ლანჩხუთის მუნიციპალიტეტის მიმდინარე წლის დეფიციტური ბიუჯეტის ირგვლივ მსჯელობა აქტიურ ფაზაშია შესული. საკრებულოს ოპოზიციონერი დეპუტატები და უმრავლესობის წევრი, რომან ბიწაძე, საკმაოდ მწვავე შეფასებებს აძლევენ ბიუჯეტის ხარჯვითი ნაწილის შემცირებას და უმრავლესობის წარმომადგენლებისგან განსხვავებით, არ ერიდებიან ამ ფაქტს სეკვესტრი უწოდონ.
154 800 ლარით მცირდება ბიუჯეტი და ეს ცვლილება რამდენიმე კუთხით ხორციელდება. კერძოდ, მუნიციპალიტეტის საკრებულო, მთლიანობაში, 34 950 ლარს დაასეკვესტრებს. მათ შორის საჯარო მოხელეთა შრომის ანაზღაურების სახით 10 ათას ლარს, მივლინებისა და ოფისის ხარჯების სახით 13 500 ლარს, ტრანსპორტის ხარჯის სახით 14 500 ლარს, ხოლო არაფინანსური აქტივებისა და სოცუზრუნველყოფის ხარჯების კლების სახით, შესაბამისად, 3390 ლარს და 260 ლარს.
გაცილებით დიდი თანხით _81 827 ლარით "შეეწევა" ბიუჯეტის საპროცენტო მაჩვენებლის ზრდას გამგეობა _ აქედან, 10 ათასი ლარი ისევ შრომის ანაზღაურებას მოაკლდება, ოფისის ხარჯს კი _ 47 900 ლარი. სოცუზრუნველყოფის მუხლი 29 128 ლარით შემცირდა. ამას გარდა, გამგეობამ 1500 ლარით მივლინების თანხები მოიკლო, ხოლო 5299 ლარით შეამცირა არაფინანსური აქტივები.
გამგებლის სარეზერვო ფონდიდან 10 ათასი ლარი დარჩა დაუხარჯავი და ეს თანხაც სეკვესტრის "ნადავლი" გახდა. ისევე, როგორც მუნიციპალიტეტის შენობა-ნაგებობებში დასახარჯი წყლის გადასახადი და გარეგანათების ხარჯები. ამ კუთხით კლებამ, შესაბამისად, 4042 და 4031 ლარი შეადგინა. აგრეთვე, სოცკულტურული ღონისძიებებიდან დაუხარჯავი დარჩა ტრანსპორტისა და სხვა მომსახურების ხარჯები, რამაც მთლიანობაში შეადგინა 8 ათასი ლარი.
მიმდინარე წლის ბიუჯეტის საკუთარი შემოსავლების საპროცენტო მაჩვენებელმა 86 პროცენტი შეადგინა და ამაში საკუთარი წვლილი ამ სეკვესტრმაც გაიღო. ეს ყველაფერი რომ ამ პროცენტული მაჩვენებლის ზრდას ემსახურება, ფაქტია, რადგან მუნიციპალიტეტში გასაკეთებელი საქმეები კვლავაც ბევრია და სხვა თუ არაფერი, უკვე წლებია პრობლემად და ბავშვებისთვის თავსატეხად ქცეული ხელოვნურსაფარიანი სტადიონების რეაბილიტაციისთვის შეიძლებოდა სეკვესტრირებული თანხების გამოყენება. ესეც თუ არა, კარგი იქნებოდა, გარკვეული თანხა საახალწლო განათებებისა და ნაძვის ხის მოსართველადაც გადანაწილებულიყო.
