ქალაქ ოზურგეთში მცხოვრები სვეტლანა ქურასბედიანი სოციალური დახმარების აღდგენას ითხოვს. ამბობს, რომ შეშის შესაძენი ფული არ აქვს.
ჩვენი რესპონდენტი მეუღლესთან ერთად ცხოვრობს. მათ პატარა სახლში ისე წვიმს, როგორც გარეთ.
_ ჩემი ქმარი ავადმყოფობს და სახლიდან ვერ გადის. პენსიას მე ვიღებ მინდობილობით. ახლა გაუვიდა ვადა მინდობილობას და ოთხი კაცი მეხმარებოდა, მეუღლე საბუთებზე ხელის მოსაწერად რომ ჩამეყვანა ქალაქში. თქვენ თვითონ კარგად ხედავთ, რა მდგომარეობაში ვართ და როგორ ვცხოვრობთ. შეშა არ მაქვს, რა იქნება ხვალ, არ ვიცი და როგორ უნდა გადავიტანოთ ეს ზამთარი. მხოლოდ ქმრის პენსიაზე ვცხოვრობთ, ამას თუ ცხოვრება ჰქვია. მივმართეთ მერიას და ერთჯერადი დახმარება მოგვცეს, მაგრამ სანამდე უნდა გვეყოს ეს 150 ლარი?! სოციალურ დახმარებას არ ვიღებთ _ მაღალი ქულა მომივიდა. ახლა კიდევ ვაპირებ განცხადების შეტანას და ვნახოთ, რა იქნება.
ჩემი მეუღლის პენსია, ძირითადად, წამლებში მიდის. შვილები სხვაგან ცხოვრობენ და საკუთარი პრობლემები აქვთ. ყველგან დავდივარ სადაც შეიძლება, რომ ვინმე დამეხმაროს. ყველაზე მეტად ვითხოვ, რომ სოციალური დახმარება მაინც დამინიშნონ, _ ამბობს ქალბატონი სვეტლანა, რომლის გაჭირვებას ისიც დაემატა, რომ ზედამხედველობის სამსახურმა მისი შინაური პირუტყვი დააკავა და ამისთვის 70 ლარის გადახდა პენსიიდან მოუწია.
_ ერთი დღე ვეძებდი ძროხას და ბოლოს სადღაც გარაჟში ვნახე. თურმე, ზედამხედველობის სამსახურს დაუკავებია. ვიდრე არ გადავიხადე 70 ლარი, მანამ არ გამომატანეს ძროხა. ისიც მითხრეს, მეორედ თუ გამოვუშვებდი ქუჩაში ძროხას, 200 ლარით დააჯარიმებენ. ახლა მყავს სახლში დაბმული, _ გვითხრა სვეტლანა ქურასბედიანმა.
ოზურგეთის სოციალურ სააგენტოში სვეტლანა ქურასბედიანის შესახებ გვითხრეს, რომ მას შეუძლია ხელახლა შეავსოს განაცხადი:
_ სვეტლანა ქურასბედიანს შეუძლია თავიდან შემოიტანოს განცხადება და ისევ გადამოწმდება მისი ოჯახი. ბოლო შემოწმებიდან წელზე მეტი გავიდა და აქედან გამომდინარე, მას სრული უფლება აქვს, თავიდან მოგვმართოს, _ გვითხრეს სააგენტოში.
ქალაქ ოზურგეთის მუნიციპალიტეტის მერიის პრესსამსახურის უფროსის, ხათუნა შარაძის მიერ მოწოდებული ინფორმაციით, სვეტლანა ქურასბედიანს 2015 წელს ადგილობრივი ხელისუფლება ორჯერ დაეხმარა:
_ პირველად დავეხმარეთ შეჭირვებული მოქალაქეთა და ერთჯერადი დახმარების სამედიცინო პროგრამის ფარგლებში და მეორედ _ მძიმე საცხოვრებელი პირობებში მყოფი მოქალაქეების ერთჯერადი დახმარების პროგრამით, 150-150 ლარით. ასევე, განცხადება აქვს დაწერილი შეშით დახმარებასთან დაკავშირებით. მინდა გითხრათ, რომ შეშით დახმარებაზე ბევრი წერილი არის შემოსული და აქედან გამომდინარე, ეტაპობრივად ხდება ამ კუთხით მოსახლეობის დაკმაყოფილება. მინდა, გითხრათ, რომ სვეტლანა ქურასბედიანი ამ სიაში არის და ამ დღეებში ეს პრობლემა მოგვარდება, _ გვითხრა ხათუნა შარაძემ.
რაც შეეხება უმეთვალყუროდ მიტოვებული პირუტყვის დაკავებას, შარაძის განმარტებით, ზედამხედველობის სამსახურმა სამჯერ გააფრთხილა სვეტლანა ქურასბედიანი და მხოლოდ ამის შემდეგ დააკავა პირუტყვი: _ მრავალჯერადი გაფრთხილების შემდეგ მოხდა პირუტყვის დაკავება და ქალბატონ სვეტლანას მოუწია 60 ლარის გადახდა, _ თქვა ჩვენთან საუბრის დროს ხათუნა შარაძემ.
