ოზურგეთის მერია “გურია ნიუსის” სტატიას პასუხობს

ქალაქ ოზურგეთის  მერია გაზეთ "გურია ნიუსის" ვებ-გვერდზე გასულ მასალას – "82 წლის ქალბატონი დახმარებას ითხოვს"-  ეხმაურება.

გვინდა საზოგადოებას დეტალურად განვუმარტოთ არა მარტო ოლია მუხაშავრიას, არამედ ზოგადად,  სოციალურად დაუცველი  მოქალაქეების მიმართ, ქალაქის მერიის დამოკიდებულების  შესახებ.

2015  წელს ქალაქ ოზურგეთის  მუნიციპალიტეტის მერიას  2 310  მოქალაქემ  მომართა. აქედან დაკმაყოფილდა  2 082  განმცხადებელი.  დღეის მდგომარეობით,  სოციალური პაკეტის ფარგლებში გაწეული დახმარების  რიცხვი  ნახევარ   მილიონამდე  ლარს შეადგენს. არ დაკმაყოფილდა მხოლოდ იმ მოქალაქეთა განცხადება, რომლებიც რეგისტრირებულნი არ არიან ქალაქის ტერიტორიაზე.  ასევე,  არ დაკმაყოფილდა   მოქალაქეთა მიერ ხელმეორედ შემოტანილი განცხადებები.

ქალაქის მერიის სოციალური დახმარების პაკეტში არსებულ 14   პროგრამას,  2016   წელს კიდევ  4 ახალი პროგრამა ემატება, რაც მერიას საშუალებას  აძლევს    დახმარება  გაუწიოს  იმ მოქალაქეებს,  რომლებიც  მზრუნველობას  და  მატერიალურ   დახმარებას  საჭიროებენ.

რაც შეეხება ქალბატონ ოლია მუხაშავრიას, მერიამ არსებული პროგრამის ფარგლებში,  მისი ყველა  განცხადება დააკმაყოფილა.  მუხაშავრიამ, მიმდინარე წელს  განცხადებით მერიას რამდენჯერმე  მომართა, რის საფუძველზეც ორჯერ ფულადი დახმარება გაეწია, ასევე დაკმაყოფილდა მოთხოვნა შეშით უზრუნველყოფასთან დაკავშირებით.    იგი  ასევე   სარგებლობს  "მზურნველობა მოკლებულთა ერთჯერადი  კვების" პროგრამითაც.

მიუხედავად იმისა,  რომ  ქალაქის მერიას  ტყის მასივი არ გააჩნია, მხოლოდ კეთილი ნების საფუძველზე, ქალაქის ტერიტორიაზე არსებული გადაბელილი ხეებით ხდება სოციალურად დაუცველი მოქალაქეების  შეშით უზრუნველყოფა.   

სოციალურად დაუცველ მოქალაქეებზე ზრუნვა და მათი დახმარება ქალაქის მერიის ერთ-ერთი მთავარი პრიორიტეტია. სწორედ ამიტომ, ქალაქის მერია შესაძლებლობის ფარგლებში  მაქსიმალურ ყურადღებას იჩენს თითოეული სოციალურად დაუცველი მოქალაქის მიმართ და არ გაურბის მათ წინაშე ნაკისრ ვალდებულებასა და პასუხისმგებლობას.