“არც გზაა, არც კვალი და არც შუქი” _ ოზურგეთელები ხელისუფლების დახმარების მოლოდინში

ოზურგეთის მუნიციპალიტეტის მოსახლეობა ხელისუფლებას დროულ დახმარებას სთხოვს _ დიდთოვლობის გამო სოფლების უმრავლესობას არ მიეწოდება ელექტროენერგია და შეჩერებულია სატრანსპორტო მოძრაობა:

_ 1 მეტრამდე თოვლია. არც გზაა, არც კვალი და არც შუქი. გთხოვ, ხელისუფლებას მიაწვდინეთ ხმა, _ "გურია ნიუსს" ამ თხოვნით ოზურგეთის მუნიციპალიტეტის სხვადასხვა სოფლებიდან ათობით მოქალაქე დაუკავშირდა.

ოზურგეთის მუნიციპალიტეტის გამგებლის მერაბ ჭანუყვაძის თქმით სპეციალური ტექნიკა რამდენიმე სოფელში ამ წუტებში მშაობს:

_ კონჭკათში, თხინვალში, ნატანებში, შრომაში, ბახვში, ვაკიჯვარში,  ჭანიეთში, ლაითურში, ნარუჯაში ამ წუთებში მუშაობს ტექნიკა. დღის განმავლობაში ყველგან მივალთ. ყველა რესურს ვიყენებთ. ერთდროულად ყველგან გაწმენდა შეუძლებელია, მაგრამ დღის ბოლომდე ყველა სოფლის გზა გაიწმინდება, _ გვითხრა ჭანუყვაძემ.

მისივე თქმით გზის გაწნემდა მთელი ღამის განმავლობაში მიმდინარეობდა.

რაც შეეხება ელექტროენერგიას, გამგებლის თქმით, "ენერგო პრო ჯორჯიას" თანამშრომლები დაზიანებულ უბნებზე ამ წუთებშიც მუშაობენ. კომპანიაში ამ დრომდე ვერ გვპასუხობენ როდის აღდგება ელექტროენერგიის მიწოდება ოზურგეთის მუნიციპალიტეტების სოფლებს.

რამდენიმე წუთის წინ ჩაირთო დენი დაბა ანასეულში. ამ დრომდე ელოდებიან შუქის მოსვლას ქალაქ ოზურგეთში, გრიბოედოვის ქუჩაზე მაცხოვრებლები:

_ როგორც "ენერგო პრო ჯორჯიაში" მითხრეს, მალე აღუდგება გრიბოედოვის ქუჩას დენი. რაც შეეხება გზებს, ტექნიკა მთელი ღამის განმავლობაში მუშაობდა, ამ წუთებშიც მუშაობს და ქალაქის არცერთი ქუჩა არ არის გაუწმენდავი, _ აღნიშნა ჩვენთან საუბრისას ქალაქ ოზურგეთის მერმა ბეგლარ სიორიძემ.