ დაიგვიანა და სახლი დამეწვა, ვერ მოაღწიეს მაშველებმა ჩვენამდე, _ ასეთი საყვედურები მიმდინარე წელს ბევრჯერ მოვისმინეთ _ არამარტო ჩვენ, ეს მაშველებსაც ბევრჯერ უთხრეს, რომლებმაც საყვედურს დუმილით უპასუხეს.
არადა, სათქმელი ბევრი აქვთ. მიუხედავად იმისა, რომ ამაზე საჯაროდ არ საუბრობენ, თითოეულმა მათგანმა კარგად იცის, რომ გამოძახებაზე დაგვიანების მიზეზი ის თითქმის დაშლილი მანქანებია, რომელთა გამოცვლას დიდი ხანია პირდებიან.
2015 წლის მაისში, გურიაში ჩამოსულ პრემიერს „გურია ნიუსმა“ იმ პრობლემების ჩამონათვალი მიაწოდა, რომელიც რეგიონის მუნიციპალიტეტებს აწუხებთ და რომლის მოგვარება სასიცოცხლოდ მნიშნელოვანია.
ჩვენთან ექსკლუზიურ ინტერვიუში ირაკლი ღარიბაშვილმა პირობა დადო, რომ მთავრობისგან „მაქსიმალური ხელშეწყობა“ იქნებოდა.
კითხვაზე, ფლობდა თუ არა ინფორმაციას გურიის მუნიციპალიტეტებში არსებული პრობლემების შესახებ, იცოდა თუ არა, რომ ჩოხატაურს, წლებია, ნაგვის მანქანის არ აქვს და დიდი ხანია ადგილობრივი ხელისუფლება მთავრობას დახმარებას სთხოვს; სახანძრო მანქანები, რომელთა არქონის გამო, ბოლო თვეების განმავლობაში 5 სახლი დაიწვა, გვიპასუხა:
„ჩემი დავალებით ჩვენ დავამუშავეთ პროექტი და მთელი საქართველოს მასშტაბით 
წელსვე დავიწყებთ ნაგვის ბუნკერების, ნაგვის და სახანძრო მანქანების შესყიდვას. ლიზინგით ავიღებთ ამ მანქანებს და ყველა რეგიონს მოვამარაგებთ. წელს ეტაპობრივად დაიწყება რეგიონის მომარაგება.“
მიმდინარე წლის ივნისის პრემიერის პრესსამსახურს იმის გასარკვევად დავუკავშირდით, როგორ სრულდებოდა ღარიბაშვილის დაპირება:
„25 ივნისს, რეგიონული განვითარების და ინფრასტრუქტურის სამინისტროს მყარი ნარჩენების კომპანია გურიის რეგიონს გადასცემს ნაგვის 5 მანქანას. რაც შეეხება სახანძროს, წლის ბოლომდე ჩოხატაურისთვის ეს პრობლემაც მოგვარდება. შინაგან საქმეთა სამინისტროს საზოგადოებასთან ურთიერთობის დეპარტამენტის ინფორმაციით, მიდის მზადება საერთაშორისო ტენდერის გამოსაცხადებლად და ტენდერის საფუძველზე შესყიდული სახანძრო მანქანები წლის ბოლომდე უკვე 
გადანაწილდება რეგიონების მიხედვით”. _ გვითხრეს პრესსამსახურში.
თუმცა, კომენტარებიდან მეექვსე თვე დაიწყო და დანაპირები ჯერ არ შესრულებულა.
სიტუაციების მართვის სააგენტოს პრესსამსახურის უფროსი სოფო კობაიძე ამბობს, რომ დაპირებები ეტაპობრივად შესრულდება. მისი თქმით, ჩოხატაურში არსებული მდგომარეობის შესახებ ინფორმაცის ბოლომდე ფლობენ:
_ გვაქვს ინფორმაცია ჩვენი სამსახურის შესახებ.
_ ჩოხატაურელ მაშველებს საფრთხის ქვეშ უხდებათ მუშაობა…
_ ძალიან მძიმე მდგომარეობაში ჩავიბარეთ მუნიციპალური სამსახურებიდან შენობები, ავტოფარეხები და ა. შ. ეს ყველაფერი დიდ ფინასურ რესურს საჭიროებს და შესაბამისად, ეტაპობრივად, წლის განმავლობაში დაგეგმილია სხვადასხვა შენობების აშენება, გარემონტება და ავტოფარეხის განახლება.
_ ეს ჩოხატაურს ეხება?
_ რა თქმა უნდა.
_ კონკრეტული თარიღი შეგიძლიათ გვითხრათ?
_ არა. ეს თვეების განმავლობაშია გაწერილი და ახლა ვერ გეტყვით, თუმცა, 2015 ში სამი შენობა გავხსენით, 2016 წელს დაგეგმილია კიდევ 15-16 შენობის აშენება თუ გარემონტება. ზოგიერთ რაიონში შენობაც კი არ გვაქვს. 
თებერვალში გაიხსნება კაპიტალურად გარემონტებული შენობა ქობულეთში და რამდენიმე თვეში ჩოხატაურის შენობის გარემონტებაც დასრულდება.
_ ჩოხატაურში რემონტი ჯერ არ არის დაწყებული.
_ 2016 წლის ბიუჯეტში არის ეს გასათვალისწინებელი. ჩვენ კაპიტალურ რემონტს ვეძახით, თუმცა, თავიდან ასაშენებელია. ჩოხატაურელ მაშველებს ცოტა ხნის წინ გადავეცით ახალი ფორმები, აღჭურვილობა.
_ სანამ შენობას გაარემონტებთ, მანამდე რომ რაიმე მოხდეს, თქვენი უწყება იღებს პასუხისმგელობას ადამიანების სიცოცხლეზე?
_ იქიდან გამომდინარე, რომ შინაგან საქმეთა სამინისტროს დაქვემდებარებაშია ეს დანაყოფი, თავისთავად, სამინისტროა პასუხისმგებელი. მათ დაზღვევაც გაუკეთდა, რის პრეცედენტიც აქამდე არ ყოფილა. კიდევ ერთხელ გეტყვით, რომ სამინისტრო და სააგენტოს ხელმძღვანელი ზვიად კაცაშვილი არიან პასუხისმგებლები ყველაფერზე, _ გვითხრა კობაიძემ.
