გავიმარჯვე! დავმარცხდი! _ ამ ორი სიტყვიდან ერთ-ერთმა უნდა დაამთავროს ეს სათაური!
რომელი უფრო მოერგება?! ეს ოზურგეთის საკრებულოს თავმჯდომარის ალეკო მამეშვილის სიტყვისკაცობაზეა დამოკიდებული, თუმცა, დღემდე, ქალაქ ოზურგეთის გრიბოედოვის ქუჩის #29 ბინის მცხოვრებლები თავიანთ თავს აბუჩად აგდებულად თვლიან, რეგიონის თუ მუნიციპალიტეტის თავკაცებს კი… ცრუდაპირებების დიდოსტატად!
რატომ მიაჩნიათ ასე?!
წლებია, მათი ბინის სახურავი წვიმას დამორჩილდა! წლევანდელმა თოვლმა და ყინვამ კი, ჭერიდან მესამე სართულიც გაუსაძლისად აქცია!
როცა კედლებიდან წყლის ჟონვამ მეთოდი შეიცვალა და უხვად გადმოდინდა, ხელისუფალთა ტელეფონები მოიძიეს და გვიშველეთო, თხოვეს, თუმცა დავაზუსტებ: ბატონი ვალერი ჩიტაიშვილის ტელეფონი, პატრონის სურვილით, ჯიუტად დუმდა. რაც შეეხება ბატონ ალეკოს, მან მობილური არ გათიშა და შეწუხებულ მთხოვნელს ჩვეულებრივ გულდასმით მოუსმინა, სინანულიც არ დაფარა და დახმარებაც შეპირდა.
ტელეფონი ჩვენთანაც აწკრიალდა და…
ამ ბინაში ჩემი უფროსი კოლეგა და მეგობარი ეთერ ქადეიშვილი ცხოვრობს. მეც, რა თქმა უნდა, მის ბინას მივაშურე.
როცა ვუთხარი, რისთვისაც ვიყავი მისული, თემაზე საუბრის გაგრძელება არ ისურვა, სველ, ჩამოშლილ კედლებს შეხედა და…
ცრემლმორეული დავტოვე.
უარეს მდგომარეობაში იყო ზედა სართულის ოთახები.
გავესაუბრე იქ მცხოვრებლებს:
_ რაც ეს ბინა თანამედროვე მეთოდით (ე.წ. “გუდრონით”) გადახურეს, მას შემდეგ წყალი ჩამოდის. სიცხეში გუდრონი დნება და ფანჯრებს, სარეცხ თოკებს აშავებს. რამდენჯერმე დავწერეთ განცხადება, რომელიც რეაგირების გარეშე დარჩა. პირადადაც ვესაუბრეთ… ახლა რა გვეშველება? ყველას გვიჭირს, უმუშევრები, პენსიონერები ვართ… რა გზას დავადგეთ? ეზო რომ ორმოებითაა სავსე ამასაც ხომ ხედავთ?!
ვისმენდი იმას, რაც კარგა ხანია ვიცი და იწერება “გურია ნიუსში”.
ისიც გამახსენდა, შარშან, საკურორტო სეზონის მზადებასთან დაკავშირებით, ჟურნალისტებს რომ გვიხმეს. შეხვედრას ბატონი ვალერი ესწრებოდა.
როცა შეკითხვა-სათხოვარის ჯერი დადგა, ეთერ ქადეიშვილმა მიმართა გუბერნატორს:
_ ბატონო ვალერი, თქვენ კარგად იცით, როგორ მდგომარეობაშია ჩვენი ბინის სახურავი და ჩვენი ეზო. ამისთვის დახმარებას გამგებელი რომ ბრძანდებოდით, მაშინაც გთხოვდით. იქნებ, რაიმე გზა ახლა მაინც გამონახოთ?!
თავაზიანი იყო ბატონი ვალერის პასუხი:
_ მართალი ბრძანდებით, ქალბატონო ეთერ! წელს ტენდერია გამოცხადებული და გამარჯვებული ამ საქმეს მოაგვარებს.
მერე გუბერნატორმა საკრებულოს თავმჯდომარეს და გამგებელს მიმართა:
_ აჩვენეთ ქალბატონ ეთერის ის საბუთები, რითაც ამ საქმის მოგვარებას ვცდილობთ!
_ გმადლობთ, ბატონო ვალერი! ქაღალდების ნახვა არ მინდა! თქვენ სიტყვა მომეცით! შედეგს საქმით ვნახავთ!
შედეგი? წლევანდელმა ზამთარმა სიტყვის შეუბრუნებლობით ისევ უბრალო, უდანაშაულო ხალხი დასაჯა!
აი, რატომ არ ისურვა ამ თემაზე ჩემთან საუბარი გულნატკენმა ჟურნალისტმა, რომლის მეზობლებმა ისიც მითხრეს, რომ იგი დეპუტატ გოჩა შანიძეს დაკავშირებია და მისგან დახმარების შეპირება მიუღია, მუნიციპალიტეტის თავკაცებს რომ ეტყოდა ამის შესახებ.
ეს სატელეფონო საუბრები კვირა დღეს, 19 თებერვალს შედგა. ბატონი ალეკო მეორე დღესვე მიბრძანდა ზამთრისგან დაზარალებულებთან…
ისევ დაპირება _ რაღაც გზას გამოვნახავთო!
ურემი რამდენჯერმე უკვე გადაბრუნდა, გზა კი ისევ არ ჩანს!
როგორ დამთავრდება ბატონი მამეშვილის ყინვისმიერი წვევა გრიბოედოვის ქუჩის #29 ბინის მცხოვრებლებთან?
როგორი იქნება შედეგი _ შეძლებს საკრებულოს თავმჯდომარე თბილი ღიმილით თქვას: “მივედი, ვნახე და გავიმარჯვე!”.
დამარცხდება ტყუილი?! გაიმარჯვებს სიმართლე?!
