სიჭინავამ “გურია” იურიდიულ კომიტეტს გადაულოცა

საქართველოს ფეხბურთის ფედერაციის აღმასკომმა ლანჩხუთის გამგეობის წერილი განიხილა. როგორც უკვე ვწერდით, სფფ-ის პრეზიდენტის ლანჩხუთში ვიზიტისას, ადგილობრივი ხელისუფლების წარმომადგენლებმა და გამგებელმა ზვიად სიჭინავას სთხოვეს, დღევანდელი “გურიის” ნაცვლად ჩემპიონატში დაუშვან მუნიციპალიტეტის იმავე სახელწოდების კლუბი. პრეზიდენტმა მათ მხარდაჭერა აღუთქვა, აღმასკომმა კი საკითხი ფედერაციის იურიდიულ კომიტეტს გადაუგზავნა.
_ მოგვმართეს თხოვნით, რომ ლანჩხუთის “გურიასთვის” სახელის(?!) შეცვლის უფლება მიგვეცა, რადგან ძველი “გურია” დააყადაღეს. თხოვნა ჯერ არ დაგვიკმაყოფილებია, რადგან იურიდიულ კომიტეტში განიხილავენ. ასეთი გადაწყვეტილება უეფას დებულებას ხომ არ ეწინააღმდეგება,  _ თქვა ჟურნალისტებთან საუბრისას სიჭინავამ.
თუმცა, ეს საკითხი არ ყოფილა აღმასკომზე მთავარი _ როგორც წინა ნომრებში ვწერდით, სიჭინავა კონკურენტებისთვის სიურპრიზის მოწყობას გეგმავდა. ჩვენი გაზეთი ექსკლუზიურად წერდა, რომ სიჭინავა არჩევნებისთვის ემზადებოდა. ის არჩევნებს 22 იანვრისთვის გეგმავს, რითაც კონკურენტებს უმძიმეს მდგომარეობაში აყენებს.
ამასთან დაკავშირებით “ლელო” მიხეილ ყაველაშვილთან ინტერვიუს აქვეყნებს. “ჩვენი ფეხბურთის” აქტივისტი სიჭინავას იმის გამოც აკრიტიკებს, გურიაში ყოფნისას რომ თქვა, ყიფიანს არ ვიცნობო:
_ მკითხაობა არ არის საჭირო იმის გასაგებად, ყრილობა სასწრაფოდ გაიმართება თუ არა. უბედურება ისაა, რომ ფედერაცია საკუთარ კანტორად აქციეს და ისეთი ტონით ლაპარაკობენ, თითქოს მხოლოდ მათი გადასაწყვეტია, ფეხბურთი როგორ იმართოს. ყრილობის თარიღი ისეთ დროს უნდა გამოცხადდეს, რომ მომზადება ყველა მხარემ შეძლოს და არა მხოლოდ ფედერაციამ. თუმცა, ესეც არ არის საკმარისი პირობა ყრილობის გასამართად. ფეხბურთის სათამაშოდ საჭიროა წესებზე შეთანხმება, ობიექტური მსაჯული კი მაყურებელია, რომელიც შეაფასებს, რომელი გუნდია უკეთესი. ჩვენთან წესებზე შეთანხმებაც არ სურთ და ასეთ გაურკვევლობაში გვთავაზობენ მოედანზე გასვლას, _ ამბობს ყაველაშვილი, _ როდესაც ვხედავთ, არჩევნები როგორ ტარდება, მასში მონაწილეობას აზრი არ აქვს _ “ჩვენი ფეხბურთი” მხოლოდ თავისუფალ არჩევნებში ჩაერთვება. სამართლიანობის პრობლემაზე ყველა პრესკონფერენციასა თუ გამოსვლაში ვლაპარაკობდით. მივედით იმ აზრამდე, რომ საფეხბურთო საკითხებზე გადაწყვეტილებას იღებს არა უმაღლესი საფეხბურთო ორგანო, ანუ ფედერაციის ყრილობა, არამედ მთავრობა. ახალკაცი გადადგომას არ აპირებდა, მაგრამ პრემიერმა ფედერაციის საქმიანობა გააკრიტიკა და ნოდარიც წავიდა. მთავრობა ფეხბურთის განვითარებაში თამაშის წესების დაცვით უნდა მონაწილეობდეს, მაგრამ  ამ სფეროში უხეშად ერევიან. თავიდან სიჭინავას შინაგანად თანავუგრძნობდი კიდეც, მაგრამ მას შემდეგ, რაც ლევან ყიფიანზე ცინიკურად ილაპარაკა,  არ ვიცნობო, ეს გრძნობა გამიქრა. ერთ გუნდში რომ იყვნენ, მაშინაც არ იცნობდა?!
და მაინც, სიჭინავა არ არის ქართული ფეხბურთის პრობლემა _ ვინ ჩამოიყვანა ახალკაცი და ტოპმიოლერ-კუპერი? ხელისუფლებამ! უკან-უკან მივდიოდით და ქართული ფეხბურთის განვითარებაზე ლაპარაკობდნენ. ძველ ფედერაციას არაეფექტური მართვის გამო ვაკრიტიკებდით და ახალკაცი მართლაც ამის გამო მოხსნეს. ჩამოიყვანეს ქეცბაია, რისკენაც ძველ მმართველებს დიდი ხანია მოვუწოდებდით. არადა, ძველების კრიტიკის გამო მტრებად გამოგვაცხადეს და ლამის რეპრესიები მოგვიწყვეს. ასე გრძელდება დღემდე. “ჩვენი ფეხბურთი” ხმას რომ იმაღლებდა, სიჭინავასგან კრიტიკა არ ისმოდა. გზა ჩვენ გავუკვალეთ და აღმოჩნდა, რომ ყიფიანს არ იცნობს. რა ბავშვური დამოკიდებულებაა? _ დასძენს ყაველაშვილი.
ერთი საინტერესო დეტალიც ფედერაციის აღმასკომის ბოლო სხდომიდან _ ზვიად სიჭინავამ ლანჩხუთის გამგებელს “აზრები მოპარა”; სფფ-ის პრეზიდენტს ქართული კლუბების ფინანსური გაჭირვების შესახებაც ჰკითხეს  და მას პასუხის გასაცემად ძალიან გამოადგა გურიაში ვიზიტი და გია გოგუაძის ნათქვამის პერიფრაზირება: _ ქართული კლუბების პრობლემა მენეჯმენტია. 14 ფეხბურთელი რომ ჩაგყავს, დავიჯერო, ადგილობრივი სათადარიგოებშიც ვერ ხვდება? ან უმაღლესში გადასვლამდე არ უნდა იცოდე, რა ბიუჯეტი გაგაჩნია? “სამტრედიაში” ჩასულებს 1000-1200 ლარს შეჰპირდნენ. არ სჯობს, ამდენი ადგილობრივს მისცე, რომელმაც ბოლო ტურში ორი გოლი გაიტანა?!  გაუგებარია, რატომ იღებს ხელმძღვანელი 2500 და 3000 ლარს?” _ ქართული ფეხბურთის მესაჭემ “საავტორო უფლება” დაარღვია, არადა, ლანჩხუთში ყოფნისას, მან ეჭვიც კი გამოთქვა _ თუ ფულს არ უხდით, ლიდერთა შორის როგორ ხართო?
თუმცა ამ ამბავს დიდი სკანდალი მოჰყვა: _ ბატონი ზვიადი ვიღაცამ შეცდომაში შეიყვანა. სიჭინავასთან პოლემიკა არ მინდა, რადგან გაჭირვების დროს, შეძლებისდაგვარად გვეხმარებოდა, მაგრამ არასწორი ფაქტები მოიხმო: “სამტრედიაში” 1200 ლარს არათუ ჩამოყვანილი ფეხბურთელი, საერთოდ არავინ არ იღებს. ყველაზე მაღალანაზღაურებად მოთამაშეს 1000 ლარს ვუხდიდით, ოთხს – 700-700 ლარს, დანარჩენებს კი – 600, 500, 400, 300 და რამდენიმეს 100 ლარსაც კი. რაც შეეხება ხელმძღვანელის დიდი ხელფასს _ მე 500 ლარს ვიღებ. სულ სახელფასო ფონდი 23 500 ლარია, საიდანაც 4 700 ლარს საშემოსავლო გადასახადის სახით ვიხდით. არა მგონია, ეს დიდი სახელფასო ფონდი და ხელფასები იყოს, _ აცხადებს “სამტრედიის” პრეზიდენტი ზაზა ადეიშვილი და იქვე განაგრძობს: _ ჩამოსულებს რაც შეეხებათ, ასეთი 12 ფეხბურთელი გვყავს _ უფრო ნაკლები, ვიდრე “ზესტაფონს”, მაგრამ რომელი ქართული კლუბი იტყვის უარს ამ კლუბის არაზესტაფონელ მოთამაშეებზე? მეც მირჩევნია სამტრედიელი ფეხბურთელები ვათამაშოთ, მაგრამ 1000 და 700 ლარით “ტორპედოდან” თოდუასა და მიგინეიშვილს, “ჯენოადან” კი კალაძეს ნაღდად ვერ ჩამოვიყვან!
მოკლედ, სიჭინავას ლანჩხუთის გამგებლის სიტყვების გამეორება საკმაოდ ძვირად დაუჯდა. მართალია იგი აცხადებს, რომ არჩევნებში მონაწილეობაზე უფრო “არას” იტყვის, ვიდრე “კის”, მაგრამ რაც ჩვენთან საუბარში არჩევნებში მონაწილეობაზე უარი სპორტის მინისტრის მოადგილემ დავით ნამგალაურმა თქვა, ქართული ფეხბურთის კულუარებშიც კი არავის აეჭვებს, რომ ზვიად სიჭინავა 22 იანვარს საპრეზიდენტო ვადას გაიხანგრძლივებს. ასე რომ, სიჭინავამ, თავის სახელისუფლო მხარდამჭერებთან ერთად, “პენალტი” დაურტყა კონკურენტებსა და მათ მფარველ გავლენიან “ნაციონალებს”. რამდენად იოლად გადაიტანენ ისინი ამას, 22 იანვარს გამოჩნდება. თუმცა, საქართველოში, თუ “საქმეს დასჭირდა”, ნემსაძისა არ იყოს, არჩეული საფეხბურთო პრეზიდენტებიც კი არჩევიდან 45 წუთში მიდიან პოსტიდან…