სამი ბინა, საცხოვრებელი სახლი და მიწის ნაკვეთი – საქართველოს პარლამენტში ჩოხატაურის მაჟორიტარი დეპუტატის, თემურ ჭკუასელის საკუთრებაა. როგორც ჭკუასელის ქონებრივ დეკლარაციაშია აღნიშნული, თემურ ჭკუასელი ფლობს თბილისში, მიცკევიჩის ქუჩაზე მდებარე 102.00 კვ.მ.-ი ფართობის ბინას, ასევე, ბათუმში, ანდრია პირველწოდებულის გზატკეცილზე 74.00 კვ.მ-ისა და ბორჯომის რაიონის, დაბა ბაკურიანში, სასტუმრო "მგზავრებში" მდებარე 30.00 კვ.მ-ის ფართობის ბინებს.
გარდა ამისა, ჭკუასელის საკუთრებაშია ჩოხატაურის რაიონის სოფელი საჭამიასერში მდებარე 80.00 კვ.მ-ის ფართობის საცხოვრებელი სახლი და ამავე სოფელში 5000.00 კვ.-ს ფართობის მიწის ნაკვეთი.
რაც შეეხება ჭკუასელის ფინანსურ მდგომარეობას, დეკლარაციიდან ირკვევა, რომ მისი წლიური შემოსავალი საქართველოს პარლამენტიდან 44 400.00 ლარი იყო.
დეკლარაციის შევსების მომენტში კი, ბანკი "ქართუს" მიმდინარე ანგარიშზე 8 555.00 ლარი, ხოლო ამავე ბანკის დეპოზიტზე 19 600.00 დოლარი ჰქონდა.
თეიმურაზ ჭკუასელის სახელზე, ბანკ "ქართუში", 10 000.00-დოლარიანი იპოთეკური სესხია (ხელშეკრულების ვადები 25/03/2013, 25/03/2013 – 25/03/2018), რომლის პროცენტის დასაფარადაც დეპუტატს გასული წლის განმავლობაში 1953.00 დოლარი გადაუხდია.
2015 წლის 12 ოქტომბერს თემურ ჭკუასელმა გრიგოლეთში მდებარე საცხოვრებელი სახლი და მიწის ნაკვეთი 93 600 დოლარად გაყიდა, იმავე დღეს კი, ბათუმში ბინა შეიძინა, რომლის ღირებულება დეკლარაციის მიხედვით, 74 000.00 დოლარია.
გარდა ამისა, ქონებრივი დეკლარაციის მიხედვით, 2015 წლის 30 იანვარს ჭკუასელმა 60 000 დოლარად ღირებული ბინა მემკვიდრეობით მიიღო, თუმცა დეკლარაციაში დაფიქსირებული არ არის ბინის ადგილმდებარეობა.
რაც შეეხება დეპუტატის გასავლებს, თეიმურაზ ჭკუასელს ბინის რემონტისთვის 26000.00 ლარი აქვს გაცემული.
